Nitre kädekani Jehovakwe obeja ngübakäre kukwei mikadre täte

1, 2. Jehovata niere niara ni obeja ngübaka kwrere, ¿yebiti tä dre mike gare nie?

JEHOVATA niere niara ni obeja ngübaka kwrere (Ezeq. 34:11-14). Niarata ja bämike ye kwrere ye köböire niara töi ño nüke gare nie. Ni obeja ngübaka tä obeja tarere yebätä tä ngübare aune kriemike ne kwe ñaka juruaindre tare. Tä obeja jie ngwen mikä kwin kokwäre aune niken ngwena ñö ñain (Sal. 23:1, 2); tä ngübarebiti dibire rare (Luc. 2:8); tä kriemike rüe ngänikaire (1 Sam. 17:34, 35); obeja tä därere angwane tä ngwen ja kise mrökate (Is. 40:11); obeja nianinte ye tä känene aune tä juruainne tare angwane tä ngübare kwin (Ezeq. 34:16).

² Nitre Israel kirabe nämene nura nökö aune jondron nire ngübare, ye medenbätä kukwe bämikani ye nükani gare kwin ietre. Obeja ñan raba ja ngübare kaibe, ye erere arato nitre tä ja di ribere kukwe ja üairebiti (Mar. 6:34). Nitre ñaka ngübata aune ñaka jie ngwanta kwin kukwe ja üairebiti ye ngwane tätre ja tare nike. Tä nemen nuäre kukwe nuaindrebätä aune tä nemen ngwarbe kwäräkwärä “obeja [...] jie ngwanka ñaka” ye kwrere (1 Rey. 22:17). Akwa, nitre Ngöbö mikaka täte tä dre ribere jai ye Jehovata bien ietre ja tarebiti.

3. ¿Dre kädriei kukwe ja tötikara nekänti?

³ Jehovakwe niebare niara ni obeja ngübaka kwrere ye täbe ütiäte kä nengwane. Nitre niara mikaka täte obeja kwrere ye niarata täbe ngübare. Niarata jie ngwen ño aune tä jondron bien ño ietre ye ani mike gare jai. Arato, Jehovata kukwe nuainne bämikakäre töita krubäte niaratre yebätä, ye niaratre rabadre kain ngäbiti ño ye mikai gare jai.

NI OBEJA NGÜBAKA KWIN TÄ NI MADA KÄDEKE

4. ¿Jesuta obeja Jehovakwe ngübare ño?

⁴ Jehovakwe Jesús kädekani Ji Dokwä ngwanka konkrekasion kristiano yete (Efes. 1:22, 23). Jesús “abko ni obeja ngibiaka kuin”, aune niara Rün töita ño, bätä tö dre nuain ye erere niara töita. Niara namani juto “biare [ja nire biankäre] [...] obeja kräke” (Juan 10:11, 15). Kristo ja nire biani ye köböire jondron kwin tä nemen nitre kä tibienbätä yekwe (Mat. 20:28). “Ni jökrä käkwe tödekadre [Jesús ] ie ye ñaka gadrete, ñakare aune ja nire käre ye rabadre kwe” ie Jehová tö (Juan 3:16).

5, 6. a) ¿Jesús nire kädekani obeja kwe ngübakäre, aune obeja dre nuaindre ne kwe kukwe kwin rabadre kwetre? b) ¿Ñobätä metrere nita nitre umbre kukwei mike täte?

⁵ ¿Obeja tä bämike ño tä Jesukristo Ni Obeja Ngübaka ye kain ngäbiti? Niara arabe niebare: “Obeja tikwetikwe [...] käta ti mike täte amne, niaratre gare kuin tie arato, aisete obeja tikwe erere tä niken ti jiebti” (Juan 10:27). Nitre tä kädekani ni jie ngwankäre kukwe ja üairebiti ye dimikata kukwe jökrä känti ye ngwane bämikata ni obeja Ngübaka Kwin ye nita kukwei nuin. Jesús sribi kömikani Kä tibienbätä ye nitre apóstol aune nitre ja tötikaka ben rabadre nuainne jankunu ye niebare kwe ietre. Niaratre rabadre “obeja” tötike aune ngübare (Mat. 28:20; mäkwe ñäkä Juan 21:15-17 yebätä). Kukwe kwin ye drie jatani kä madakänti aune nitre ja tötikaka jatani bäri kwati angwane Jesukwe kukwe ükaninte, ne kwe nitre ünä kukwe ja üairebiti rabadre konkrekasion ngübarebiti (Efes. 4:11, 12).

⁶ Siklo kena yete, nitre ji ngwanka konkrekasion Éfeso yei apóstol Pablo niebare üai deme niaratre kädekani “konkrekasion [...] Ngöbökwe [...] ngüba[käre] (Hech. 20:28). Kä nengwane, nitre tä kädekani ji ngwanka käne ye kräke kukwe ye ütiäte arato, Biblia tä kukwe ribere ietre ye niaratre rabadre nuainne, ne kwe rabadre kädekani sribikäre. Ye medenbätä, nita niaratre kukwei mike täte ye ngwane nita bämike ni obeja Ngübaka bäri kwin Jehová aune Jesús ye nita kukwei mike täte (Luc. 10:16). Niaratre nibu yebätä metrere nita nitre umbre kukwei mike täte. Akwa kukwe madabätä nita nuainne arato.

7. ¿Nitre umbre tä mä dimike ño ja mäkäkäre kwin Jehovabe?

⁷ Biblia yebiti nitre umbre tä ja mräkätre dimike, mäträrebätä o kukwe niere ietre jie ngwankäre. Tätre kukwe niere ietre, akwa ñan tä nuainne ja mräkätre rabadre nüne ño ye mikakäre gare ietre (2 Cor. 1:24). Tätre kukwe Bibliabätä niere ietre dimikakäre kukwe kwin den ja käne, arato tä nuainne ne kwe konkrekasion tädre keteitibe aune jäme (1 Cor. 14:33, 40). Nitre umbre tä ja mräkätre “ngibiarebti”. Kukwe yebiti tätre bämike niaratre tö ja mräkätre tuai ja mäke kwin Jehovabe. Ye medenbätä, ja mräkä ñaka kukwe kwin nuaindi o “ja mika[ni] ngite” gadre kwetre angwane niaratre dimikadre biare (Gál. 6:1, 2; Jud. 22). Kukwe yebätä ni rabadre “nitre [...] [ni] jie ngwianka ye kukwei mik[e] täte”, ¿ñan ererea? (Mäkwe ñäkä Hebreos 13:17 yebätä.)

8. ¿Nitre umbre tä obeja Ngöbökwe kriemike ño?

⁸ Apóstol Pablo kädekani ni obeja ngübaka kukwe ja üairebiti arato. Niara käkwe kukwe ne tikani ja mräkätre Colosas ie: “Munkwe mokre jabti, ñobtä ñan angwane ni ruäre tä näin kukwe ngwarbe dirire. Kukwe mikanintbe ngwarbe kira abko tätre dirire amne, kukwe ye tä kite üai käme di kri käta gobrane kä nebtä yekri abko tätre dirire mun ngökakäre” (Col. 2:8). Kukwe yebätä, ütiäte krubäte ni rabadre nitre umbre tä kukwe Bibliabätä niere nie ni jie ngwankäre ye kukwei mike täte. Nire törbadre obeja ngwain ji madabiti ye ngwane niaratre tä juto biare kriemikakäre. Pedro niebare “ni ja bä mikaka Ngöbö kukwei niekä” aune “nitre ja bä mikaka dirikä kwrere” tä nitre “ruäre töi braibe abko [...] näkwite kukwe käme nuenkäre jabe” (2 Ped. 2:1, 14). Nitre umbre konkrekasionte kä nengwane rabadre ye erere nuainne nitre mikakäre mokre. Niaratre ye ja tuanina kukwe keta kabre ben, ye medenbätä tän kukwe ja üairebiti. Ne madakäre, niaratre kädeka jämi ye känenkri kukwe Bibliabätä nämene nüke gare kwin ietre aune nämene juto biare kukwe metre driekäre ye bämikani kwetre (1 Tim. 3:2; Tito 1:9). Niaratre ye niena ünä kukwe ja üairebiti, tätre töbike kwin metre aune tä kukwe niere Biblia yebiti ye köböire tätre obeja jie ngwen kwin.

NI OBEJA NGÜBAKA KWIN TÄ OBEJA BUKE AUNE KRIEMIKE

9. ¿Konkrekasion kristiano jie ngwanta aune bukata ño kä nengwane?

⁹ Ja mräkätre kä jökräbiti tibien yei Jehovata mrö ja üaire bien ere juta ükaninte kwe yebiti. Täräkwata sribeta nikwe yebiti kukwe keta kabre dianinkä Bibliabätä drieta. Ne madakäre, juta ükaninte Ngöbökwe tä ruäre ngwane tärä juen nitre umbre yei kukwe mikakäre gare ietre o nitre ni tuabitikä yebiti tä nuainne. Kukwe keta kabre yebiti tä kukwe mike gare aune konkrekasion kristiano buke kwin.

10. ¿Nitre ruäre tä ja denkä obeja mada ngätäite ye ngwane nitre umbre rabadre dre nuainne?

¹⁰ Ja mräkätre konkrekasionte kriemikadre aune ngübadre kukwe ja üairebiti sribi ye mikani nitre umbre kisete. Nitre tä di nekä ja üairebiti metrere dimikadre kwetre (mäkwe ñäkä Santiago 5:14, 15 yebätä). Obeja ruäre ñaka niena obeja mada ye ngätäite aune ni kristiano tä sribi Ngöbökwe nuainne ye ñaka niena nuainne. ¿Ni umbre tä obeja tarere angwane dre nuaindi kwe dimikakäre? Ja di ngwain krubäte kwe obeja ye känänkäre aune dimike, ne kwe jatadreta konkrekasionte. Jesukwe mikani gare: “Mun Rün tä kä käinbti sete abko ñan tö nitre tödekaka tibti tä ja mike bobre Ngöböbtä ngäbäkre kiakia kwrere se tuai nente jire iti jakän” (Mat. 18:12-14).

¿KUKWE RANDRETE NITRE UMBRE IE ANGWANE RABADRE TUIN ÑO NIE?

11. ¿Ñobätä ñaka tä nemen nuäre ja mräkätre ruäre kräke nitre umbre kukwei mikadre täte?

¹¹ Jehová aune Jesús ye ni obeja ngübaka, niaratre ye ñaka ja mike ngite jire, akwa nitre mikani kwe konkrekasion ngübarebiti ye abokän ie kukweta nainte. Ye medenbätä, ja mräkätre ruäre kräke ñaka tä nemen nuäre nitre ji ngwanka käne ye kukwei mike täte. Ruäre raba nemen töbike: “¿Tikwe kukwe meden nuaindre ye ñobätä jatadre niere tie? Niaratre ye ngite arato”. Erametre, nitre umbre ye därebare ngite. Akwa, kukweta nainte ietre o ñaka tä kukwe kwin nuainne ye ñan aibätä ja töi mikadre käre.

12, 13. a) Jehovakwe nitre dianinkä ji ngwanka käne ja mikani ngite, ¿ye tä dre mike gare nie? b) ¿Jehovakwe nitre mikani ji ngwen käne ie kukwe naninte ye ñobätä kukwe ye mikata gare Bibliabätä?

¹² Jehovakwe nitre dianinkä juta kwe jie ngwankäre kirabe ie kukwe naninte ye mikata gare metre Bibliabätä. Ñodre, David ye dianinkä reire aune kädekani nitre Israel jie ngwankäre. Akwa, niara nuatebare ye ngwane ja mikani ngite kwe, meri ni madakwe diani kwe jai, aune ni mada kämikani kwe (2 Sam. 12:7-9). Ni raba töbike apóstol Pedro yebätä. Niara nämene sribi keta kabre nuainne konkrekasion siklo kena yete, akwa ja mikani ngite kwe arato (Mat. 16:18, 19; Juan 13:38; 18:27; Gál. 2:11-14). Erametre, Adán aune Eva näire nükebe ni näire ni jökrä ngite, akwa Jesús aibe ñaka ja mikani ngite jire chi.

¹³ Jehovakwe nitre mikani ji ngwen käne ye ja mikani ngite, ¿ñobätä niarakwe kukwe ye mikani gare Bibliabätä? Kukwe ye nuainbare kwe mikakäre gare niara raba ni ngite mike juta kwe jie ngwen. Aune täbe nuainne ye erere. Ye medenbätä, nitre tä ni jie ngwen kukwe nuaindre ye ñan aibätä ni rabadre ñäke rüere o ni ñaka rabadre kukwei mike ütiäte jai. Nitre umbre konkrekasionte ye nikwe mikadre tuin ütiäte jai aune kukwei mikadre täte yei Jehová tö (mäkwe ñäkä Éxodo 16:2, 8 yebätä).a

14, 15. ¿Jehovakwe nitre kädekani juta kwe jie ngwankäre kirabe ye tä dre driere nie?

¹⁴ Ütiäte krubäte ni rabadre nitre tä ni jie ngwen ye kukwei mike täte. Nitre dianinkä Jehovakwe kukwe mikakäre gare juta kwe yei kukwe tare näire yebätä ani töbike. Nitre Israel nikani mento Egipto yebätä ye ngwane, Moisés aune Aarón köböire Jehovakwe kukwe biani ietre ja jie ngwankäre. Kukwe tare keta jätä rabadre bare aune ñaka ja tare nikadre kwetre, yekäre niaratre mrö ütiäte sribedre aune obeja kämikani ye därie metadrekä jukwebätä jai. Ñaka ni üaire käkwe kukwe ye mikani gare ietre, ñakare aune Moisés kukwe ye mikani gare nitre umbre kädekani Israel jie ngwanka yei aune nitre ye kukwe ye mikani gare ietre (Éx. 12:1-7, 21-23, 29). Jehovakwe kukwe biani nuaindre ye Moisés aune nitre umbre käkwe mikani gare kukwe tare ye näire. Kä nengwane nitre umbre tä sribi ütiäte ye nuainne arato.

¹⁵ Jehová käkwe angeletre aune nitre kä nebätä juani kukwe mike gare nitre niara mikaka täte yei mikakäre kwäre. Kukwe ye tä tikani Bibliabätä aune tä nüketa törö nie. Ngöbökwe nitre ye kädekani kukwe kwe ye mikakäre gare. Niaratre ye nämene blite Ngöbö kä yebiti aune juta kwe rabadre dre nuainne ne kwe ñaka gadrete ye mikani gare kwetre. Armagedón rükai ye ngwane Jehová raba kukwe ye erere nuainne arato. Erametre, nitre umbre tä blite Jehová käbiti aune tä juta kwe jie ngwen kä nengwane, akwa rabadre ja ngübarebiti ne kwe ñaka rabadre bike bäri ni madabätä.

TÄ “NÜNE KI KWATIBE TERI JÖKRÄ AMNE NIARATRE NGIBIAKA [...] ITIBE”

16. ¿“Kukwe” meden ni rabadre kukwe nuin?

¹⁶ Juta Jehovakwe tä “nüne ki kwatibe teri jökrä amne niaratre ngibiaka [...] itibe”, ye abokän Jesukristo (Juan 10:16). Jesukwe niebare nitre ja tötikaka ben yei “tädi kärekäre [...] köbö kwatirekwatire nebebe kä mrä” bentre (Mat. 28:20). ¿Kukwe käbämikani kwe ye tä mike nemen bare ño kä nengwane? Niara ye Rei kä kwinbiti, ye medenbätä kukwe keta kabre rabai bare kä Satanakwe gatekäre ye niara tä jie ngwen jökrä. Obeja Ngöbökwe ye ngätäite ni tö ja tuai keteitibe aune kriemikani ye ngwane “kukwe [...] niedi [ni] jiebiti” abokän tä mike gare ji medenbiti nikwe nändre ye nikwe kukwe nuadre. “Kukwe”nieta ye abokän üai deme tä mike gare nie Bibliabiti. Jehová aune Jesús tä kukwe mike gare nie nitre kädekani kwe obeja ngübakäre yebiti ye kukwei mikadre täte arato (mäkwe ñäkä Isaías 30:21b aune Apocalipsis 3:22 yebätä).

17, 18. a) ¿Kukwe meden tare nuain tö obeja yebätä, akwa dre ie ni raba tö ngwen? b) ¿Dre mikai gare jai kukwe ja tötikara mada yekänti?

¹⁷ Apóstol Pedro käkwe mikani gare “kwra lion ie mröta nebe angwane, tä niken ngwäne krikri, käta niken jändrän känene kwetadre jae, ye kwrere jire mun rüe diablu Satana tä näin ni känene juankäre ngwarbe” (1 Ped. 5:8). Obeja kwandre jäme aune nianinte ye ngwane jondron nire käme tä niken ketebätä biti tä nankwenbiti kwetakäre, ye kwrere Satana tä nuainne. Ye medenbätä, ütiäte krubäte ni tädre obeja mada yebe aune Jehová “ni obeja ngibiaka tä [...] [ni] ngibiare amne tä mokrere [ni]bti”, niara ken ni tädre arato (1 Ped. 2:25). Tärä Apocalipsis 7:17 tä mike gare nitre rabaite nire ja tare nikadi kri ye bitikäre ye Jesús “ni Kordero kwrere [...] käkwe [...] ngibiadi. [...] Angwane ñö ni mikaka nüne kärekäre, ye känti näin niaratre ngwena ñö tuen jae. Amne [...] Ngöbökwe okwä ñöi rötadi jökrä ietre”. ¡Kukwe kwin käbämikata nie!

¹⁸ Nitre umbre kristiano tä kädekani obeja ngübakäre ye sribi ütiäte mikani niaratre kisete. Ye medenbätä, ni rabadre kukwe ne ngwentari jai: “¿Nitre umbre tä kädekani rabadre dre nuainne obeja Jesukwe ngübakäre kwin?”. Nunta mun nübaire kukwe ye mikai gare jai kukwe ja tötikara mada yekänti.