Jesukwe mrö biani mrä deu

Nitre judío nämene Pascua käi ngwen juto jabätä kä kwatire kwatire te köbö 14 nisán yete. Jehovakwe niaratre mikani kwäre kä Egipto yekänti aune nikani ngwena Kä Käbämikani kwe ietre yekänti ye ngwankäreta törö jai niaratre nämene ye nuainne. Kä 33 yete, Jesús aune nitre apóstol kwe käkwe Pascua ye käi ngwaninta juto jabätä cuarto keteiti nämene kwin Jerusalén yekänti. Mröbare kwetre, ye bitikäre Jesukwe niebare: ‘Mun iti käkwe ti kitai ngise’. Nitre apóstol töi namani ñan krütare aune ngwantaribare kwetre ie: ‘¿Nire?’ Jesukwe niebare ietre: ‘Nire ie tikwe ban oto ne biain ye ara’. Angwane ban oto ye biani kwe Judás Iscariote ie. Bengwairebe, Judás nükani krö aune nikani mento.

Ye bitikäre, Jesús orasion nuainbare, ban ñäkäninbiti kwe aune biani kwe nitre apóstol mada mada yei. Niebare kwe ietre: ‘Ban ne kwete. Ye tä ti ngätä bämike, abokän tikwe biandi mun ütiäre’. Ye bitikäre, orasion nuainbare kwe vino yebätä, biani kwe nitre apóstol kwe ie aune niebare kwe: ‘Vino ne ñain. Ye tä ti därie bämike, abokän tikwe biandi mun ngite ütiäre. Mun rabai reire tibe kä kwinbätä ye tibike käbämike munye. Mun ne nuain käre kä kwatire kwatire te ti ngwankäre törö jai’. Nitre nänkä Jesús jiebiti täbe ja ükökrö kä kwatire kwatire te köbö yete deu. Gätä ye kädekani Däkien Jesús Mrö Biani Deu.

Jesukwe mrö biani deu ye bitikäre, nitre apóstol ye meden bäri ütiäte yebätä namanintre ñäke jai. Akwa Jesús niebare ietre: ‘Mun meden bäri ütiäte mun ngätäite ye rabadre ja ngwen monso kia ye kwrere o ni ñaka ütiäte ye kwrere’.

Jesús niebare ietre arato: ‘Mun abokän ja ketamuko tikwe. Ye medenbätä ti Rün tö dre mikamana gare munye ye jökrä tita mike gare munye. Gwäune ti näin ti Rün känti kä kwinbätä. Akwa mun abokän rabai nete aune munkwe ja taredi kwärikwäri ye köböire mun abokän ja tötikaka tibe rabai gare nitre ie. Tikwe mun tarebare ye erere munkwe ja tare kwärikwäri’.

Mrä mada, Jesús orabare Jehovai ne kwe nitre ja tötikaka kwe ye jökrä ngübadre kwe aune niaratre dimikadre kwe sribire gwairebe aune jäme jabe. Arato orabare kwe ne kwe Jehová kä rabadre mikani deme. Ye bitikäre, Jesús aune nitre apóstol käkwe kantabare Jehová käikitakakäre aune biti nikanintre mento yete. Köbö namanina no ngwane Jesús rakadre ngite.