Jondron ütiäte biani Jacob ie

Isaac yebiti kä namani 40 ye ngwane ja mäkäninte kwe Rebeca ben. Isaac namani Rebeca tarere krubäte. Ja känenkäre monsotre brare munkine, därebare kwetre.

Ngobo mubai ye kädekani Esaú aune nibukäre ye kädekani Jacob. Esaú nämene brai krubäte aune tö nämene näin känsenta. Akwa Jacob abokän tö nämene rabai gwi.

Kä ye näire, nitre rüne nämene krüte ye ngwane, kä aune ngwian bian nämene bäri ere monso mubai yei eteba köre ye kräke. Ye abokän jondron bian nämene gärätä. Ngöbökwe kukwe käbämikani Abrahán ie ye rabadre Isaac mräkätre yekwe, ye abokän jondron biani ye erere. Kukwe käbämikani ye ñaka namani tuin ütiäte Esaú ie. Akwa Jacob kräke kukwe ye namani ütiäte krubäte.

Bati, Esaú nämene nainte krubäte muntiabätä köböiti nükaninta gwi. Angwane Jacob nämene mrö bänänte sribere ye rä juruabare ie aune niebare kwe: ‘¡Mrö nibi krubäte tie! ¡Mrö bä tain ye ngwen chi tie!’. Jacob niebare ie: ‘Jondron ütiäte tä biandre mäi ye rabadre tikwe ye käbämike käne tie’. Esaú niebare ie: ‘¡Jondron tä biandre tie ye ñaka ütiäte ti kräke! Mäkwe dian jai. Ti tönibi mrö kwetai’. ¿Esaú töbikabare kwin kukwe ye nuainkäre raba ruin mäi? Ñakare, niara ñaka töbikabare kwin kukwe yebätä. Jondron ütiäte krubäte ye mikani tuin ngwarbe kwe jai mrö blato kwatibebätä.

Isaac namanina umbre ye ngwane, köbö nükani ie kukwe kwin niekäre ngobo mubai kwe ie. Akwa, Rebeca käkwe ngobo Jacob ye dimikani, ne kwe Isaac kukwe kwin niedre Jacob ie. Kukwe ye namani gare Esaú ie angwane, ja töi mikani kwe eteba murie kete. Isaac aune Rebeca tö namani Jacob kriemikai yebätä niebare kwetre ie: ‘Nän aune mä raba nüne mä grü Labán mä meye ngwai yekänti, nememe Esaú rabadreta jäme ye ngwane’. Jacob rün aune meye kukwei mikani täte aune ngitiani ne kwe etebakwe ñaka murie ketadre.