Kukwe mikata gare nitre ja ükaninkrö kräke

NITRE NI KÄI ÜKATEKÄ. Nitre ni käi ükatekä ye tä mä dimikakäre. Mäkwe niaratre dimika arato, dre dre nie kwetre mäi ye erere mäkwe nuain, karo mikate käi, dikaka yebätä, täkärä känänbätä aune kukwe madabätä arato.

JA NGÖKA ÑÖTE. Plataforma ye känenkri täkärä täi ükaninte nitre ja ngökai ñöte kräke, kukwe mada tärä aune ye mikai gare känenkri. Nitre ja ngökaka ñöte ye rabadre ja ükete kätä ükaninte kräketre yekänti blita jämi nitre ja ngökaka ñöte kräke ye känenkri, sabadote dekä. Niaratre jökrä jatadre toalla bätä dän kwin ja ngökakäre ñöte ngwena jai.

NGWIAN BIANTA. Ngwian kitaninkä ere krubäte ne kwe täkärä kwin tädre nikwe, jondron blita kräke bätä sribi mada krubätebätä, abokän köböire kätä nemen juto nibätä bätä ni dimikata nökrö bäri Jehová ken nita ja ükökrö gätä kribätä ye ngwane. Ngwian bianta ja töi jeñebiti munkwe yebiti jondron ne ütiä bianta bätä sribi Ngöbökwe nuainta kä jökräbiti ye dimikakäre. Gätä käi ye jökrä känti kaja tä ükaninte ngwian kitakäre ye täräi mikaninkä gare kwin. Ngwian o jondron jökrä bianta yebätä debe bianta krubäte. Nitre Braibe Konkrekasion Jökrä Ngübabitikä tä debe bien mäi sribi Gobran Ngöbökwe ye dimikata mäkwe yebätä.

NITRE NI DIMIKAKA KÄNE. Mäkwe ngwan törö jai kä ne tä ükaninte kukwe tare rabadre bare JÖTRÖ NGWARBE ye AIBE kräke.

JONDRON NIANINTE. Jondron nianinte kwan mäi ye mäkwe bianta Jondron Nianinte Käita ükaninte yekänti. Jondron nianinte mäkän angwane, mä rika kä yekänti ngwentari bätä mike ñärärä. Monso ñaka tädre rün ken o nianinte ye mä raba niken ngwena kä yekänti. Akwa, kä ye ñaka ükaninte monso ngübakäre. Mäkwe monso ye ngübabiti aune tädre mä ken ye mäkwe mika gare kwin jai.

TÄKÄRÄ. Mäkwe töbika kwin ni mada ye kräke. Mäkwe ngwan törö jai, mä raba täkärä ye denkä jai nitre nänkä mäbe karote, nitre nünanka mäbe o nitre ja tötikaka Bibliabätä mäbe ye aibe kräke. Täkärä medente mäkwe ñaka täkäi yekänti mäkwe ñaka jondron mika.

NITRE JA MIKANI SRIBIKÄ. Mä törba sribidi siba gätä kri yete ngwane, mä raba niken sribi käita ükaninte yekänti.

GÄTÄ ÜTIÄTE

KWELA NITRE GOBRAN NGÖBÖKWE KUKWEI DRIEKÄ KRÄKE. Nitre prekursor kä 23 aune 65 biti tö kukwe driei bäri aune tö näin kwela yete ye nübaita gätä nuaindi domingote dere yebätä. Kä medenkänti bätä ora nuäi te rabai bare ye mikai gare plataforma yekänti.