¿Sribi ribi ye nikanina ta?

Sribidre ribi ye ñaka tä mate kwin Alex ye aibebätä. Ni karo ükatekä kädekata Aaron käkwe niebare: “Sribi nuainta nikwe yekänti ni ñaka ganane krubäte ye ngwane ‘sribi ye ñaka ütiäte’ nitre kwati tä nütüre. Sribi bäri kwin ñaka kwen ietre ye aibe ngwane tätre sribi ye kwrere nuainne jankunu”.

Nitre kwati ñaka därebare sribi ribi nuainkäre tätre nemen niere. ¿Ñobätä? Ñobätä ñan aune nünandre kwin ye abokän ni rabadre jondron bökäne aune ni tädre kwin nieta jondron keta kabre kukwe mikakäre gare yete ye tädre niaratre töi kwite. Matthew, ni sribikä mantenimiento yebätä tä niere: “Sribi ribi ye nitre ñaka ja tötikabare ye aibe kräke nitre jökrä bäsi tä nütüre”. Ye erere tuin arato nitrebätä Shane kä sribekä gwita yei. Niara tä niere: “Nitre töta nemen ngwian ganain krubäte jankunu akwa sribidi bäri braibe”.

Akwa nitre kwati töta nemen sribi ribi ye nuaindi. Daniel, ni ju sribekä abokänbiti kä 25 tä niere: “Sribi ribi akwa nuainta kwin angwane tä kä mike juto krubäte nibätä”. Andre, abokänbiti kä 23, töita ye erere arato: “Kä rabadre juto nibätä aune ja rabadre ruin kwin nie yekäre sribidre ye gare metre tie. Mäkwe sribidre braibe ye ñan ai köböire kä rabai juto mäbätä ñakare aune jerekäbe mä jatai nainte”.

¿Ñobätä Daniel aune Andre tä ja töi mike kwin sribi ribi ye nuainkäre? Tätre ja jie ngwen kukwe nieta Bibliabätä yebiti yebätä. Jondron nuaindre ja dibiti aune kä ngwandre nüke jai nieta Bibliakwe, akwa nita dre nuainne ye käi rabadre ño juto nibätä drieta kwe nie arato.

¿Kukwe meden meden Bibliabätä raba mä dimike sribire kä jutobiti? Nunta mä nübaire ñäke kukwe ye ruärebätä kukwe ja käne yekänti.