Ni klabore käkwe Ngöbö mikani täte

Jacob ngäbriänkätre ye abokän iti kädeka nämene José. Etebatre umbre yei namani gare José ye nämene bäri tare rünkwe. ¿Ja nämene nemen ruin ño ietre raba ruin mäi? Niaratre nämene bätä ngwen krubätebätä aune brukwä nämene José kräke. Bati, José köböbare ye mikani gare kwe etebatre yei. José köböbare ye abokän etebatre namani nütüre köbö rükadi ngwane niaratre rabai ngukodokwäbiti niara ngwärekri. Ye medenbätä, niaratre brukwä namani bäri kräke.

Bati, José etebatre nämene oveja ngübare juta Siquen ye ken. Angwane Jacob käkwe José juani etebatre nämene ño ye mikakäre gare jai. José jutuabare ietre menteni ye ngwane, namanintre niere: ‘Ni köbökä nükera ni jiebiti tuin. ¡Ani kämike!’. Aisete neketaninte ietre aune kitani kwetre kämäkä mente nguse yete. Akwa Judá niaratre eteba ye käkwe niebare: ‘Ñaka niara kämika. Ñakare aune brän rürübäine aune niara rabadre ni klabore ye kwrere’. Aune ye erere nuainbare kwetre. Niara rürübäinbare ngwian 20 mününe yebätä nitre Madián jondron rürübäinkä nikanintre kä Egipto kokwäre yei.

Ye bitikäre, José etebatre käkwe dän kwe ye mritaninkä cabra däriete, biti jänikani kwetre rünye aune ngwantaribare kwetre ie: ‘¿Dän ne ñan mä ngobokwe ya?’. Jondron nire käkwe José kämikani Jacob namani nütüre aune namani ulire krubäte. Ni ñaka namani jire iti niara töi mikakäre jäme.

Namanintre Egipto ye ngwane, ni nitre rükä jie ngwanka ütiäte kädeka nämene Potifar ye käkwe José kökani ne kwe rabadre klabore kräke. Akwa, Jehová nämene José dimike. José abokän nämene sribire kwin aune tö ngwan raba ie namani tuin Potifar ie. Kä nikani braibe ta angwane, Potifarkwe José kädekani jondron jökrä ngübabitikä.

Potifar muko ie José namani tuin bä nuäre aune dite, yebätä mantre jetebe namani niere ie niara rabadre nemen ben. ¿José nämene dre nuainne? José ñaka nämene kain ngäbiti aune nämene niere ie: ‘Ñakare, ye ñaka kwin. Potifar tä tö ngwen tie aune mä abokän niara muko. Tikwe mä kadre ngäbiti angwane, tikwe ja mikadre ngite Ngöbö rüere’.

Bati, Potifar muko tö namani rabai Josebe. Yebätä José nakani dänbiti ie akwa ngitiani niara ngänikaire. Potifar nükaninta gwi ye ngwane, meri yekwe niara ngökani, niebare kwe José tö namani niara tuai nemen jabe. Potifar namani rubun krubäte aune José kitani ngite kwe. Akwa, Jehová ñaka José käi kwitaninkä jabiti.