KUKWE JA TÖTIKARA 3

Adán aune Eva ñaka Ngöbö mikani täte

Kri ngokwä ñäkäibare abokän Eva bini Adán ie ye tä niara kisete

Bati, Eva nämene kaibe ye ngwane, kulebra blitabare ben. Kulebra ye ngwantaribare ie: ‘¿Erametre, Ngöbö ñaka tö mun tuai kri ngokwä kwete jire ya?’. Eva niebare ie: ‘Nun raba kri ngokwä jökrä kwete, akwa keteiti aibe nun ñaka raba kwete. Nun kri dati se ngokwä kwetadre angwane, nun krütadre’. Angwane kulebra niebare ie: ‘Mun ñaka krütai. Munkwe kwetai angwane, mun rabai Ngöbö kwrere’. ¿Kukwe metre niebare kwe? Ñakare. Nämene ni ngökö, akwa Eva mikani era jai. Eva namani kri ngokwä ye mike ñärärä jankunu angwane, bäri tö namani kwetai. Aisete kwetani kwe aune biani kwe Adán ie arato. Niaratre ñaka Ngöbö kukwei mikai täte ye ngwane krütai ye nämene gare kwin Adán ie, akwa yebiti ta kri ngokwä ye kwetani kwe.

Adán aune Eva kämikaninkä jardín Edén yete ye ngwane angeletre aune ngitra jutra ngitiekä mikani ne kwe niaratre ñaka rikadreta yete

Köbö ye arabe te, Jehová blitabare Adán aune Eva ben. Ñobätä nitre ye ñaka niara mikani täte ye ngwantaribare kwe ietre. Eva ngite kitani kulebra yebiti aune Adán ngite kitani Evabiti. Adán aune Eva ñaka Jehová mikani täte, yebätä niarakwe dianinkä jardín yete. Ne madakäre, angeletre aune ngitra jutra ngitiekä mikani kwe jite ne kwe niaratre ñaka rabadre nikenta yete.

Jehovakwe niebare nire käkwe Eva ngökani ye niarakwe mikai ja ngie nuin arato. Metrere kulebra ye ñan ai käkwe blitabare ben. Jehová ñaka kulebra sribebare blitakäre. Ángel töi käme käkwe kulebra mikani blite. Tö namani Eva ngökai. Ángel yei Satana o Diablu nieta. Ja känenkäre, Jehovakwe Satana gaite. Aisete niara ñaka rabaira nitre ngökö kukwe käme nuainkäre.

“Diablu [...] ñan tä kukwe era metre niere jire chi bati. Tä blite angwane, kukwe era nieta ñakare jire kwe” (Juan 8:44).