KUKWE TÄRÄ KWATABÄTÄ: ¿ERAMETRE DIABLU YE TÄRÄ?
¿Diablu ye tärä?
Ángel nikani tibien ye kwrere Diablu üai sribebare (Madrid, España)
Rogelio ririabare El Salvador tä niere: “Ngöbö tärä ye nämä gare tie ti nämä chi ye ngwane, akwa ti ñaka nämä Diablu ye mike era jai. Ti nämä ja ngwen blo ye ngwane, ti meye nämä niere tie: ‘¡Diablu näin mä ngwena jai!’, aune ti nämä niere ie: ‘¡Ti ñan töibikaire, ti jänrikadre kwe!’”.
Aune mä, ¿mätä töbike ño Diablu yebätä? ¿Kukwe nieta nete ne meden raba tuin bäri metre mäi?
Diablu ñakare. Bämikata jerekäbe kukwe blo yebätä.
Diablu tärä, akwa ñaka dre nuainne nitrebätä.
Diablu ye ni üaire dite krubäte abokän tä nitre näkwite.
Nitre ruäre tä töbike kore, akwa nitre mada abokän tä töbike jene. ¿Nire tä töbike metre? ¿Kukwe ye mikadre gare jai ye ütiäte? Diablu ñaka akräke, nitre tä mike era jai ye tä ngökabare. Diablu tärä, akwa ñaka dre nuainne nibätä, ye tä mike gare ngwarbekäre Diablu jürä nitrebätä. Akwa Diablu tärä aune tä ni näkwite, ¿ñan bäri töi käme ni raba niere?
¿Diablu ye bämikata jerekäbe kukwe käme yebätä, o Diablu tärä? Tärä angwane, ¿raba kukwe tare nuainne mäbätä raba ruin mäi? Ye erere ngwane, ¿mä raba ja kriemike ño? Biblia tä dre niere ye ani mike gare jai.