Mäträre metre ta

Jesukwe nuainbare ño

VIDEO: Ni bati gobranka aune jondron bökäne yebätä Jesukwe mäträbare

1. VIDEO mike ñärärä o ñäke Marcos 10:​17-22 yebätä. Biti kukwe ngwantarita nebätä töbiketari:

1. ¿Ni bati gobranka ne töi meden kwin jutuabare Jesús ie?

2. ¿Ñobätä Jesús rabadre ja tare bämike ni yei aune kukwe niere metre ta ie mäträkärebätä?

Jesús kukwe kwin bämikani, ¿ye tä dre driere nie?

2. Ni ja tötikaka ye ririadre ja üairebiti ie ni tö ngwane, nikwe taredre aune blitadre töi jämebiti ben, akwa kukwe niedre metre ie arato dimikakäre ja kete Jehovabe.

Ja ngwen Jesús erere

3. Ni ja tötikaka dimike kukwe mike nuaindre jai aune mike nemen bare.

1. Recuadro “Mäkwe kukwe ne nuain” tä tärä Mä raba nüne kä jutobiti kärekäre yebätä ye kädriere ben kukwe ja tötikara keteitire keteitire yekänti.

2. Ni ja tötikaka kukwe mikadre nuaindre jai ye rabadre bare ie yekäre, dre nuaindre kwe gwä ngwane aune ja käne, ye dimike mike nüke gare jai.

3. Ni ja tötikaka tä nirien ja üairebiti yebätä kukwe kwin niere ie bäre bäre o käre.

4. Dre köböite ni ja tötikaka ñaka nirien ja üairebiti ye mike gare kwin jai, biti niara dimike ja tuin kukwe yebe.

1. Ngwentari jai:

   • “Ni ja tötikaka tibe ñan ja töi mike ja ngökö ñöte ngwane, ¿dre tä ketebätä rä?”.

   • “¿Ti raba dre nuainne dimikakäre?”.

2. Ni ja tötikaka käkwe dre nuaindre ririakäre jankunu ye niere ie töi bökänbiti aune kukwe nuärebiti; ja di kärere Jehovai ne kwe kä jürä ñan rabadre mäbätä ye niekäre ni ja tötikaka ie.

5. Ni ja tötikaka ñan nirien jire ja üairebiti ngwane, ñaka ja tötika ben mada.

1. Mäkwe ni ye tötikadre jankunu o ñakare rabadre gare mäi yekäre kukwe ne ngwentari jai:

   • “¿Kukweta nemen gare ie ye mikata täte kwe?”.

   • “¿Tä näin gätäbätä aune kukwe metre yebätä tä blite ni madabe?”.

   • “Tä ja tötike mekera ngwane, ¿tö ja mikai testiko Jehovakwe tuinbätä?”.

2. Ni ja tötikaka ñan nirien ja üairebiti ngwane mä raba ne nuainne:

   • Dre tä niara ketebätä yebätä töi mike kukwe ngwentari jai.

   • Ñobätä mäkwe ñaka tötikai jankunu ye mike gare ie töi kwinbiti.

   • Tö rabadre ja tötikaita ngwane, rabadre dre nuainne känenkri ye mike gare mrebe ie.