¿Ñobätä oradre Jesús käbiti?

JESÚS blitabare käre oración yebätä. Nitre judío ji ngwanka kukwebätä nämänentre käre rezare “ji kribiti”. ¿Ñokäre nämäne nuainne? Ne kwe “ni jökrä käkwe tuadre”. Nämäne Ngöbö mike täte metre rabadre ruin nitre madai yekäre. Nitre ye bäsi jökrä nämäne orare nga aune kukwe arabe niere bä kabre, oradre kore ne kwe Ngöbökwe ni kukwe nuadre kwrere (Mateo 6:5-8). Oradre ye kwrere ye ngwarbe driebare Jesukwe, yebiti nitre töi bökän ye dimikani kwe orare kwin. Akwa ño ñaka oradre ye ñan aibe driebare jerekäbe kwe.

Nikwe orare ngwane ni tö Ngöbö kä mikai deme ye bämikadre, Gobran kwe kärädre aune töi rabadre bare ye nikwe ribedre driebare Jesukwe. Arato ni raba orare kwe nikwe yebätä Ngöböi driebare kwe (Mateo 6:9-13; Lucas 11:2-4). Jehovakwe ni kukwe nuadre ie ni tö ngwane, kä ngwandre nüke jai, tödeka aune ja töi mikadre bobre ye nita ribere jai ye driebare kwe kukwe bämikani kwe yebiti (Lucas 11:5-13; 18:1-14). Aune kukwe driebare kwe ye mikakäre gare bäri kwin niarakwe kukwe kwin bämikani kukwe yekänti (Mateo 14:23; Marcos 1:35).

Kukwe ne kwe käkwe nitre ja tötikaka Jesukwe ye dimikani orare bäri kwin gare metre nie. Kukwe jökräbiti ta, Jesús murie keta jämi ngwane mrä deu kukwe ütiäte ja töi kräke driebare kwe orasion yebätä.

“Kukwe mada mrä aune ütiäte mikani gare oración yebätä”

Dibire ta Jesukwe nitre apóstol kwe ja ngwanka metre ye dimikani. Ye näire kä namani kwin krubäte kukwe mada mrä ütiäte mikakäre gare ietre. Ti abokän ji, kukwe metre aune ja nire. Ti köböire ni raba nökrö ti Rün ken. Ye bitikäre kukwe kwin käbämikani kwe ietre: “Mun tö raba dre dre käräi ti Rünye ti käbti, ye abko tikwe nuendi mun kräke, ye köböire ti Rün di kri bä nuäre rabadre mikani ütiäte kri ti Ngöbö Odei köböire, abkokäre tikwe nuendi mun kräke”. Biti mrä mada niebare kwe ietre: “Mun jataba ja töitike tibe kena abti kä nüke mtare mun ngämi jändrän kärere jire chi ti Rünye ti käbti, akwa mtare mentokwäre munkwe jändrän kärä ie ti käbti angwane, biandi kwe munye. Yebtä kä nuäre rabadi täte jökrä munbtä” (Juan 14:6, 13, 14; 16:24).

¡Kukwe kwin krubäte mikani gare! Ye abokän “kukwe mada mrä aune ütiäte mikani gare oración yebätä” nieta Diccionario keteitikwe. Yete ja känenkäre Jesús aibe ie oradre aune ñaka oradre Ngöbö ye ñan ai gäräbare kwe. Ñakare aune bäri kwin kukwe mada mrä yebiti ni rökradre Ngöbö Jehová ken.

Metrere Ngöbö käre tä oración nitre niara mikaka täte metre yekwe kukwe nuin (1 Samuel 1:9-19; Salmo 65:2). Akwa, Ngöbökwe kukwe ükaninte juta Israel ben ngwane, nire törbadre orasion jakwe kukwe nuamana ngwane, juta Israel ye dianinkä Ngöbökwe ja kräke ye rabadre mike era jai. Ye bitikäre Salomón näire, Ngöbökwe templo dianinkä jondron kukwakäre ye nitre rabadre mike era jai ribebare (Deuteronomio 9:29; 2 Crónicas 6:32, 33). Akwa, kukwe ne ñaka nuainbare käre. Apóstol Pablo tikani erere kukwe biani juta Israel ie aune jondron kukwa nämäne templote ye abokän jondron bäri kwin jatadre Kristo köböire abokän bämika nämäne akwa “jondron ye kukwe bä mika nämäne jerekäbe aune ñakare erametre” (Hebreos 10:1, 2). Kukwe bämikani ye ja käne namani rabakäre bare metre (Colosenses 2:17). Yebätä kä 33 yete ja känenkäre ja ketadre Jehovabe ye nuain ñan niena kukwe biani Moisés ie yebiti. Kukwe biani ye kä nämäne bämike Jesukristo kukwei mikadre täte (Juan 15:14-16; Gálatas 3:24, 25).

Ni kädekani bäri ütiäte ni mada kädekata yebiti ta

Jesús kukwe kwin kömikani ne kwe ni rabadre nökrö Jehová ken. Ñodre, ja ketamuko dite krubäte tä ji tike ni käne ne kwe Ngöbökwe ni kukwe nuadre aune mikadre bare ni kräke kwe ye kwrere Jesukwe ja bä mikani. ¿Ñö köböire ne raba nemen bare Jesús ie?

Metrere ni jökrä tä därere ngite yebätä dre dre ni raba nuainne o bien Ngöböi akwa ñaka raba ngite denkä nibätä aune ni ñaka raba ja kete Jehová Ngöbö deme yebe (Romanos 3:20, 24; Hebreos 1:3, 4). Akwa, Jesukwe ngite ye dianinkä nibätä ja nire metre biani kwe ye ngwane (Romanos 5:12, 18, 19). Ye köböire nire nire tö ngwane raba nemen töi kwinbiti Jehová ngwärekri aune blite kwin ben. Akwa käne rabadre tödeke Jesús ja nire biani yei aune oradre niara käbiti (Efesios 3:11, 12).

Nita orare Jesús käbiti ngwane kukwe ketamä tä nuainne yei nita tödeke nita bämike: 1) Niara ye Cordero Ngöbökwe, ja nire biani kwe ye köböire ngite kita raba nibiti ta. 2) Jehovakwe ganinkröta bitikäre tä “sacerdote bäri kri” ni kökatarikäre. 3) Niara ye aibe ji kwrere ni mikakäre nökrö Jehová ken oración yebiti (Juan 1:29; 14:6; Hebreos 4:14, 15).

Nita orare käbiti ngwane nita Jesús mike ütiäte jai. Ne kwin krubäte ñobätä ñan aune ye erere Ie Jehová tö, Jesús käbiti jondron jökrä rabadre ngudokwäbiti, aune tidrä jökrä käkwe niedre ni jökrä ngwärekri jesukristo ye üitäte kri Rün Ngöbökwe (Filipenses 2:10, 11). Akwa bäri ütiäte nikwe oradre Jesús käbiti, ye tä Jehová käikitekä ñobätä ñan aune Monso kwe biani kwe ni ütiäte (Juan 3:16).

Sribi ütiäte nuainta Jesukwe rabadre gare nie yekäre Biblia tä kädeke kukwe jene jenebiti. Jesukwe kukwe nuainbare ye köböire kukwe keta kabre kwin tä nemen bare ni kräke, tä nuainne aune nuaindi kwe ja känenkäre ye kukwe jökrä ye tä ni dimike mike nüke gare jai (recuadro “Sribi ütiäte nuainta Jesukwe,). Ye medenbätä, Jesús kädekani bäri ütiäte ni jökräbiti ta ye abokän nie raba kä kwin aune kä tibien ye jökrä mikani kisete (Filipenses 2:9; Mateo 28:18).a

Ñan kukwe arabe niedre jerekäbe

Nikwe miri gare jai erere, nikwe oradre Jesús käbiti ne kwe Jehová käkwe ni kukwe nuadre (Juan 14:13, 14). “Tita kärere Jesús käbiti” nita niere ye ñan niedre jerekäbe ie ni ñaka tö. ¿Ñobätä ñakare?

Kukwe bämikata nebätä töbike. Ni iti tä tärä juen mäi angwane tärä tikani yebätä mrä yete tä kukwe ne niere “köbö kwin ti ta bien mäi”. Ni tärä tikaka tä kukwe tike ye tä nuainne bökän ja brukwä tätebiti, ¿o tä niere jerekäbe nuaindre ye ererebätä? Ye erere nita Jesús kädekete oración yete ye tädre bäri ütiäte ni kräke ni tärä tikaka yebiti ta. Nikwe oradre “käre ja brukwä tätebiti” aune ñan kukwe arabe niere jerekäbe (1 Tesalonicenses 5:17; Salmo 119:145).

¿Kukwe nieta “Jesús käbiti” ye ñobätä nikwe ñan niedre jerekäbe kukwe ngwarbe erere? ¿Ñobätä ni ñan töbiketari Kristo töi jene jene yebätä? Jesukwe dre nuainbarera ni kräke aune tö nuaindi yebätä nikwe töbikadre. Nita orare ngwane nikwe debe biandre Jehovai käikitakakäre kukwe kwin tä nuainne Ngobo kwe yebiti yebätä. Nikwe nuaindi ye erere ngwane, ye köböire ni raba nemen tö ngwen dre käbämikata Jesukwe yei: “Mun tö dreye, ye erere munkwe kärä ti Rünye ti käbti angwane, biandi jökrä kwe munye” (Juan 16:23).