KUKWE TÄRÄ KWATABÄTÄ: ¿DRE DRIETA BIBLIAKWE YE MÄ TÖRBA GAI?

Ni kä jökräbiti tötikata Bibliabätä

Ni testiko Jehovakwe nüke gare nita kukwe driere yebiti. Akwa ¿nunta nitre kä jökräbiti tibien dimike kukwe Bibliabätä mike nüke gare jai ye gare mäi?

Ni iti tä ja tötike Bibliabätä sribikänti

Kä 2014 yete, nitre testiko Jehovakwe 8 millón biti bäri käkwe nitre 9,500,000 tötikani Bibliabätä bäri sö kratire kratire te, juta aune kä 240 jene jene yekänti.a Ñodre, juta 140 yekänti nitre nüne bäri braibe nitre jökrä tötikaka nunkwe ye kräke.

Nitre tötikakäre, nunta tärä aune täräkwata sribere 1,500 millón bäsi kä kwatire kwatire, ñodre, Biblia, tärä, täräkwata Ni Mikaka Mokre bätä ¡Despertad! aune täräkwata mada, kukwe 700 jene jenebiti. Sribi mada ne erere nuain ñaka jire ye köböire nire nire törba ja tötikai kukwe medenbiti Bibliabätä ye erere raba nuainne.

“Ti ñaka tö nämä ja tötikai, akwa tikwe ja tötikaba ye ngwane rababa tuin kwin tie. Kukwe rababa gare tie ye käkwe ti dimikaba krubäte.” (Katlego, Sudáfrica)

“Tikwe ja tötikaba ye köböire ti nämä kukwe ngwentari ye mikaba gare tie, aune kukwe mada rababa gare krubäte tie.” (Berta, México)

“Nun nämä ja tötike ti gwirete aune ora meden te ti tö nämä nuaindi ye erere ti nämä niere. ¡Dre ribedre mada!” (Eziquiel, Brasil)

“Ti tötika nämä minuto krä jätäbiti krärike o ora ötare; köbö ruäre te bäri raire. Ti tö nämä ño ye ererebätä.” (Viniana, Australia)

“¡Ni tötikata aune ütiä kärä ñaka yebätä ti töi rababa ñan krütare!” (Aimé, Benín)

“Dirikä tie nämä dirire bätärekä tie aune töi jämebiti... Aune nun rababa ja kete kwin jabe.” (Karen, Irlanda del Norte)

“Nitre kwati tä ja tötike Bibliabätä akwa ñaka ja mike testiko Jehovakwe.” (Denton, Inglaterra)

NITRE TÖTIKATA BIBLIABÄTÄ YEBÄTÄ KUKWE NGWANTARITA KÄRE

¿Ni tötikata ño?

Kukwe keta kabrebätä Biblia tä dre niere yebätä ja tötikata. Ñodre, nire abokän Ngöbö, niara ye ño, kädekata ño, tä medente aune ni raba nemen ja ketamuko kwe o ñakare mikata gare Bibliakwe. Nitre tötikata ye ngwane, kukwe ngwantarita ne aune mada ye raba kwen medente Bibliabätä ietre ye drieta ietre.

Yekäre tärä ¿Dre drieta erametre Bibliakwe?b yebiti nitre tötikata. Tärä ne sribebare nitre dimikakäre kukwe bäri ütiäte Bibliabätä ye mike nüke gare jai. Kapitulo ruäre tä blite Ngöbö yebätä, Jesukristo yebätä, ñobätä ja tare nikata yebätä, gata yebätä, orasion yebätä, aune kukwe mada keta kabre yebätä arato.

¿Medente aune ñongwane ni tötikata Bibliabätä?

Medente aune ñongwane ye mäkwe niedre.

¿Ni tötikata ora kräbe?

Mä raba ja tötike minuto kräbe ye tä gare mäi. Ye erere nun raba nuainne. Nitre kwati töta nemen ja tötikai ora krati näre bämän kratire kratire. Akwa, nitre ruäre tätre ja tötike minuto krä jätä o krä jätä biti krärike aibe.

¿Ütiä biandre nuäi?

Ütiä kärä ñaka. Nitre tötikata aune tärä medenbiti tötikata ye ütiä kärä ñaka. Ñodre, Jesukwe niebare nitre ja tötikaka kwe yei: “Munkwe jondron ne kani ngäbiti ngwarbe, angwane bian ngwarbe arato munkwe” (Mateo 10:8, Ngöbö Täräe, tärä okwä ükaninte).

¿Ni tötikaka sö kräbe?

Sö kräbe o kä kwäbe mä törba ja tötikai ye tä gare mäi. Tärä ¿Dre drieta erametre Bibliakwe? yebätä kapitulo 19 tä mikani. Mä törba ja tötikai nuäi ye erere mäkwe nuain.

¿Ja mikadre testiko Jehovakwe?

Ñakare. Nitre tö kukwe meden meden mikai täte ye tä gare ietre aune nunta mike ütiäte jai. Akwa, Biblia tä kukwe niere ye rabadre gare mäi ye raba mä dimike kukwe kwin den ja käne.

¿Medente kukwe mada raba kwen bäri?

Internet käi jw.org yete kukwe raba kwen bäri metre mäi nunta kukwe mike täte yebätä aune nunta dre dre nuainne yebätä.

¿Medente ja kä tikadre?

Formulario tä Internet käi www.jw.org/jw-ngb yete yebätä mäkwe kukwe tika ne kwe nun rikadre mäkänti.
Kä medenkänti kukwe juan raba mikata gare página 2 yekänti mä raba kukwe tike arato.
Guía telefónica yebätä mäkwe número nitre testiko Jehovakwe nünanka mä käibiti ye känä aune mäkwe ñäkä köte ietre.

a Ruäre ngwane nitre braibe tötikata gwaire.

b Nitre testiko Jehovakwe sribebare. Tärä 224 página ne imprimibarera 230 millón biti bäri kukwe 260 jene jenebiti bäri.

KUKWE NITRE JA MRÄKÄRE DIMIKAKÄRE

“Ti muko jataba ja tötike Bibliabätä ye ngwane, jataba ja töi kwite yekwe ti töi mikaba ñan krütare. Nun jataba nüne kwin jabe. Ti törbaba kukwe mikai gare jai yebätä ti jataba ja tötike. Kukwe rababa gare tie ye käkwe ti töi mikaba ja ngwen bäri kwin. Nun nämä ja tötike Bibliabätä ye käkwe nun mikaba nüne kwin jabe.” (Eziquiel)

“Ti jataba ja tötike Bibliabätä ye ngwane, tikwe droga aune dö ña ye tuametreba bätä ti ñaka jatabara ja mike rubun. Kä nengwane, ju tikwe tä ükaninte bäri kwin aune merebe. Ti mräkätre ye tare bäri tikwe aune ti töta nemen jondron nuaindi niaratre kräke. Nengwane kätä bäri juto tibätä.” (Karen)

“Ti nämä ja tötike Bibliabätä yebätä nitre kwati nämä ñäke ti rüere. Akwa ti muko nämä ti dimike. Nämä niere tie: ‘Nitre tä dre niere ye ti ñaka töibikaire. Mätä ja kwen kwin ye bäri ütiäte ti kräke. Mätä dre nuainne ye mäkwe nuain jankunu’. Nunta nüne bäri kä jutobiti jabe nengwane.” (Viniana)