¿Ñobätä nitre ruäre tä niere Ngöbö ye ni mikaka ja tare nike?

¿KUKWE ngwantarita tärä kwatabätä kena ye ñaka mate kwin mäbätä? Nitre kwati kräke nemen ye erere. Akwa, nitre kwati bäri tä kukwe ye ngwentari jai o Ngöbö ye ni mikaka ja tare nike tätre niere.

Nitre ruäre tä nemente nire dobo kri o kukwe mada tare tä nakainkä yete ye tä kukwe ne ngwentari jai: “¿Ñobätä Ngöböta kukwe ne tuenmetre nakainkä? ¿Ni ñaka niena ütiäte kräke? ¿Niara ye ni mikaka ja tare nike?”.

Kukwe namani bare kirabe tikani Bibliabätä abokänbätä nitre ruäre tä ñäke ye ñaka tä mate kwin bätätre, ñodre, Ñü Kri näkäni tibien Noé näire. Niaratre tä ngwentari jai: “¿Ngöbö ni tarekä se ño mada nitre kwati murie ketani kwe? ¿Niara ni mikaka ja tare nike yebätä nuainbare kwe?”

¿Mäkwe kukwe ye erere ngwantaribarera jai? ¿Ngöbö ye ni mikaka ja tare nike nitre tä ngwentari jai abokän ie kukwe ye mikadre gare ño ye ñaka tä nemen gare mäi? Ye erere tä nemen bare mäbätä o ñakare akwa, kukwe nieta ja känenkäre nebätä mäkwe ja tötikai ye rabai ütiäte mä kräke.

¿NI MADA MIKATA JA TARE NIKE YE ÑOBÄTÄ TUIN KÄME NIE?

Ni töita ye erere, ñobätä ñan aune ni töi tärä kukwe meden kwin aune kukwe meden käme ye mikakäre nüke gare jai, akwa jondron nire ye ñaka ni erere, ñobätä ñan aune Ngöbökwe ni sribebare “ja [bä] kwrere” (Génesis 1:27, Jändrän Kena). Ye abokän kukwe meden kwin aune kukwe meden käme niara kräke ye erere rabadre gare nie kräke ni töi mikani kwe, niara töi ño aune ja ngwandre ño kräke kukwe ükaninte kwe. Ni mada mikata ja tare nike ye ñaka tä nemen kwin ni kräke, aune Ngöbö kräke bäri ñaka tä nemen kwin jire.

Kukwe metre miri gare ne erere Ngöböta mike gare jabätä Biblia yebiti: “Ji tikwe bäri mente kwin ji munkwe ye kräke, aune ti töi bäri kri mun töi ye kräke” (Isaías 55:9). Ngöbö ye ni mikaka ja tare nike nikwe niedre angwane, ni tädre kukwe ne erere niere: ji nikwe ye bäri mente kwin niarakwe ye kräke. Ne madakäre, ja töi mikadre ye erere känenkri kukwe ye mikadre gare bäri kwin jai. Ñobätä kukwe ruäre nuainta Ngöbökwe ye tä nemen tuin käme krubäte nie ye ni rabadre ngwentari jai aune nikwe ñaka niara ye ni mike ja tare nike o ñakare ye ngwandretari jai. Ni ni mada mike ja tare nike ye dre gärätä ani mike gare jai.

Ni ni mada mikaka ja tare nike nieta nikwe angwane nita ñäke ni ye töi rüere. Ni ni mada mikaka ja tare nike ye tä ni mada mike ja tare nike ye ngwane käita nemen jutobätä o tä tuin ja tare nike ye ngwane ñaka tä nemen tuin bobre ie. Ñodre, ni rüne tä monso tö den ñobätä ñan aune tö tuai ulire, ye ngwane niara ye käme. Akwa ye nuaindre kwe monso kwe ye tötikakäre o kriemikakäre angwane, niara ye töi kwin. Nita dre nuainne yebätä drekebe ngwarbe ni mada raba töbike blo, ye erere töbikabarera blo mäbätä angwane, kukwe nieta ne metre ye namani gare kwin mäi.

Kukwe ketebu kädrite kena yebätä ani kukwe mike gare bäri kwin jai abokän tä nitre mike töbike Ngöbö ye ni mikaka ja tare nike: dobo kri aune kukwe mada tare ben nita ja tuin aune Ngöbökwe nitre mikani ja ngie nuin abokän tikani Bibliabätä. ¿Kukwe namani bare tikani Bibliabätä ye tä mike gare nie Ngöbö ye ni mikaka ja tare nike?