KUKWE NGWANTARITA BIBLIA YEBÄTÄ

¿Ñobätä ñaka nuäre nünandre jäme jabe kä jökräbiti tibien?

Biblia tä kukwe ketebu ütiäte mike gare. Kena, ni kä tibienbätä kukwe keta kabre kwin nuainbarera, akwa ñaka ni sribebare ja jie ngwankäre akwle. Ketebukäre abokän “ni kä jökräbti temen tä [...] Satana [...] ngoto täni”. Yebätä ni kä tibienbätä ñaka nüne jäme jabe. (Mäkwe ñäkä Jeremías 10:23 aune 1 Juan 5:19 yebätä.)

Nitre töi jabebätä aune töi jondron tuabätä bäri jakwe ye köböite nüna ñaka jäme jabe arato. Nünandre jäme jabe kä jökräbiti tibien yekäre gobran itibe rabadre gobrane kä jökräbiti tibien, gobran ye rabadre nitre tötike jondron kwin tarekäre aune nitre mada dimikakäre. (Mäkwe ñäkä Isaías 32:17 aune 48:18, 22 yebätä.)

¿Nirekwe nüna jäme jabe ye ükaite Kä tibienbätä?

Ngöbö dite krubäte yekwe gobrantre kä tibienbätä ye täte gobran itibe ükaite nitre kä tibienbätä jökrä kräke ye käbämikani kwe (Daniel 2:44). Ngöbö Monsoi Jesús täi ji dokwäre gobran yete, Biblia tä niara kädeke “Gobran kä jäme bianka”. Kukwe käme ye diainkä kwe aune nünandre ño jäme jabe ye driei kwe nitre ie. (Mäkwe ñäkä Isaías 9:6, 7 aune 11:4, 9 yebätä.)

Kä nengwane nitre kwati krubäte jie ngwanta Kristokwe aune Biblia köböire, nünandre ño jäme ni madabe ye tätre driere nitre ie. Nünandre jäme jabe kä jökräbiti tibien ye köböra nemen bare metre. (Mäkwe ñäkä Isaías 2:3, 4 aune 54:13 yebätä.)