Ju Mente Kwin Babel

Ñü Kri ye bitikäre, Noé ngäbriänkätre aune muko kwetre ye monsoi namani kwati krubäte. Monsotre ye ririabare angwane nikanintre nüne kä jene jene känti, Jehovakwe niebare ietre ye erere.

Akwa, nitre ja mräkäre ruäre ñaka Jehová kukwei mikani täte. Nitre yekwe niebare: ‘Ari nemen nete aune ani juta bätä ju mente kwin sribere nememe kä kwinbätä. Ye köböire ni rabai käikitaninkä’.

Sribi nuain nämene kwetre ye ñaka namani tuin kwin Jehovai, yebätä sribi ye ketaninbätä kwe. ¿Nuainbare ño kwe gare mäi? Batibe nitre ye mikani blite kwe kukwe jene jenebiti. Nitre käkwe juta ye kädekani Babel, abokän ja ‘kukwei ñan nükani gare ietre’ meden gärätä. Ja kukwei ñaka namani nüke gare kwärikwäri ietre, yebätä sribi ye tuanimetre kwetre aune kämikaninkä kwetre kä yekänti nünankäre kä madakänti. Akwa, nämenentre nüne yekänti namanintre kukwe blo nuainne jankunu. ¿Ni mada nämene Jehová tarere raba ruin mäi? Ye nikwe mikai gare jai kapitulo ja känenkäre yebätä.