KUKWE NGWANTARITA BIBLIA YEBÄTÄ

¿Dre dre köböire monsotre mäkwe raba Ngöbö tarere?

Ngöbö tärä aune monsotre mäkwe ye tare Ngöbökwe rabai gare ietre angwane, rabaitre tarere. Rabadre mike gare jai ye kwin krubäte arato (1 Juan 4:8). Ñodre, ñokäre ni sribebare kwe, ñobätä tä nitre tuenmetre ja tare nike aune dre nuaindi kwe ja känenkäre ni kräke ye rabadre gare ietre. (Mäkwe ñäkä Filipenses 1:9 yebätä.)

Monsotre mäkwe rabadre Ngöbö tarere yekäre, mätä Ngöbö tarere arato ye jutuadre mäbätä ietre aune ye erere niaratre raba nuainne arato. (Mäkwe ñäkä Deuteronomio 6:5-7 aune Proverbios 22:6 yebätä.)

¿Mä raba dre nuainne ne kwe monsotre mäkwe rabadre Ngöbö tarere?

Ngöbö Kukwei ye dite krubäte (Hebreos 4:12). Yebätä mäkwe monsotre mäkwe ye dimika kukwe nieta Bibliabätä ye mike nüke gare jai. Jesukwe nitre ja tötikaka kwe tötikani ño ye erere mäkwe monsotre mäkwe ye tötika ne kwe kukwe driedre mäkwe ietre ye rabadre nemen brukwäte: mäkwe kukwe ngwantari ietre, dre nie kwetre ye mäkwe kukwe nua aune kukwe meden ñaka rükadre gare ietre ye mäkwe drie ietre. (Mäkwe ñäkä Lucas 24:15-19, 27, 32 yebätä.)

Ngöbökwe nitre tarebare ño kädrieta ruäre Bibliabätä ye mä raba mike gare ietre. Ye köböire Ni ni Sribekä ye rabai gare bäri kwin ietre aune rabai tarere bäri. Internet käi www.jw.org/jw-ngb yete kukwe keta kabre kwin raba kwen mäi. (Mäkwe ñäkä 2 Timoteo 3:16 yebätä.)