Ni muko krütadre ye ngwane ja tuadre ño kukwe yebe

BIBLIA tä mike gare metre: ni brare gure tä “ja tarere au, ye kwrere [...] [rabadre] meri [...] kwe tare[re]”. Ye erere arato meritre gure rabadre “brare [...] kwe mik[e] ütiäte jae”. Nitre gure yei dre dre tä nuaindre ye niaratre nibu käkwe nuaindre “ni itibe kwrere” (Efes. 5:33; Gén. 2:23, 24). Käta niken ta ye ngwane tätre nemen nüne kwin jabe aune ja tarere bäri. Kri dobu ngätri tä niken ngätäi jai kwärikwäri, ye kwrere ni nibu tä ja mäkäninte ye töita nemen ja mäkäbätä bäri jabe.

Akwa, ¿iti krütadre ye ngwane dre raba nemen bare? Niaratre nämene ja mäke kwin aune ñaka dianka raba mento ye tä nötöte jondron tä nötöte ye kwrere. Nire muko tä krüte ye tä ja tare nike, ja raba nemen ruin kaibe ie, raba nemen rubun o ja raba nemen ruin ngite ie. Daniela namani gure metre ye käi nikani 58 ta, angwane nitre gure abokän muko krütani ye tuani kwe.a Akwa, niara muko krütani ye ngwane niebare kwe: “Nitre kän muko tä krüte yei jata nemen ruin ño ye ñaka nämä gare tie. Kukwe ye rababa bare tibätä angwane rükaba gare tie”.

KUKWE TARE YE NI MIKAI ULIRE KÄRE TÄ NEMEN RUIN NIE

Nitre ie kukwe gare ruäre tätre niere nitre muko tare kwe tä krüte kän ye tä nemen töbike krubäte. Nitre kän muko krütani tä töbike ye erere arato. Ñodre, Mili namani gure metre ye käi nikani 25 ta, aune muko kwe krütani mekerabe akwa niara ngrabare ñaka “ruin täte” ie nieta kwe, tä kukwe ye niere ja ruin ño ie ye mikakäre gare.

Meri kän muko krütani ye nämene muen ngwarbe krubäte Susan nämene nütüre. Niara namani gure metre ye käi nikani 38 ta, aune muko kwe krütani. Muko kwe krütani ye käi nikanina kwä gre ta, akwa niara tä niere: “Tita käre töbike niarabätä”. Ne madakäre, niara tä muko kwe uliere yebätä tä muen krubäte.

Biblia tä mike gare nire kän muko tä krüte ye tä nemen ja tare nike krubäte aune ye tä nuin kä raire te. Sara krütani ye bitikäre muko kwe Abrahán “moto namani ulire krübäte, kä namani müaire” (Gén. 23:1, 2, Jändrän Kena). Nitre gaikröta yei nämene tö ngwen, akwa muko tare kwe krütani kän ye namani tare kräke (Heb. 11:17-19). Arato, Jacob nämene Raquel tarere yebätä ñaka käi kwitaninkä jabiti kwe. Niara nämene käre blitebätä monso kwe yebe (Gén. 44:27; 48:7).

¿Kukwe namani bare kädrieta Bibliabätä ye tä dre driere nie? Ye tä mike gare nie nitre kän muko tä krüte ye tä ja tare nike kä raire te. Ye medenbätä, nitre tä muen aune ja ruin ulire ietre yebätä ni ñaka rabadre nütüre niaratre di ñakare, ñakare aune niaratre kän muko krütani yebätä ja ruin kore ietre ye mikadre nüke gare jai. Nikwe niaratre töi mikadre nüke gare bäri kwin jai aune dimikadre käre ye niaratre tä ribere jai.

KÖBÖ KWATIRE KWATIRE TE

Nire muko tä krüte yei ja ñaka nemen ruin nämene kaibe ye erere. Meri tä gure kä kwati te niara tä nemen ulire o töi ñan nemen kwin ye ngwane töi mikadre ño jäme aune dimikadre ño ye gare brare kwe ie. Akwa, brare tä krüte ye ngwane ñaka niara tareta aune dimikata tä nemen ruin ie. Arato, dre nuaindre ni brare töi mikakäre jäme aune kä mikakäre jutobätä ye gare meri kwe ie. Meri tä kukwe kwin niere muko ie dimikakäre, töi mikakäre jäme aune dre tuin kwin ie aune dre ribeta kwe jai ye erere ni mada ñaka raba nuainne kräke tä nemen ruin muko kwe ie. Akwa, krütadre angwane ni brare ie ja raba nemen ruin kaibe. Ye medenbätä, nitre kän muko tä krüte ye tä nemen töbike krubäte aune kä jürätä nemenbätä. ¿Kukwe meden nieta Bibliabätä ja jie ngwankäre raba niaratre mike nüne jäme aune kä jürä ñaka rabadre bätätre?

[Jondron üai bämikani página 28] — Ngöbö raba mä dimike ja tuin kukwe tare yebe köbö kwatire kwatire

“Köbö mdara jire jatadi jetbe angwane, dre dre rakadikä, yebtä munkwe ñan töbika dikaro, ñobtä ñan angwane köbö jetbe ye abko jatadi kukwe mdara jire ngwena töbikakrä munye, aisete köbö kwatirekwatire te kukwe tärä keta kabre ni mikakäre töbike.” (Mat. 6:34.) Jesukwe kukwe niebare ne abokän ütiäte metrere dre dre ribeta jai ja nire kräke yebätä, akwa kukwe ye tä nitre kwati muko krütani ye dimike kä ngwen nüke jai kukwe tare yebätä. Charles abokän muko krütani, sö nikani ruäre ta ye bitikäre niarakwe kukwe ne tikani: “Monique ye täbe törö krubäte tie aune ruäre ngwane ja ñaka tä nemen ruin kwin tie. Akwa, gare tie kukwe ye nemen bare ni jökräbätä, aisete ja känenkäre bätärekä bätärekä kukwe ye jatai nekä ti töite”.

Charles “kä mikani niken ta” ja tuakäre kukwe yebe. ¿Dre käkwe dimikani? Niara tä niere: “Jehová diebiti tita nüne köbö kwatire kwatire te”. Kukwe ye käkwe ñaka Charles mikani ja töibikare krubäte. Kukwe tare namani barebätä ye ñaka käi nikwitaninkä jötrö niarabiti, akwa ja ñaka tuanimetre kwe di nekä kukwe yei. Mä muko krütani angwane mäkwe ja tuadre köbö kwatire kwatire te kukwe yebe. Dre kwin rabai bare jetebe ye ñaka gare mäi.

Gata ye ñaka nämene Jehová töibätä jire, ñakare aune ye “sribi diablukwe” (1 Juan 3:8; Rom. 6:23). Gata ye jürätä nemen nitre jökräbätä aune yebiti Satana tä nitre kwati mike klabore jai aune mike ñaka tö ngwen kukwe kwin käbämikata yei (Heb. 2:14, 15). Niara töta nemen nitre tuai ñaka tö ngwen kukwe kwin ie aune kä mrä Ngöböta käbämike yete nitre ñaka nünain kwin aune kä jutobiti jire ye tä mike nemen nitre töite arato. Adán ja mikani ngite aune Diablu tä kö okwä mike ni jiete ye köböite mätä ja tare nike (Rom. 5:12). Satana kukwe tare mikani nemen bare ye Jehovakwe ükaite täte aune gata abokänbiti tä ni ngwen ja tare nike ye diainkä kwe arato. Nitre abokänbätä gata jürä ñaka niena ye ngätäite nitre kän muko krütani ye tä arato.

Nitre gaikröta nünankäre Kä tibienbätä ye käkwe nitre kwati mikaita ja mäke. Ni raba töbike ni rün, ni ruai aune ni mräkätre kirabe rükaita nire yebätä, bätärekä bätärekä ngite diainkä niaratrebätä monsotre kwe aune bräitre yebe gwairebe. Nita kite umbre ye ngwane ni bä kite jene ye jökrä diainkä. Monsotre bäri bati tä mräkätre umbre mike tuin jai ye erere ñaka nuain kä ye ngwane. Kukwe ye rabai bare nitre kä tibienbätä mikakäre nüne bäri kwin.

Nitre käkwe ja mikani gure metre bati bobu aune muko krütani nitre ye gaikröta yebätä kukwe keta kabre ngwantarita jai. Meri kän muko krütani bati, bobu aune bä kabre yebätä nitre saduseo kukwe ngwantaribare (Luc. 20:27-33). ¿Nitre ye gaikröta angwane ja rabai tuin ño ietre? Ñaka gare nie, aune ni ñaka rabadre kukwe ye bämike ja töite o töbike krubäte kukwe yebätä, ñakare aune ni rabadre tö ngwen Ngöböi. Kukwe ne abokän rabai bare metre: Jehovakwe dre nuaindi ja känenkäre ye rabai bare kwin ie, aune ni törbai ie ja kräke, aune ñaka jürä ngwain jabätä.

NITRE GAIKRÖTA IE TÖ NGWANTA, YE TÄ NI TÖI MIKE JÄME

Ngöbö kukwei tä driere metre ta ni mräkätre tare nikwe krütani gaikröta. Nitre krütani ganinkröta kädrieta Bibliabätä ye tä mike gare “kä rükai näre angwane nitre jökrä tä dobote ngwankäre törö ye ietre niara [Jesús] kukwe juruai aune jataita kä mrebiti” (Juan 5:28, 29, TNM). Nitre krütani gaikröta ye nire käkwe kai ngäbiti yebätä kä rabai juto krubäte. Ne madakäre, nitre krütani gaikröta yebätä kä rabai ño juto ye ñan raba nüke gare nie.

Kä ye ngwane, nitre kä nebätä ñaka nünanbare erere nünain kwetre kä jutobiti. Nitre kwati krütani ye gaikröta nünankäre (Mar. 5:39-42; Apoc. 20:13). Nire kän mräkätre krütani rabadre töbiketari kukwe ñan tuabare nuaindi yebätä ye käkwe töi mikai jäme.

¿Nitre kwati krütani gaikröta ye ngwane ni ruäre rabai ulire? Ñakare. Biblia tä niere Isaías 25:8 yekänti Jehovakwe “gata ye ñaikä kärekäre”. Kukwe yebiti tä mike gare gata tä ni mike ja tare nike ye diainkä jökrä kwe, Biblia tä niere jankunu: “Jehová Däkien Gobranka kri käkwe nitre jökrä okwä ñöi sökaite ngwärebätä”. Kä nengwane mätä ulire mä muko krütani yebätä angwane nitre krütani gaikröta ye raba kä mike juto mäbätä.

Jehovakwe dre nuaindi ye ñan raba nüke gare täte ni kä nebätä ie. Niara tä niere: “Kä kwinta ye tä bäri mente kwin kä tibien kräke, ye erere ji tikwe bäri mente kwin ji munkwe ye kräke, aune ti töi bäri kri mun töi ye kräke” (Is. 55:9). Ja känenkäre nitre krütani gaikröta käbämikani Jesukwe ye rabadre ni mike tö ngwen Jehovai Abrahán nuainbare erere. Ni kristiano jökrä rabadre Ngöbö mike täte kä nengwane ne kwe “kä mrä, ni[tre] rükadreta nire angwane, nire nire tuen ütiäte Ngöböye” ye ngätäite ni tädre siba (Luc. 20:35).

KUKWE IE TÖ NGWANDRE

Ni ñaka rabadre ja töibikare krubäte, ñakare aune tö ngwandre kukwe ja känenkäre yei. Kukwe kwin ñaka ni kräke tä nemen ruin ni kwati ie. Akwa, Jehovata kukwe bäri kwin käbämike nie. Nita dre ribere jai aune ni tö dre ie ye biain ño jökrä kwe nie ye ñaka gare nie, akwa nuaindi kwe ye gare nie. Apóstol Pablo tikani: “Jändrän tärä nebe ni kisete, ye abko ngibiata ñakare mda, akwa jändrän ngämi nebe ni kisete abko nita ngibiare kisere, ye abko rükadre nie, abkokäre nikwe ngibiadre jäme bätärekä abti rükadre ni kisete” (Rom. 8:24, 25). Ngöböta kukwe käbämike yei tö ngwandre ye käkwe ni dimikai kä ngwen nüke jai. Mäkwe kä ngwain nüke jai ye köböire “dre dre ie mä brukwä tö ye niarakwe biain mäi”. “Jondron jökrä nire tö dre dre ie” ye niarakwe biain ie (Sal. 37:4; 145:16; Luc. 21:19).

[Jondron üai bämikani página 31] — Nikwe nünain kwin käbämikata Ngöbökwe yei mäkwe tö ngwan

Jesús murie keta jämi ye känenkri nitre apóstol namani nikenkä krubäte. Niarakwe kukwe ne niebare ietre töi mikakäre jäme: “Mun ñan rekwetaka ja jiebti, akwa munkwe tödeka Ngöböbti amne munkwe tödeka tibti”. Niebare kwe ietre: “Mun ñan rabadre uli kwrere nete, ñobtä ñan angwane ti jatadita rabakäre munbe” (Juan 14:1-4, 18, 27). Kukwe niebare kwe ye nitre nänkä niara jiebiti dimikani tö ngwen aune kä ngwen nüke jai siklo kwati te. Ye erere arato, nire tö mräkätre krütani tuaita yebätä kä rabadre juto krubäte. Jehová aune Monso kwe ye käkwe ñaka mun tuainmetre jire ulire. ¡Kukwe ye rabai bare metre yei nikwe tö ngwandre!

a Niaratre kä kwitani.

Nire nire tä ni mada uliere yei kukwe kwin niedre

Ni kristiano gure muko tä krüte ye ngwane, nitre kwati raba niken känti kukwe kwin niekäre ie aune dimikakäre. Ñodre, meri iti kän brare krütadre ye ngwane mräkätre bätä ja ketamuko kwe rikadre tuinbiti yebätä niara debe biandre ietre. Akwa, niara mräkä krütani yebätä rabai töbike jankunu, aisete dimikadre aune kukwe kwin niedre ie ye ñan nuaindre batibe, ñakare aune nuaindre jankunu. Biblia tä niere: “Ja ketamuko erametre tätre ja tarere kä jökrä ngwane, bätä kukwe tare tä nakainkä ngwane tätre nemen ja eteba ye erere” (Prov. 17:17).

¿Nitre tä ni mada uliere yei köbö kwin niedre ño? Biblia tä niere: “Mun jökrä käkwe nüna jäme ketetibe jabe amne ja raba ruen ja kwrere jökrä munye ja die mikakäre kwärikwäri. Erere arato, ni ja mräkäre käta ja tarere, ye kwrere munkwe ja tare kwärikwäri. [...] Munkwe ja moto mika kuin jakrä” (1 Ped. 3:8). Ni kristiano tä ni mada uliere ie ja ñaka rabai ruin kwin bengwairebe, ñakare aune kä näin krubäte ta aune ja rabai ruinta kwin ie. Ni töita kwin kräke, akwa kukwe ne erere ni ñaka rabadre ngwentari “¿Mä tua ño?” o “¿Ja ruin kwin mäi ya?”. Ni tä ni mada uliere ye raba nemen töbike: “Ja ruin ño tie ye ñaka nüke gare ie” o ¿Se ño ja rabadre nemen ruin kwin tie?”. Aisete, bäri kwin nikwe kukwe kwin niedre ie aune blitadre bökän ben. Kukwe ne ni raba niere ie: “Mätä nete ye käi nibi juto tibätä”, “Mätä Ju ja Ükarakrö nete ye tä ti dimike arato”.

Nübaidre mröre jabe o jänrikadre basare ye raba dimike arato. Marcos muko krütani ye ngwane nitre ja ketamuko kwe nämene nemen tuinbiti ye käkwe dimikani krubäte. ¿Drebätä nämenentre blite? “Niaratre ñan nämä blite kukwe nämä ti kisete yebätä, ñakare aune kukwe kwin ti dimikakäre yebätä niaratre nämä blite.” Nina kän brare krütani arato, tä niere: “Ja ketamuko tikwe ye tä kukwe ribeta tikwe jai ye erere kädriere tibe. Ruärekänti ñaka tätre kukwe niere jire, aune tätre nemen ti ken ye tä nemen bäri ütiäte ti kräke”.

Ni tä ni mada uliere ye törbadre blitai mräkä krütani yebätä angwane, kukwe nuadre kwin aune ngübadre bätärekä. Ñaka kukwe ngwantaridre ie kukwe mikakäre gare jai. Ñaka ñäkädre blo rüere. Arato, ni ye tä ni mada uliere ye mikadre gare ño kwe ye mäkwe ñaka nie ie. Niara törbadre ja tuai kaibe, ye ngwane kukwe nuaindre kwe ye ñaka matadre tare nibätä. Ni raba niken tuinbitita köbö mada ngwane. Akwa, taredre jankunu ye bäri ütiäte (Juan 13:34, 35).

¿Dre rabai bare ja käne ye mä tärä ngwentari jai?

Jehovakwe kukwe käbämikani ye mikai nemen bare ño kwe ye ni jökrä tä nemen ngwentari jai. Abrahán monsoi rabai käbämikani ie, kukwe yebätä nämene töbike krubäte. Jehovakwe niebare ie rabadre kukwe ngübare bätärekä aune niara ja ngwani metre täte ye köböire kukwe kwin namani barebätä (Gén. 15:2-5; Heb. 6:10-15).

Jacob ja tare nikabare krubäte, ñobätä ñan aune namani nütüre monso kwe José ye krütani. Kä nikani raire ta angwane nämene muaire. Akwa, niara nämene ja mike täte metre yebätä Jehovakwe kukwe kwin mikani kräke. Kä nikani ta angwane, niara ja tuaninta Josebe, ne madakäre, bränkätre ye tuani kwe arato. Jacob niebare ie: “Tikwe ñan ma tuadreta, ti nämene nütüre, akwa Ngöbö diebti tita ngäbäkre makwe tuen matare” (Gén. 37:33-35; 48:11, Jändrän Kena).

¿Kukwe namani bare ne tä dre driere nie? Kena, Ngöbö dite krubäte töita dre nuainbätä ye kukwe mada ñan raba ketebätä jire. Ketebukäre, nita orare aune Ngöbö töita dre nuainbätä ye ererebätä nita kukwe nuainne angwane, Jehovakwe ni ngübadi aune ja känenkäre nita dre dre ribere jai ye biain jökrä kwe nie. Apóstol Pablo tikani: “Nita jändrän kärere Ngöböye amne, jändrän btä ni töita ñakare, yebti ta abko Ngöböta jändrän bien bäri kri krübäte nie, aisete Ngöbö di kri tä nibtä, yebtä ari kuin niere Ngöböye. Nitre gätäkä Jesu käbti abko ngätäite Ngöbö raba mikani ütiäte amne Kristo Jesu köböire Ngöbö raba käikitaninkä kärekäre. [...] Amen” (Efes. 3:20, 21).