KUKWE JA TÖTIKARA 11

Tödeka kwe gani

Isaac rabadre Jehová tarere aune tö ngwen kukwe käbämikani yei, ye Abrahán driebare ie. Akwa kä namani 25 Isaac yebiti angwane, Jehová kukwe ñaka nuäre Abrahán kräke ye ribebare nuaindre ie. ¿Dre ribebare kwe ie gare mäi?

Ngöbökwe niebare Abrahán ie: ‘Monso mäkwe itibe ye mä raba bien jondron nire kukwata ye kwrere ngutuä Moria yekänti’. Ñobätä Jehová nämene kukwe ye ribere ie ye ñaka nükani gare ie, akwa yebiti ta kukwei mikani täte kwe.

Jetebe se kwrere dekä, Abrahán nikani Isaac aune nitre sribikä nibu kwe yebe ngutuä Moria ye kokwäre. Köbö nikani köbömä ta, ye bitikäre ngutuä ye jatani tuin menteni ietre. Abrahán aune Isaac nikani jondron kukwe ye ngwane niebare kwe nitre sribikä kwe yei niaratre rabadre ngübare. Abrahán ngi ñukwä okwä mikara ye biani ngobo kwe ie aune niara nikani cuchillo ngwena. Isaac ngwantaribare rün ie: ‘¿Jondron nire kukwabike nikwe ye tä medente?’. Abrahán niebare ie: ‘Monso tikwe, Jehovakwe jondron ye biain nie’.

Mrä mada namanintre ngutuä yekänti, niaratre kä jondron nire kukwara ye käi ükaninte. Ye bitikäre, Abrahán käkwe Isaac kise aune ngoto mäkäninte aune biti mikani kwe kä jondron nire kukwakäre yebiti.

Isaac kise aune ngoto tä mäkäninte kä jondron kukwakäre yebiti aune Abrahán tä cuchillo ketete

Abrahán cuchillo diani kisete. Ye ngwane ángel Jehovakwe kä kwinbiti käkwe niebare: ‘¡Abrahán! ¡Ñaka kukwe tare nuain monso mäkwe yebätä! Mätä tödeke ye nibira gare tie, ñobätä ñan aune mätä juto biare monso mäkwe ye biankäre’. Abrahán nikrabare angwane, oveja nidan nämene krotu nibrianinte kri kidete jutuabare ie. Aisete, jötrö ngwarbe Isaac tikaninte kwe aune oveja nidan ye kukwani kwe monso kwe ye täte.

Köbö yete ja känenkäre, Jehová niebare Abrahán namani ja ketamuko kwe. ¿Ñobätä gare mäi? Ñobätä ñan aune Jehovakwe dre ribebare Abrahán ie ye nuainbare jökrä kwe, kukwe ribebare ie ye ñaka nükani gare ie akwa nuainbare kwe.

Jehová kukwe käbämikani ye ngwaninta törö kwe Abrahán ie: ‘Tikwe jondron kwin mikai nemen bare mä kräke aune tikwe monso biain kwati krubäte mäi’. Kukwe yebiti Jehová nämene mike gare, niarakwe Abrahán mräkätre ye köböire kukwe kwin mikai nemen bare nitre jökrä käkwe ja ngwain kwin ye kräke.

“Ngöbökwe ni jökrä tarebare krubäte ye medenbätä Monso ngöräbe kwe biani kwe, ne kwe ni jökrä käkwe tödekadre ie ye ñaka gadrete, ñakare aune ja nire kärekäre ye rabadre kwe” (Juan 3:16, TNM).