Jesukwe käre kukwe mikani täte

¿Tata aune mama mikadre täte ye nuäre nuaindre?... Ruäre ngwane ñaka nuäre, ¿ñan ererea? Akwa ¿dre raba mä dimike kukwe mike täte gare mäi? Jesukwe kukwe bämikani ye mäkwe mikadre ñärärä. Käre nämene Jehová aune rün bätä meye mike täte, ¿ye gare mäi?... Ani ja tötike bäri Jesubätä.

Jesús jämi nüke Kä tibienbätä känenkri, nämene kä kwinbiti rün kwe, Jehová yebe. Akwa nünanbare kwe Kä tibienbätä ye ngwane, rün aune meye namani arato. Kädeka nämene José bätä María. ¿Ñokänti niaratre namani rüne aune meyere ye mä törba gai?...

Jehovakwe jondron ñan tuabare nuainbare, ne kwe Jesús däredre Kä tibienbätä. Monso kwe nämene nüne kä kwinbiti, aune ye mikani kwe María yebätä. Sö krä ökän te, niara ririabare meye ye bulete, monso mada ye kwrere, aune ye bitikäre därebare. Ye köböire monso chi namani Mariakwe. Niara aune muko kwe José, käkwe Jesús ngübabare.

Kä nämene 12 Jesubiti ye ngwane, kukwe keteiti nuainbare kwe yebiti bämikani kwe, nämene rün kwe Jehová ye tarere krubäte. Jesús aune mräkätre kwe nikani mente Jerusalén ye ngwane kukwe ne namani bare. Nikanintre yete Jehová mikakäre täte. José aune María jatanintatre ja gwirete ye angwane, Jesús ñaka nämene näin ben gani kwetre. ¡Ñaka nämene nitre mada ye ngätäite! ¿José aune María dre nuainbare raba ruin mäi?...

Niaratre nikaninta jötrö ngwarbe Jerusalén aune namanintre Jesús känene. Köbö komä te känänbare kwetre kä jökrä känti. ¡Namanintre töbike krubäte! Akwa mrä kwanintari ietre. ¿Nämene medente gare mäi?... Nämene templote. ¿Ñobätä nämene yete? Ñobätä ñan aune kä yekänti raba kukwe mike gare krubäte jai Jehová yebätä. Jesús nämene Rün tarere aune tö nämene jondron kwin nuaindi kä mikakäre jutobätä. Jesús ririabare aune namanina kri ye ngwane, nämene Jehová mike täte jankunu. Käre nämene kukwe mike täte, akwa ruäre ngwane ñaka namani nuäre kräke ñobätä ñan aune nitre ruäre käkwe nuainbare tare krubäte. ¿Jesukwe María aune José mikani täte arato raba ruin mäi?... Jän nieta Bibliakwe.

¿Käre Jesús nämene kukwe mike täte ye jutuani mäi?... Ye tä kukwe ütiäte driere nie: ruäre ngwane ñaka nuäre ni kräke, akwa käre nikwe tata aune mama mikadre täte. ¿Mäkwe nuaindi?...