¿Dre raba mä dimike ja tötike jankunu Bibliabätä?

Ja tötikadre Bibliabätä ye kwin ni kräke, akwa ñaka nuäre. Ruäre mä raba kukwe ne erere ngwentari jai: “¿Ti rabai ja tötike jankunu Bibliabätä?”. ¿Ñobätä mäkwe ñaka ja tötika Bibliabätä tuanemetre? Kukwe rabadre mä kisete yebiti ta, ¿dre raba mä dimike ja tötike jankunu?

1. ¿Ja tötikadre Bibliabätä ye ñobätä ütiäte?

“Ngöbö Kukwei abko nire amne dite” o raba ni dimike (Hebreos 4:12). Biblia ye raba mä dimike krubäte, ñobätä ñan aune Ngöböta töbike ño aune töita ño mä kräke ye drieta kwe mäi. Biblia raba mä dimike kukwe keta kabre mike gare jai, kukwe kwin den nuaindre jai aune tö ngwen kukwe kwin ie. Aune bäri ütiäte, mä dimikai kwe ja ketakäre Jehovabe. Mäkwe ja tötikai jankunubätä ngwane, mäkwe nünain bäri kwin.

2. ¿Kukwe drieta Bibliabätä ye ñobätä rabadre tuin ütiäte mäi?

Kukwe metre ye jondron ütiäte krubäte tä nemen nikwe ye kwrere. Yebätä Biblia tä niere nie: “Mäkwe kukwe metre ye köka aune ñaka rürübäin jire” (Proverbios 23:23). Kukwe metre ye ütiäte ni kräke ngwane, nikwe ja tötikai jankunu Bibliabätä kukwe rabadre ni kisete yebiti ta (mäkwe ñäkä Proverbios 2:4, 5 yebätä).

3. ¿Jehovakwe mä dimikai ño ja tötike jankunu?

Jehovakwe ni sribebare, niara dite krubäte aune ja ketamuko mäkwe, yebätä mä gare kwin ie aune niara rabadre gare bäri mäi ie tö. Ngöbö raba mä töi mike ja tötike kukwe kwe yebätä aune raba ja di bien mäi nuainkäre (mäkwe ñäkä Filipenses 2:13 yebätä). Mä töi rabadre bäri ja tötikakäre Bibliabätä aune mikakäre täte ye mäta ribere jai ngwane, Ngöbökwe mä dimikai nuainne. Aune ja di biain kwe mäi ja tuakäre kukweta mä kisete o ja mikata mä rüere yebe. Jehovakwe mä dimikadre ja tötike jankunu Bibliabätä ye mäkwe ribe ie (1 Tesalonicenses 5:17).

JA TÖTIKE BÄRI NGUSETA

4. Ja tötika Bibliabätä rabadre bäri ütiäte mä kräke

Ruäre ngwane, kukwe nuaindre krubäte nie aune kä ñaka nemente jire nie ja tötikakäre Bibliabätä. Ye ngwane, ¿ni raba dre dimike? Ñäkädre Filipenses 1:10 yebätä aune kukwe ne kädriedre jabe:

• ¿Dre bäri ütiäte ruin mäi?

• ¿Mä raba dre nuainne ne kwe ja tötika Bibliabätä rabadre bäri ütiäte mä kräke?

1. Üma mikadre siäte, biti jä mikadre te ngwane, ñaka rabadre jökrä te.

2. Akwa jä mikadre käne siäte, biti üma mikadre te ngwane, jä bäsi jökrä rabadre te. Ye erere arato, mäkwe kukwe “bäri ütiäte” mikai nuaindre käne jai ngwane, rabai bare mäi aune kä rabaite mäi kukwe mada kräke.

Ni sribebare ne kwe ni törbadre Ngöbö mikai gare jai aune mike täte. Ja tötika Bibliabätä tä ni dimike nuainne. Ñäkädre Mateo 5:3 yebätä aune kukwe ne kädriedre jabe:

• Ja tötika Bibliabätä mikata bäri ütiäte jai ngwane, ¿dre kwin tä nemen nikwe?

5. Ja mika mä rüere, akwa yebiti ta mäkwe ja tötika jankunu

VIDEO: Kukwe kwin namani tikwe ja tötikabätä jankunu (5:22)

• Francesco nämäne ja tötike niebare kwe meye aune ja ketamuko kwe ie ngwane, ¿matani ño bätätre?

• ¿Ja tötikani jankunu kwe ye köböire dre kwin namani kwe?

Ñäkädre 2 Timoteo 2:24, 25 yebätä aune kukwe ne kädriedre jabe:

• ¿Mäta ja tötike ye mate ño mä mräkä aune ja ketamuko mäkwe yebätä?

• Texto tä niere erere, nitre ñan törbadre mä tuai ja tötike ngwane, ¿mäkwe dre nuaindre? ¿Ñobätä mäkwe ja töi mikadre kore?

6. Jehovakwe mä dimikai ye ie tö ngwen

VIDEO: Jehovata ni dimike ja töi kwite (3:56)

• ¿Drebätä Jimkwe ja töi kwitani Jehová töi nuainkäre?

• ¿Jim kukwe nuainbare ye meden nibi tuin bäri kwin mäi?

Ñäkädre Hebreos 11:6 yebätä aune kukwe ne kädriedre jabe:

• ¿Nitre tö Jehová mikai täte ye kräke dre nuaindi kwe?

• Mätä ja di ngwen ja tötikakäre Bibliabätä, ¿yebätä ja ruin ño Jehovai ruin mäi?

¿DRE NIBI GARE MÄI?

Ja tötikadre Bibliabätä ye ñaka nuäre, akwa mä dimikai kwe nüne kä jutobiti kärekäre. Mäkwe tö ngwain jankunu Jehovai ngwane, kukwe kwin nuaindi kwe mä kräke.

Ngwankäreta törö

• ¿Kukwe metre drieta Bibliakwe ye ñobätä ütiäte mä kräke?

• ¿Ja tötikadre Bibliabätä ye ütiäte mä kräke ye mä raba bämike ño?

• ¿Ñobätä mäkwe ja di ribedre Jehovai ja tötikakäre jankunu Bibliabätä?

KUKWE MIKE GARE BÄRI JAI

Kukwe ketabokä käkwe nitre dimikanina ñaka kä juankäre ngwarbe ta ye mike gare jai.

“Dre nuaindre ñaka kä juandre ngwarbe ta” (Ni Mikaka Ngwäte, febrero 2014)

Meri iti tö nämäne Ngöbö mikai täte, akwa nämäne nuainne ño ye ñan nämäne nüke gare muko kwe ie. Jehovakwe meri ye dimikani ño ye mike ñärärä.

Jehovata ja di bien nie kukweta ni kisete ye ngwankäre (5:05)

Meri iti ñan ja di ngwani nekä ye käkwe muko kwe dimikani ño ye mike ñärärä.

Tikwe ja gaba kukwe metre yebe (6:30)

Nitre testiko Jehovakwe tä nitre ja mräkäre ñäketubu nieta. ¿Akwa ye metre ya?

“¿Nitre testiko Jehovakwe tä nitre ja mräkäre ñäkebiti o tä mike keteitibe?” (Artículo jw.org)