¡Mrä mada monso namani kwetre!

Abrahán aune Sara ye nämene ja mäkäninte kä kwati krubäte te. Ju kwin nämene kwetre kä Ur yekänti, ye tuanimetre kwetre nünankäre jondron nire kwata sribebare jure yete. Akwa, Sara ñaka namani rubun, ñobätä ñan aune nämene tö ngwen Jehovai.

Sara tö namani monso tuai iti jakwe, yebätä niebare kwe Abrahán ie: ‘Sribikä tikwe Agar rabai mäbe ngwane monso rabai kwe ye rabai monso tikwe kwrere’. Kä nikani ta angwane, Agar monsoi namani iti aune kädekani kwetre Ismael.

Kä nikani raire ta angwane, Abrahán yebiti kä namani 99 aune Sara yebiti kä namani 89 ye ngwane, nitre nimä nükani niaratre känti. Abrahán niaratre nübaibare ja düke chi kri täni aune mröre arato. ¿Ye abokän nire nire gare mäi? Ye angeletre. Niaratre niebare Abrahán ie: ‘Kä mada bike kite yete mä aune mä muko yekwe monso rabai iti’. Jondron nire kwata sribebare jure yete Sara nämene angwane, nitre ye kukwei juruabare ie kukwe ye niere ye ngwane kötabare kwe jateri aune töbikabare kwe: ‘¿Ti nibira umbre nengwane monso rabai tikwe ya?’.

Kä nikani ta yete, Sara monsoi därebare ángel Jehovakwe käbämikani ie ye erere. Abrahán monso ye kädekani Isaac, ye abokän ‘kötata’ gärätä.

Isaac yebiti kä nämene kwärike ye ngwane, Ismael nämene Isaac kötaire ye jutuabare Sara ie. Niara tö namani monso kwe ye kriemikai, yebätä janamene blite Abrahán ben aune niebare kwe: ‘Agar aune Ismael juentari gwi nete’. Kenanbe, Abrahán ñaka tö namani ye nuain. Akwa Jehová tö namani Isaac ye kriemikai arato, aisete niebare kwe Abrahán ie: ‘Sara tä dre niere ye mäkwe nuain. Tikwe Ismael ngübai. Akwa, tikwe kukwe käbämikani mäi ye rabai bare Isaac ye köböire’.