Jefté kukwe käbämikani

Mada bati nitre Israel Jehová käi kwitaninkä jabiti aune namanintre ngöbö keta kabre ngwarbe mike täte. Akwa ngöbö ngwarbe ye ñaka nämene niaratre kriemike nitre Ammón nämene rü gainkä niaratre rüere ye ngwane. Juta yekwe ja tare nikabare kä kwati krubäte te. Mrä mada, niaratre niebare Jehovai: ‘Nunkwe ja mikani ngite. Mä raba, nun mike kwäre nun rüe kisete’. Jondron sribebare ngöböre ye nitre Israel käkwe juani ngwarbe aune namanintre Jehová miketa täte. Jehová ñaka tö namani niaratre tuai ja tare nike jankunu.

Aisete nitre Israel käkwe ni rükä iti kädeka nämene Jefté ye dianinkä. Niara namani rü jie ngwanka nitre Ammón rüere. Jefté niebare Jehovai: ‘Mäkwe nun dimikai rü ne ganainne angwane, ti näinta ja gwirete ye ngwane nire jatai käne ti ngäbiti ye tikwe biain mäi’. Jefte orabare ye Jehovakwe kukwe nuani aune dimikani kwe rüe ye ganainne.

Jefté nikaninta ja gwirete ye ngwane, ngängän kwe ara jire jatani käne niara kain ngäbiti. Ngängän ngörä kwe. Nikani ngäbiti bailare aune pandereta ngö mike. ¿Jefté dre nuainbare? Kukwe käbämikani kwe ye nükaninta törö ie aune niebare kwe: ‘¡Ai, ti ngängän! Mätä ti brukwä mike ulire. Tikwe kukwe käbämikani Jehovai aune ye mikakäre nemen bare ti rabadre mä juen sribire tabernáculo kä Siló yekänti’. Ngängän niebare ie: ‘Tata mäkwe kukwe ye käbämikani Jehovai angwane, ye erere mäkwe mika nemen bare. Nebe tibike ribere mäi ti tuenmetre niken sö krobu kä tokwäte ja ketamuko tikwe ben. Ye bitikäre, ti näin tabernáculo yete’. Jefté ngängän ye ja ngwani metre aune sribibare kwe tabernáculo yete kärekäre. Aune ja ketamuko kwe ye nämene niken käre basare ie kä kwatire kwatire te kä Siló yete.