KUKWE TÄRÄ KWATABÄTÄ: MÄ RABA NEMEN JA KETAMUKO NGÖBÖKWE
Kukwe mada ñaka bäri kwin
¿Mäkwe dre nuaindre ja ketakäre bäri kwin Ngöböbe? Dre dre nuaindre ja ketakäre Ni ni Sribekä ben ye nibira gare ruäre nie:
Mikadre gare jai aune kä kwe Jehová ye kädekadrete.
Käre blitadre ben orasion yebiti aune käre ñäkädre Bibliabätä.
Dre ribeta kwe nie ye käre nuaindre.
Ja ketakäre Ngöböbe mäkwe kä kwe ye kädekate, mäkwe blita ben, mäkwe ñäkä Bibliabätä aune dre ribeta kwe mäi ye mäkwe nuain
¿Mä nibira kukwe ye nuainne rökrakäre Ngöbö ken? ¿Ruäre abokän mä rabadre nuainne bäri kwin raba ruin mäi? Mäkwe ja di ngwain nuainkäre, akwa ye köböire kukwe kwin rabai mäkwe yebätä mäkwe töbika.
Jennifer, nünanka Estados Unidos käkwe niebare: “Nikwe kukwe meden erere nuaindre ja ketakäre bäri kwin Ngöböbe ye abokän kwin krubäte. Nikwe ja ketai ye erere Ngöböbe ye köböire kukwe kwin keta kabre ne rabai nikwe: nikwe tö ngwandi bäri Ngöböi, rabai gare bäri kwin nie, aune metrere, rabai bäri tare nikwe. Kukwe mada ñaka bäri kwin ye erere”.
¿Mä törba ja ketai ye erere Ngöböbe? Nitre testiko Jehovakwe raba mä dimike kä jutobiti. Biblia tä dre niere ye niaratre driedi mäi aune ñaka ütiä mikai kwetre mäbiti. Ju ja Ükarakrö nieta kwetre yete gätä nuainta yebätä mä raba niken arato. Yete nitre tä ja kete Ngöböbe aune tä mike ütiäte jai ye ngätäite mä täi.a Bätärekä jatäri ja rabai ruin salmista erere mäi, niebare kwe: “Ti rökradre Ngöbö ken ye kwin ti kräke” (Salmo 73:28).
a Mä törba ja tötikai Bibliabätä o Ju ja Ükarakrö meden tä mä bäre ye mä törba gai angwane, nirekwe täräkwata ne biani mäi yebe mäkwe blita o mäkwe Internet käi nunkwe www.jw.org/es ye känä. Página kena yekänti mrä tibien yete, mäkwe clic mika kukwe meden känänta mäkwe yebiti “Contáctenos” nieta tä suliare yekänti.