Gätä Nita Dirire aune Ja Ngwen Ño ye kräke kukwe ükaninte

Kukwe ükaninte jatäri

1. Gätä Nita Dirire aune Ja Ngwen Ño ye rabadre bare kwin dre dre nuaindre yekäre kukwe mikata gare nete. Nire nire kukwe mikai gare gätäte, ye rabadre ja ükete kukwe nieta täräkwata Kukwe ja jie ngwankäre gätäte Nita Dirire aune Ja Ngwen Ño yebätä aune kukwe nieta nete ye ererebätä. Nitre kukwe driekä jökrä raba ja kä bien kukwe kädriekäre o bämikakäre ye niedre ietre. Nitre tä nüke käre gätä nuainta konkrekasionte yebätä aune tätre kukwe nieta Bibliabätä kain ngäbiti bätä tätre kukwe ja jie ngwankäre ni kristiano ie ye erere nuainne ngwane, kukwe bian raba kädriedre ietre. Ni iti tö rabadre kukwe mike gare arato jämi ja mike kukwe driekä ngwane, ni kukwe ükatekä gätä, Nita dirire aune Ja Ngwen Ño ye kräke käkwe blitai ben dre nuaindre kwe yebätä, biti ni ye raba nuainne o ñakare ye mikadi gare kwe. Blitata ben ngwane, nire tä dirire ie tädre yete (o tädre rün kwe kukwebätä ben). Dre ribeta ja mikakäre ni kukwe driekä jämi ja ngökö ñöte ie ye ara ribeta (od-S cap. 8 párr. 8).

KUKWE NIEDRE KENA

2. Minuto krati. Kantiko aune orasion ye bitikäre, ni gätä Nita Dirire aune Ja Ngwen Ño jie ngwanka käkwe nitre töi mikadre kukwe meden kädriedre yebätä. Kukwe meden meden raba konkrekasion dimike bäri ye mikai gare kwe.

KUKWE ÜTIÄTE BIBLIABÄTÄ

3. Kukwe kädriedre (minuto 10). Kukwe ja jie ngwankäre gätäte yebätä kukwe kädriedre kädekata ño ye tä mikani aune kukwe ketebu o ketamä ütiäte krubäte ye tä mikani arato. Ni umbre ji ngwanka o siervo ministerial ie kukwe gare käkwe kukwe ne kädriedre. Tärä Bibliabätä ye kenabätä ñäkädre ngwane, video mikadre tuare kömikakäre. Ni kukwe kädriekä raba blite kukwe ruäre tädre video yete yebätä, akwa kukwe ütiäte mikani Kukwe ja jie ngwankäre gätäte yebätä ye mikadre gare kwe. Üai mikani ye kukwe mikakäre gare bäri aune blita rababätä kä tädre nie ngwane. Kukwe mada mika raba gare dre kädrieta mika tö rabadre gare bäri kwin ngwane.

4. Perla ükani känändre (minuto 10). Kukwe ngwandretari aune nitre käkwe mikadre gare aune ñaka kukwe niedre kömikakäre aune mikakäre krüte. Ni umbre ji ngwanka o siervo ministerial ie kukwe gare käkwe nuaindre. Kukwe ketebu ngwantarita ye ni kukwe kädriekä käkwe ngwandretari. Texto tä mikani yebätä ñäkädre o ñakare ye tä gare ie. Ja mräkätre rabadre kukwe niere minuto ötare o bäri chi.

5. Ñäkätä Bibliabätä (minuto 4). Ja mräkä iti käkwe ne nuaindre. Texto meden dianinkä ye ererebätä ñäkädre kwe aune ñaka rabadre kukwe niere kömikakäre aune mikakäre krüte. Ni gätä jie ngwanka käkwe ja mräkätre ñäkäkä Bibliabätä ye dimikadre ne kwe, kukwe nüke gare ietre ye erere ja kukwei mikadre kwetre, kukwe tikani yebätä ñäkädre metre kwetre, kukwei gitiadrekä merebe, blitadre metre ja kukweibiti kwetre, medente ja kukwei mikadre nünenkä aune kukwe meden niedre bäri ja dibiti ye erere nuaindre kwetre. Ñäkäta Bibliabätä ye ruäre bäri nga mada ye kräke, yebätä ni kukwe ükatekä gätä Nita Dirire aune Ja Ngwen Ño ye kräke yekwe mikai gare kwin jai ne kwe nire ie raba kukwe ye bien ñäkäkäre ye rabai gare ie.

DIRIDRE BÄRI KWIN

6. Minuto quince. Sección ne ükaninte ne kwe ni jökrä käkwe ja kitadre kukwe driekäre bäri kwin aune nitre tötikakäre bäri kwin. Ruäre ngwane ni umbre ji ngwanka raba asignación diridre bäri kwin ye bien. Ni ja tötikata yekwe ja kitadre täräkwata diridre kwin o Ja tare ye bämikadre tä mikani täräkwata Nita Dirire Aune Ja Ngwen Ño yebätä ye erere. Bämän ruäre kräke kukwe ükaninte ne kwe ni umbre ji ngwanka o siervo ministerial käkwe kädriedre (Kukwe kädriedre ño nitre ja ükaninkrö yebe yekäre párrafo 15 ye mikadre ñärärä).

7. Blita kömikakäre. Ja eteba o ja ngwai käkwe kukwe ne bämikadre. Ja eteba rabadre kukwe bämike ja eteba madabe aune ja ngwai, ja ngwai madabe o mräkä kwe ye ben. Niaratre nibu ye raba nemen täkäni tibien o nünaninkä krö. (Kukwe mikakäre gare bäri jai, Kukwebätä blitai o Kukwe drie raba ño, párrafo 12 aune 13 mikadre ñärärä).

8. Ni tuadrebitita. Ja eteba o ja ngwai käkwe kukwe ne bämikadre. Ja eteba rabadre kukwe bämike ja eteba madabe aune ja ngwai, ja ngwai madabe (km-S 5/97 pág. 2). Niaratre nibu ye raba nemen täkäni tibien o nünaninkä krö. Ni gwi ben blitabare kena ye törbadre kukwe mikai gare bäri jai ye tuadrebitita ngwane, dre niedre ye ja mräkä o ja ngwai käkwe bämikadre. (Kukwe mikakäre gare bäri jai, Kukwebätä blitai o Kukwe drie raba ño, párrafo 12 aune 13 mikadre ñärärä).

9. Nitre tötikadre. Ja eteba o ja ngwai käkwe kukwe ne bämikadre. Ja eteba rabadre kukwe bämike ja eteba madabe aune ja ngwai, ja ngwai madabe o mräkä kwe ye ben (km-S 5/97 pág. 2). Niaratre nibu ye raba nemen täkäni tibien o nünaninkä krö. Ja tötika kömikanina ye kwrere kukwe ne bämikadre. Ni kukwe bämikaka ye ñaka rabadre kukwe niere blita kömikakäre aune mikakäre krüte, akwa ribedre ie ye aibe ngwane rabadre nuainne. Ñäkädre párrafo jökräbätä ye ribe ñaka, akwa nuain raba.

10. Dre mikata täte ye driedre. Diridre bäri kwin yekänti kukwe kädriedre nieta ngwane ni brare rabadre kukwe ne kädriere. Kukwe bämikadre nieta ngwane, ja eteba o ja ngwai raba kukwe ne bämike. Ja eteba rabadre kukwe bämike ja eteba madabe aune ja ngwai, ja ngwai madabe o mräkä kwe ye ben. Ni kukwe driekä käkwe kukwe ne kädriedre ngwane rabadre mike gare kwin aune mrebe, mikani referenciabätä ye erere. Referencia ye kädekadrete o ñakare ye tä gare ni kukwe kädriekä yei.

11. Kukwe kädriedre. Ja mräkä brare iti käkwe kukwe ne kädriedre. Kukwe dianinkä täräkwata Ja tare ye bämikadre yebätä ngwane ni ja tötikaka rabadre mike gare kukwe drie raba ño bersikulo ruäre yebiti. Ñodre, bersikulo ye dre gärätä, ñongwane kukwe driedrebiti o ñongwane blitadre bersikulo yebätä nitre ben ye rabadre mike gare. Täräkwata yebätä kukwe ja tötikara diandrekä ngwane, kukwe driere ño bersikulo yebiti yebätä ni ja tötikaka rabadre blite. Kukwe ruäre kädekateta täräkwata Ja tare ye bämikadre yebätä ye rabadre tuin ütiäte ie ngwane kukwe ja tötikara 1 yebätä raba kukwe mike gare bäri.

12. Kukwe bämikadre ño. Kukwe mikata gare nete aune párrafo mada kite jiebiti ne tä blite, “Blita kömikakäre” aune “Ni tuadrebitita” yebätä. Kukwe mada mika ñan gare nie ngwane, ni kukwe driekä töi täi kwatibe kukwe metre Bibliabätä ye mikai gare ni ye dimikakäre aune kukwe mikadrete blitakäre köbö mada ngwane bätä. Dre tä nemen bäre kä yekänti aune tä nitre mike töbike yebätä ni ja tötikaka käkwe ja töi mikadre blite. Video mikadre tuare o täräkwata dirikäre bäri kwin ye biandre o ñakare ye tä gare ni kukwe driekä ie. Drebätä nikwe blitadre nitre ben ye mikadre gare ja töibiti ja näre bäri kwin, dre ribeta blitakäre töi jämebiti aune ja töi mikadre nitre madabätä yebätä ja kitadre.

13. Kukwe drie raba ño. Kukwe tä mikani jatäri nebätä ni ja tötikaka blitadre ngwane, kukwe driere ño ni käite yebätä blitadre kwe. Ñodre:

(1) Ju Ju te. Nita niken nitre gwirete kukwe driere (blitata ngwärere nitre ben, celularebiti o carta yebiti) aune biti nikwe nitre tuadrebitita nikwe nuainbare ño käne miri gare nete yebätä ye arato.
(2) Kukwe driedre kä jökrä ngwane. Ye abokän nita medente erere blite nitre ben akwa ni raba kukwe driere ie, ni ñan tä niken kukwe driekäre yebiti ta, ñodre nikwe ñäkädre texto keteitibätä, nitre tä sribere nibe, tä kwelate, nitre tä nüne ni bäre yebe nikwe blitadre arato nita niken carrote o kä mada ngwane ni raba kukwe driere.
(3) kukwe driedre nitre okwäbiti. Ne abokän kukwe drieta carritobiti, jondron rürübäinta yekänti, ji ngrabare, parquete, estacionaminto carro kräke yete o kä mada känti nitre tä yekänti.

14. Video aune täräkwata yebiti kukwe driedre Ni ja tötikaka tä kukwe driere ño ye ererebätä, video mikadre tuare kwe o täräkwata biandre ye tä gare ie. Kukwe bämikadre yete video tärä keteiti o ni ni tötikaka tö rabadre blitai bätä ngwane raba video ye mike gare akwa ñaka mikadre tuare.

NITA JA NGWEN ÑO

15. Sección ne kömikadre kantiko yebiti. Minuto 15 te kukwe kädriei keteiti o ketebu nitre ja ükaninkrö dimikakäre Kukwe Ngöbökwe tä dre niere ye erere nuainne. Kukwe mada nie ñaka ngwane, ni umbre ji ngwanka o siervo ministerial ie kukwe gare käkwe kädriedre, akwa kukwe niedre konkrekasion kräke ye ni umbre ji ngwanka aibe käkwe kädriedre. Kukwe kädriedre nitre ja ükaninkrö yebe ngwane, kukwe mada ngwantari raba, kukwe ngwandretari mikani yete ye ñan aibe ngwandretari. Blita kömikakäre ñan kukwe niedre krubäte ne kwe kä tädre kukwe ütiäte ye mikakäre gare aune nitre kukwe mikadre gare. Kukwe ngwandretari ni iti ie ngwane ñan rabadre täkäni tibien ja täte bäri kwin rikadre plataforma yekänti raba ngwane.

16. Ja tötika Bibliabätä konkrekasionte (minuto 30). Ni umbre ji ngwanka ie kukwe gare käkwe ne jie ngwandre (nitre umbre ji ngwanka ñaka krubäte ngwane, siervo ministerial ie kukwe gare mika raba jie ngwen). Nire nire raba ja tötika ne jie ngwen ye nitre umbre ji ngwanka käkwe diandrekä. Ja mräkätre ye rabadre ja tötika mike krüte minuto ükaninte nuäi ye ererebätä, texto meden bäri ütiäte yebätä rabadre ñäkämana aune kukwebätä ja tötikadre ye ñobätä ütiäte ni kräke ye nitre dimikadre kwetre mike nüke gare jai. Rabadre kwin yekäre ja kita raba sección kukwe ngwantarita aune kukwe mikata gare yebätä (w23.04 pág. 24 aune recuadro). Kukwe dianinkä ye kädriedre kwin jökrä ngwane, ñan ja töibikadre mike krüte minuto 30 yete. Raba ngwane, bämän kratire kratire ni jene jene rabadre ja tötika Bibliabätä jie ngwen aune ni jene jene rabadre ñäke parrafobätä. Ja tötika ye nuaindre bäri jötrö ye ni gätä jie ngwanka käkwe ribedre ngwane, ni ja tötika jie ngwanka käkwe nuaindre ño ye tä gare ie. Ñodre, párrafo ruäre yebätä ñaka ñäkädre.

KUKWE NIEDRE MRÄ

17. Minuto tres. Kukwe meden bäri ütiäte kädriei gätäte ye ni gätä jie ngwanka käkwe ngwandreta törö. Arato kukwe meden kädriei gätä madate ye rabadre niere nitre töi mikakärebätä. Kä rabadrete ngwane, nire nire käkwe kukwe bämikadre bämän madate ye raba kädekete. Kukwe mada nie ñaka ngwane, kukwe nieta mrä nekänti kukwe bäri ütiäte ye mika raba gare o tärä juanta konkrekasion kräke yebätä ni gätä jie ngwanka rabadre ñäke. Akwa kukwe driei medente, ora nuäi aune nire nire rabadre kä ükete Ju Ja Ükarakrö yete ye ñaka mikadre gare plataforma yekänti, ñakare aune mikadre tablerobätä. Kä ñaka rabadrete krubäte ñäkäkäre tärä juanta yebätä o kukwe bäri ütiäte ye mikakäre gare ngwane, ja mräkätre tä kukwe kädriere sección “Nita ja ngwen ño” yete ye rabadre kukwe kädriere bäri minuto braibe te ye ni gätä jie ngwanka käkwe ribedre ietre (párrafo 16 aune 19 mikadre ñärärä). Gätä mikadre krüte kantiko aune orasion yebiti.

KUKWE NIEDRE NI DIMIKAKÄRE

18. Kukwe biani kädriedre nitre kukwe bämikaka ie ye keteitire keteitire kädriedre kwetre ye bitikäre, ni gätä jie ngwanka käkwe kukwe kwin niedre ietre dimikakäre kukwe ja tötikara medenbätä tä ja kite yebätä minuto krati näre. Ni gätä jie ngwanka käkwe ni kukwe bämikaka kädekadrete ngwane, kukwe medenbätä tä ja kite ye ñaka niedre kwe. Ni kukwe bämikaka kukwe kädriedre ünä ngwane, ni gätä jie ngwanka käkwe kukwe kwin niedre ie aune tä ja kite kukwe medenbätä ye raba kädekete aune ñobätä nuainbare kwin kwe ye raba mike gare, o ñobätä rabadre nuainne bäri kwin aune raba nuainne ño ye raba niere töi kwinbiti ie. Arato kukwe bämikadre yebätä ni gätä jie ngwanka ye raba kukwe mada niere ni kukwe bämikaka o nitre ja ükaninkrö dimikakäre. Gätä ye bitikäre o köbö mada ngwane, ni kukwe bämikaka dimikadre bäri ye ererebätä kukwe ütiäte nie raba ie täräkwata Ja tare ye bämikadre, Diridre kwin o tärä Benefíciese yebiti, kukwe medenbätä mikani ja kite ye ererebätä o kukwe madabätä (ni gätä jie ngwanka gätä Nita Dirire aune Ja Ngwen Ño kräke aune ni mäträkä ye kisete sribi meden tä ye mikadre ñärärä párrafo 19, 24 aune 25 yebätä).

MINUTO BIANTA

19. Ñaka kukwe niedre minuto bianta kukwe kädriekäre yebiti ta (ni gätä jie ngwanka arato). Gätä Nita Dirire Aune Ja Ngwen Ño yebätä minuto tä mikani kukwe kädriekäre, akwa kukwe meden niedre ye niedre ünä ngwane ñan ja töi mikadre kukwe niere minuto täte. Ni kukwe kädriekä yebiti minuto rikadre bäri ta ngwane, ni gätä jie ngwanka o ni mäträkä yekwe blitadre ben akwa ñaka nuaindre kwe ni kwati okwäbiti (párrafo 24 aune 25 mikadre ñärärä). Gätä ye jökrä rabadre bare, kantiko aune orasion yebe ngöi ora krati aune minuto 45 te.

NI CIRCUITO TUABITIKÄ TÄ KONKREKASION TUINBITI

20. Ni circuito tuabitikä konkrekasion tuadrebiti ye ngwane, kukwe ükaninte Kukwe ja jie ngwankäre gätäte ye erere nuaindre akwa kukwe ruäre kwitadre. “Ja tötika Bibliabätä konkrekasionte” ye täte ni circuito tuabitikä kukwe kädriedre konkrekasion kräke minuto 30 te. Ye känenkri, kukwe kädriedre gätäte ye ni gätä jie ngwanka käkwe ngwandreta törö, dre kädriei bämän madate ye niedre kwe, kukwe bäri ütiäte ye mikadre gare kwe aune tärä juanta yebätä ñäkädre kwe, biti ni circuito tuabitikä ye kärädre kwe kukwe kädriere. Ni circuito tuabitikä kukwe kädriedre ye bitikäre, kantiko dianinkä kwe yebiti gätä mikadre krüte kwe. Niara raba ja mräkä iti nübaire orasion nuainne. Ni circuito tuabitikä konkrekasion tuadrebiti ye ngwane, ñaka kukwe kädriedre sala madate. Akwa nitre ja ükakrökä braibe blite kukwe madabiti ye raba gätä kwetre ye nuainne. Akwa, niaratre jökrä rikadreta sala kri yete ni circuito tuabitikä kukwe kädriedre ye kukwe nuakäre.

BÄMÄNBÄTÄ GÄTÄ KRI NUAINTA

21. Gätä kri nuainta ye ngwane, bämän yebätä gätä ñaka nuaindre konkrekasionte. Kukwe ükaninte kädriedre bämän yebätä konkrekasionte ye ja mräkätre aune ja ngwaitre rabadre ja tötike kaibe o mräkätre kwe yebe gwi mikadre gare ie.

JESÚS JA NIRE BIANI NGWANTA TÖRÖ JAI YE NGWANE

22. Jesús ja nire biani ngwandre törö jai bämän ngrabare ngwane, gätä Nita Dirire aune Ja Ngwen Ño ye ñaka nuain.

NI KUKWE ÜKATEKÄ GÄTÄ NITA DIRIRE AUNE JA NGWEN ÑO YE KRÄKE

23. Ye nitre umbre ji ngwanka tä denkä. Niara rabadre kukwe ükete kwin aune gätä nuaindre ño nieta nete ye erere rabadre bare ye tä gare ie. Rabadre blite käre ni mäträkä yebe. Kukwe ja jie ngwankäre gätäte sö krobu mada kräke rükadre ngwane, rabadre nitre denkä kukwe kädriekäre sö ye kräke, ñodre: Dirire bäri kwin yekänti kukwe bämikata, kukwe mada kädrieta, aune nirekwe gätä jie ngwain ye rabadre ükete, akwa mrä ketebu ne abokän nitre umbre ji ngwankakwe ja mräkätre dianinkä yekwe nuaindre (párrafo 3-16 aune 24 mikadre ñärärä). Asignación biandre ja ngwai o ja eteba ie n ngwane, kä kwäbebiti aune kukwe gare nuäi ie aune raba blite kukwe yebätä o ñakare ye mikadre gare kwin jai. Asignación jökrä ye biandre bämä krämä gätä nuain jämi ye känenkri. Täräkwata chi Gätä Nita Dirire aune Ja Ngwen Ño yete kukwe kädriedre (S-89) ye biandre nitre kukwe bämikaka o kukwe kädriekäre ye ie. Tablero anuncio kräke yete tädre mikani arato mikadre gare kwin kwe jai. Ni umbre ji ngwanka raba siervo ministerial iti kädeke ni umbre dimikakäre, asignación dirire bäri kwin kräke ye ni siervo ministerial raba bien ja mräkätre ie; akwa asignación mada ye nitre umbre ji ngwanka aibe raba nuainne.

NI GÄTÄ NITA DIRIRE AUNE JA NGWEN ÑO JIE NGWANKA

24. Bämän kratire kratire, ni umbre ji ngwanka ye iti käkwe gätä ne jie ngwandre (ni umbre ji ngwanka konkrekasionte ye ñaka krubäte ngwane, nitre sribikä konkrekasionte ie kukwe gare ye mika raba nuainne arato). Ni gätä jie ngwanka rabadre kukwe ükete niedre gätä kömikakäre aune mikakäre krüte. Kukwe meden kädriedre ye jökrä rabadre mike gare aune nitre ji ngwanka ñaka krubäte ngwane, rabadre kukwe ruäre kädriere arato. Nitre mada kukwe kädriekä kädekadrete kwe ye ngwane, rabadre blite jötrö. Nitre umbre ji ngwanka meden meden raba gätä ne jie ngwen ye niaratre ara käkwe diandrekä. Nitre umbre ji ngwanka meden meden dianinkä gätä ne jie ngwankäre ye itire itire rabadre nuainne bämän kratire kratire. Ruäre ngwane, ni kukwe ükatekä gätä Nita Dirire aune Ja Ngwen Ño kräke ye käkwe gätä ne jie ngwain bäri bä kabre nitre umbre ji ngwanka mada dianinkä ye kräke. Ni umbre ji ngwanka raba “Ja tötika Bibliabätä konkrekasionte” ye jie ngwen ngwane, raba gätä ne jie ngwen arato. Akwa, kukwe ne ngwandre törö jai, ni umbre ji ngwanka käkwe gätä jie ngwandre ye rabadre kukwe niere töi jämebiti nitre kukwe bämikaka ie aune rabadre kukwe ütiäte niere niaratre dimikakäre tädre ribere jai ye ngwane. Gätä mikadre krüte ora kitani ye näre te ye tä gare ie arato (párrafo 17 aune 19 mikadre ñärärä). Kä tärä plataforma yekänti aune ni gätä jie ngwanka törbadre ngwane, micrófono mada mika raba yete ne kwe niara tädre nitre kukwe kädriekä itire itire kädekete ye ngwane, nitre kukwe kädriekä käkwe ja ükadrete atril yekänti. Arato, ñäkädre Bibliabätä aune sección “Diridre bäri kwin” kädriedre ye ngwane, mesa aune täkärä mika raba plataforma yekänti ni gätä jie ngwanka kräke ne kwe minuto ñaka rikadre ngwarbe ta.

NI MÄTRÄKÄ

25. Raba ngwane, bäri kwin ni umbre ji ngwanka ie kukwe kädrie gare kwin ye diandrekä sribi ne nuainkäre. Rabadre tuin nuaindre ie ngwane, nitre umbre ji ngwanka aune nitre sribikä konkrekasionte tä kukwe kädriere gätä Nita Dirire aune Ja Ngwen Ño yete, tä kukwe kädriere nitre jökrä kräke aune tä Ja tötika Ni Mikaka Mokre o “Ja tötika Bibliabätä konkrekasionte” jie ngwen o tä ñäke täräbätä, yebätä niarakwe mäträdre akwa ñan nitre mada okwäbiti (párrafo 19 mikadre ñärärä). Konkrekasionte nitre umbre ji ngwanka tärä abokän ie kukwe kädrie gare aune diri gare kwin ngwane, niaratre jene jene dianka raba mäträkäre kä kwatire kwatire te. Batire batire kukwe kädriedre ye ngwane, niarakwe mäträdre nitre kukwe kädriekä yebätä ye ribe ñaka ie.

SALA MADA

26. Nitre kukwe bämikaka ye tä nibe ye ererebätä kukwe ükate raba kukwe kädriekäre sala mada mada yete. Sala kwatire kwatire yete ni mäträkä ie kukwe gare mikadre jie ngwen, metrere ni umbre ji ngwanka rabadre nuainne. Ribedre ngwane, siervo ministerial ie kukwe gare mika raba sribi ye nuainne. Nire nire rabadre ji ngwen aune ni jene jene mikadre bämän kratire kratire sribi ye nuainkäre o ñakare ye tä gare nitre umbre ji ngwanka ie. Párrafo 18 yekänti kukwe nieta ye erere ni mäträkä rabadre nuainne. “Perla ükani känändre” tä sección “Kukwe ütiäte Bibliabätä” yekänti kädriedre ye bitikäre, nitre kukwe bämikaka ye rikadre sala mada yete ye ribedre ietre. Sección “Diridre bäri kwin” krütadre ye bitikäre niaratre jatadreta sala kri yete.

VIDEO

27. Gätä Nita Dirire aune Ja Ngwen Ño yete video ruäre mikadre tuare, abokän tä JW Library® yete celular, computadora o tableta kräke.

S-38-NGB 11/23