Ngite juandre ta ni madabiti ye ütiäte krubäte

KUKWE BIBLIABÄTÄ JA JIE NGWANKÄRE: “Munkwe jankunu [...] ngite juan jabiti ta kwärikwäri. Jehovakwe töi kwinbiti ngite juani munbiti ta, ye kwrere munkwe nuain arato” (Colosenses 3:13, TNM).

¿Dre gärätä? Bibliabätä ja mikata ngite ye bämikata rürübän ütiä ye kwrere aune ngite juanta ta ye bämikata rürübän ütiä bianta ye kwrere (Lucas 11:4). Tärä kukwe Bibliabätä mikaka gare tä niere erere, kukwe griekore kwitani “ngite juandre ta” ye abokän “ñaka rürübän ütiä ye kärädre o tuanemetre” meden gärätä. Ye medenbätä, ni mada tä kukwe nuainne abokän tä nemen tare nie akwa nita ja töi mike ngite juentabiti ye ngwane, rürübän ütiä ñaka nienabiti nikwe tä nemen ruin nie. Ngite juandre ta ye abokän ni mada kukwe nuainbare ye namani kwin ni kräke o ñaka nemen tare nie ye ñan ai gärätä jire. Ñakare aune, kukwe tärä abokänbätä ni tädre rubun akwa nita ja töi mike ñaka nemen rubun jankunu.

¿Kukwe nieta ne ütiäte? Ni ngite yebätä ni jökrä tä ja mike ngite (Romanos 3:23). Ye medenbätä ngite juandre ta ni madabiti ye kwin krubäte, ñobätä ñan aune ñongwane ni madakwe ngite juandre ta nibiti nikwe ribedi ye ñaka gare nie. Ne madakäre, nita ngite juen ta ni madabiti ye ngwane, kukwe kwin tä nemen nikwe arato. ¿Kukwe meden?

Nita rubun aune ni ñaka ngite juen ta ni madabiti angwane, nita ja tare nike. Nita rubun angwane ye ñaka raba kä ngwen juto nibätä, raba ni töi kwite aune kukwe tare mike ni kisete. Raba ni mike bren krubäte arato. Doctor Yoichi Chida aune profesor Psicología Andrew Steptoe käkwe kukwe niebare abokän tikani täräkwata tä blite kräkäbätä Journal of the American College of Cardiology tä niere: “Ja tötikani bitinkä nita nemen rubun aune töi käme yebätä angwane, ye tä ni brukwä mike bren arato namani gare”.

Töbike kukwe kwin yebätä mada, nita ngite juen ta ni madabiti ye köböire kukwe kwin tä nemen nikwe. Nita ngite juen ta ni madabiti angwane, nita nüne jäme aune keteitibe bätä nita ja mäke kwin ni madabe. Akwa nita ja ngwen Ngöbö erere arato ye abokän bäri ütiäte, nitre tä ja mike ngite biti tä ja töi kwite ye käre niarata ngite juen ta ni yebiti bätä niara tö ye erere nuainmana nie arato (Marcos 11:25; Efesios 4:32; 5:1).