Biblia tä kukwe mike gare merebe aune metre yekwe ti töi mikaba ñan krütare

TIBIKE BLITE JABÄTÄ:

Ti därebare Székesfehérvár, kä ye nemenkä juta Hungría yekänti, kä nikanina 1,000 biti bäri ta kä ye ükaninte aune kukwe keta kabre mikata garebätä. Akwa Rübare Kri Bobukäre yekwe kukwe tare mikani nakainkä kä yekänti ye täbe törö tie.

Ti nämä chi ngwane ti nämä nüne ti ruai aune ti mölöi ben. Niaratre törö krubäte tie, metrere ti mölöi Elisabeth törö tie. Tikwe Ngöbö mikadre täte ye niarakwe drieba tie. Kä nämä komä tibiti ye ngwane käre nämä ti mike Padrenuestro ye niere jabe dere dere. Akwa, kä rababara bäsi 30 tibiti ye ngwane batibe orasion ye dre gärätä ye rükaba gare tie.

Ti nämä chi ngwane ti ruai aune ti mölöi nämä ti ngübare, ñobätä ñan aune ti rün aune ti meye nämä sribire dibire rare ngwian ükakrökäre ju bäri kwin kökakäre. Akwa, bämän krobu krobu sábado yete nun ja mräkäre jökrä nämä ja ükökrö mrökäre gwaire. Ye käre törö tie.

Ti rün aune ti meye tö nämä dre ie ye erere rababa kwetre kä 1958 yete. Ju kökaba kwati kwetre. ¡Ye ngwane ti rababa nüne bentre! Kä nämä juto tibätä, akwa kä ñaka rababa juto raire tibätä, ñobätä ñan aune krire sö rikaba krä ti ta angwane, ti rün krütaba cáncer kisete.

Ti rababa ulire krubäte. Ti nämä kukwe ne niere Ngöböi ye törö tie: “Ngöbö, mäkwe ñaka ti rün tuanemetre krüte tikwe ribeba mäi”. ¡Tita ribere krubäte jai! ¿Ñobätä mäkwe ñan ti kukwe nuani?”. Ti rün nämä medente ye ti tö nämä mikai gare krubäte jai. Ti nämä ngwentari jai: “¿Nikani kä kwinbiti, o nikanina kärekäre?”. Monsotre mada rün nämä nire yebätä ti nämä bätä ngwen.

Kä kabre te ti nämä nemen bäsi köbö kwatire kwatire dobobiti. Ti nämä nemen ngukodokwäre ti rün nämä doboi metani yekänti aune ti nämä orare: “Ngöbö, ti rün tä medente ye ti tö mikai gare jai”. Drekäre ni sribebare kwe ye mikadre gare kwe tie ye ti nämä ribere ie arato.

Kä rababa 13 tibiti ye ngwane tikwe ja töi mikaba ja kite kukwe alemán yebätä, ne kwe ti nämä kukwe känene ye kwandre tie tärä keta kabre tikani kukwe alemán yebiti yebätä. Kä 1967 yete ti rikaba ja tötike juta Jena yete, juta ye nämä nemenkä Alemania oriental. Nitre filósofo Alemania tärä tikani yebätä tikwe ñäkäba, ñokänti ni nükani ye mika nämä gare tärä medenbätä yebätä metrere tikwe ñäkäba. Kukwe kwin ruäre kwanba tie tärä yebätä, akwa ti törbaba kukwe mikai gare jai ye ñan ai kwanba tie tärä yebätä. Ngöbökwe kukwe ye mikadre gare tie ye ti nämä ribere jankunu ie.

BIBLIAKWE TI TÖI KWITANI:

Kä 1970 yete ti rikabata Hungría aune kä yekänti meri kädeka nämä Rose rababa gare tie, ja känenkäre tikwe ja mäkäteba ben. Kä ye ngwane, Hungría nämä gobran comunista ye kisete, yebätä tikwe ja mäkäteba Rosa ben ye bitikäre kä rikaba braibe ta ngwane nun gitiaba Austria. Nun nämä yäke Sydney, juta Australia yete, ti grü iti nämä nüne yekänti.

Kä ñaka rikaba raire ta angwane sribi kwanba tie Austria. Bati, sribi muko tibe nieba tie, ti nämä kukwe ngwentari jai ye Biblia raba mike gare jökrä tie aune tärä tä blite Bibliabätä bianba kubu kwe tie. Tikwe ñäkäba tärä ye jökräbätä, akwa ti törbaba kukwe mikai gare bäri jai, yebätä tikwe kukwe tikaba nitre testiko Jehovakwe tärä ye sribekä yei, ne kwe tärä mada juandre kwetre tie.

Nunkwe ja mäkäteba ye käi rikaba kwati ta ye köböi te monso Testiko rükaba nun känti. Tikwe tärä käräba jai ye jänrükaba kwe ti kräke aune raba ti tötike Bibliabätä nieba kwe tie. Tikwe jän nieba drekebe ie. Ti törbaba kukwe mikai gare krubäte jai, yebätä nun nämä ja tötike bobu bämän kratire kratire, ¡aune nun nämä ja tötike ora kräbokä!

Nitre Testiko nämä kukwe Bibliabätä driere tie ye käi nämä juto krubäte tibätä. Biblia tikwe nämä tikani kukwe húngaro yebiti yebätä Ngöbö kä ye mikaba gare kwetre tie yekwe ti töi mikaba ñan krütare. Kä rikabara 27 ta ti nämä nemen misa yebätä akwa Ngöbö kä Jehová ye ñaka niebare jire ti olote. Biblia tä kukwe mike gare merebe aune metre yekwe ti töi mikaba ñan krütare. Kukwe keta kabre rababa gare tie, ñodre, nitre krütani ye töi ñaka niena, tätre kübiani nguseta ye kwrere (Eclesiastés 9:5, 10; Juan 11:11-15). Kä mrä te “ni ñan krütadre jire iti mda” käbämikata ye rababa gare tie arato (Apocalipsis 21:3, 4). Kä mrä yete “nitre [...] krütanina ye gaikröta” ye niena gare tie aune tikwe ti rün tuaita (Hechos 24:15, TNM).

Rose käkwe ti dimikani ja brukwä tätebiti. Nun ririaba drekebe ngwarbe ja üairebiti aune sö krobu aibe te nunkwe ja tötikaba tärä ye jökräbätä. Nitre Testiko nämä gätä nuainne ye jökräbätä nun nämä niken; nämäntre ja tarere kwärikwäri, ni mada kain ngäbiti kwin aune nämäntre keteitibe ye nämä nun töi mike ñan krütare (Juan 13:34, 35).

Kä 1976 ye ngwane nun tuametreba niken nüne Australia. Nun rababa kä yekänti angwane, bengwairebe nunkwe nitre Testiko känänba aune niaratre käkwe nun ka ngäbitiba kwin yebätä ja rababa ruin ja gwirete nunye. Kä 1978 yete nunkwe ja mikaba testiko Jehovakwe.

KUKWE KWIN NAMANI TIKWE:

Kä kwati krubäte te ti tö nämä kukwe mikai gare jai ye rababa gare tie. Ni rün bäri kwin kädekata Jehová ye rababa gare tie arato (Santiago 4:8). Ne madakäre, kä bä nuäre käbämikata Ngöbökwe yete tikwe ti rün tuaita bobukäre yei tita tö ngwen (Juan 5:28, 29).

Kä 1989 yete nun rikabata Hungría kukwe rababa gare nunye Bibliabätä ye mikakäre gare nun mräkätre, nitre ja ketamuko nunkwe aune nitre mada yei. Nunkwe nitre kwati ie diribarera ye käi juto nunbätä. Nitre 70 biti bäri ja mikanina Testiko, ye ngätäite ti meye tare tikwe ye tä arato.

Kä 17 te tikwe oraba Ngöböi aune ti nämä kukwe ngwentari jai ye mikadre gare kwe tie tikwe ribeba ie, aune kä nikanina 39 ta kukwe ye mikani gare kwe tie. Ti täbe orare nüke matare, akwa nengwane tita kukwe ne niere ie: “Ti Rün kä kwinbiti tare tikwe, ti nämä bati ngwane ti nämä dre dre ribere orasionte mäi ye mäkwe mikani nemen bare ti kräke yebätä tä debe”.