Nitre ñaka ni jökrä kain ngäbiti, ye kukwe kri tä kä jökräbiti tibien

JONATHAN, ni nünanka Estados Unidos abokän rün aune meye nünanka Corea, niara ye nämene chi ngwane nitre nämene ja rüere ben. Namani kri ye ngwane, nikani kä madakänti ne kwe ñaka mikadre tuin ngwarbe jai bä o kwata bä jene yebätä. Ja tötikabare kwe kräkäbätä aune nikani nüne kä ngwitärikri juta Alaska (Estados Unidos) yekänti, yete nitre kwati niara bä erere kräkäimika nämene kwe. Nitre ñaka ni jökrä kain ngäbiti ye ngätäite nämene nüne yebätä ngitiani kä Ártico yekänti ne kwe rabadre nüne nitre töi jäme ngätäite namani nütüre.

Meri bati kä 25 biti nämene bren krubäte yebätä kä ñan nämene ruinbiti abokän kräkäi mika nämene kwe ye ngwane, tö nämene nünain ye erere ñaka namani bare kräke. Kä nükaninta ruin meri yebiti angwane, Jonathan jutuabare ie ye ngwane, ñäkäbare käme kwe ie. ¿Ñobätä? Ñobätä ñan aune brukwä nämene nitre Corea kräke. Kukwe tare namani bare Jonathan yebätä yekwe mikani gare ie ja di ngwani kwe ngitie nitre ni mada mike tuin ngwarbe jai ngänikaire ye ñaka namani bare ie.

Kukwe namani bare Jonathan yebätä ye tä kukwe tare tä nakainkä mike gare metre: kä jökräbiti tibien nitre ñaka ni jökrä kain ngäbiti. Nitre tä nüne ye jökrä känti nitre ñaka ni jökrä kain ngäbiti.

Kä jökräbiti tibien nitre ñaka ni jökrä kain ngäbiti, akwa nitre jökrä bäsi ie kukwe ye tuin käme. ¡Nitre ye töi ñaka tä ja erebe! ¿Kukwe tuin käme krubäte se ñobätä mada nitre kwati krubäte töita ye erere? Erametre nitre ñaka ni jökrä kain ngäbiti ye tuin käme nitre kwati ie, akwa niaratre arabe töita ye erere ñaka gare jabätä ietre. ¿Mä töita ye erere?

NI JÖKRÄ ÑAKA NI MADA KAIN NGÄBITI

Nitre ñaka ni jökrä kain ngäbiti ye erere ni töi tärä ye ñaka nuäre rükadre gare jabätä nie. ¿Ñobätä? Biblia tä mike gare: “Ni brukwä ye bäri ni ngökö jondron mada yebiti ta” (Jeremías 17:9). Erametre, nitre jökrä tuin ütiäte nie ye ni raba nütüre o kukwe metrebätä ni töi ñaka kwin nitre ruäre kräke raba nemen ruin nie.

Nitre ñaka ni jökrä kain ngäbiti ye erere ni töi tärä ye ñaka nuäre rükadre gare jabätä nie ye bämikakäre, töbike kukwe nebätä: mä tädre näin deu kä kaibe te ji ngrabare. Batibe monsotre nibu ñaka gare mäi jatadre mä kokwäre rabadre tuin mäi. Niaratre ye rabadre tuin dite mäi aune iti tädre jondron ngwen kisete rabadre tuin mäi.

¿Kukwe tare rabai bare mäbätä rabadre ruin mäi? Kukwe tare nuainbarera mäbätä yebätä mäkwe ja ngwain mokre, akwa, ¿ñobätä monsotre nibu ne metrere raba kukwe tare nuainne rabadre ruin mäi? Ani blite kukwe mada yebätä: ¿nitre ye kwata bä ño o blite kukwe medenbiti rabadre ruin mäi? Kukwe ngwantarita ne mäkwe mikai gare angwane, dreta mä töite ye rabai gare. Yebiti mäkwe mikai gare, mä ñaka ni jökrä kain ngäbiti, ye ririabarera mä brukwäte kukwe ruärebätä.

Nikwe blitai metre angwane, nitre ñaka ni jökrä kain ngäbiti ye erere ni jökrä töita, nikwe niedi. Kukwe keteitibätä nitre ñaka ni jökrä kain ngäbiti ye kädrieta Bibliabätä. Yete nieta: “Jondron raba tuin ni okwä yei ye aibe tuin ni kä tibienbätä ie” (1 Samuel 16:7). Ye erere, ni jökrä tä kukwe ye nuaine, ye köböite ruäre ngwane kukwe tare tä nemen bare. ¿Ni töi ñaka ni jökrä kain ngäbiti ye nikwe diainkä ja töibätä? ¿Ni jökrä rabai ni mada kain ngäbiti?