“¿Ngöbö kukwe meden bäri kri mikaninte ni kräke?”

¿Dre nuaindre Ngöbö mikakäre täte? ¿Kukwe kiakia ye jökrä nikwe mikadre täte? ¡Kukwe ye erere nuain ñaka ye abokän kwin krubäte! Ngöbö Monsoi, Jesukristo, tä niere Ngöbö tä kukwe ribere nie ye mika raba gare kukwe keteitibebiti. (Mäkwe ñäkä Marcos 12:28-31 yebätä.)

Kena ani contexto yebiti kukwe mike gare jai. Köbö 11 nisán yete. Jesús murie ketadre ye köböi namanina ja ken, aune niara nämene dirire templo yete. Nitre niara rüe käkwe kukwe ngwanintari krubäte ie ne kwe niara rakadre kö okwäte ietre. Niara nämene kukwe ketare ketare mike gare ye ñaka nämene nüke gare ietre, yebätä iti käkwe ngwanintari ie: “¿Ngöbö kukwe meden bäri kri mikaninte ni kräke?” (bersikulo 28, Ngöbö Täräe [NGT], tärä okwä ükaninte).

Kukwe ñan nuäre ngwanintari. Kukwe siento krä ti biti bäri biani Ngöbökwe Moisés ie, ye meden abokän bäri ütiäte, yebätä nitre Judea ruäre nämene ñäke jai, nitre mada abokän namani niere kukwe ye jökrä ütiäte ja erebe aune ñaka keteiti aibe mikadre bäri ütiäte jai. ¿Jesukwe dre niebare?

Jesús kukwe ye mikani gare ngwane ñaka blitabare kwe kukwe keteitibebätä ñakare aune kukwe ketebubätä. Kena niebare kwe: “Ji dokwäte kri Ngöbö mäkwe taredre ja brukwä ngöi jökräbiti, ja üai [ja nire, TNM] ngöi jökräbiti, ja töi ngöi jökräbiti, arato ja di ngöi jökräbiti” (bersikulo 30, NGT; Deuteronomio 6:5). Ne tä mike gare Jehová taredre ja nire tätebiti, dre nuain gare nie aune dre tä nikwe yebiti. Tärä kukwe Bibliabätä mikakäre gare jai tä niere krörö: “Ni rabadre Ngöbö tarere täte”. Ye medenbätä, nita Ngöbö tarere angwane, ja di ngwandre täte ne kwe niarakwe ni kadre ngäbiti (1 Juan 5:3).

Ketebukäre, Jesús niebare: “Mäkwe ni mada taredre, ño mätä ja tarere akwle kwrere” (bersikulo 31, NGT; Levítico 19:18). Ni mada taredre Ngöbö yebe gwairebe: Nita Ngöbö tarere ye käkwe ni töi mikai ni mada tarere (1 Juan 4:20, 21). Nikwe ni mada taredi nita ja tarere ye erere angwane, ni tö ja ngübamana ño ye erere nikwe ni mada ye ngübai (Mateo 7:12). Nikwe ne nuaindi angwane, Ngöbökwe ni jökrä sribebare bäsi ja bä kwrere ye nita tarere nikwe bämikai (Génesis 1:26).

¿Ngöbö aune ni mada taredre niebare ye ñobätä bäri ütiäte? Jesukwe niebare: “Kukwe mada ñakare tärä kri ne ngwä” (bersikulo 31, NGT). Kukwe mada ye erere känti niarakwe niebare, kukwe mada biani nuaindre ye jökrä tä kukwe ketebu ye köböire (Mateo 22:40).

Ngöbö mikadre täte ye nuäre nuaindre. Niara tä kukwe jökrä nuainmana nie ye mika raba gare kukwe keteitibebiti: ja tare. Kukwe ne tä käre aune rabai jankunu Ngöbö mikakäre täte. Akwa ja taredre ye ñan niedre kukwere o ja bämikadre jerekäbe, ñakare aune kukwe nuaindre yebiti bämikadre (1 Juan 3:18). ¿Jehová, “Ngöbö abko ni tarekä” yei mä raba bämike ño ye mä törba mikai gare jai? (1 Juan 4:8.)