KUKWE TÄRÄ KWATABÄTÄ: ¿KUKWE METRE NIEDRE YE ÜTIÄTE?
¿Kukwe metre niedre ye ñaka niena ütiäte?
Hitoshi nämene sribire oficina ngwian täinkrä yete Japón. Bati nämene täräkwata ükete ngwian kräke jefe kwe yebe angwane, kukwe ngwarbe tikadre kwe täräkwata yebätä niebare kwe ie. Akwa Hitoshi ñaka raba ye nuainne niebare kwe ie. Yebätä, jefe kwe käkwe kitaikä sribibätä niebare kwe ie, aune ye erere nuainbare kwe.
Sö nikani ta yete, Hitoshi namani ulire krubäte ñobätä ñan aune sribi känti ñaka ni ngökadre kwe ye erere ñaka namani kwen ie. Ñodre, blitabare sribibätä ben angwane, niara ñaka raba kukwe ngwarbe tike täräbätä niebare kwe. Ni blitaka ben ye käkwe niebare ie: “¡Mä töi jene ye!”. Niara ñaka rabadre ja di ngwen nekä mräkä kwe aune ja ketamuko kwe namani niere ie, akwa kukwe metre niedre ye bäri kwin o ñakare ye ñaka namani nüke gare ie. Niara arabe tä niere: “Ti töi nämä ño ye tikwe niedre o ñakare ye ti jataba ngwentari jai”.
Kukwe namani bare Hitoshi yebätä, ye tä mike gare kukwe metre niedre ye ñaka ütiäte ni jökrä kräke. Ñodre, ni ruäre kräke ye ñaka kwin, metrere jondron rürübäinta o kökata yekänti. Kä Sudáfrica yekänti, meri iti käkwe niebare: “Nitre ñaka kukwe metre niere ye aibe ngätäite tita sribire. Aune nitre tö ni tuai ja ngwen niaratre erere ye ñaka nuäre”.
Ni ngökata ye nuainta bäri. Kä nikanina ruäre ta yete, Doctor Robert Feldman, sribikä psicólogo Universidad Massachusetts käkwe kukwe mikani gare jai, ye köböire namani gare ie nitre umbre umbre 60% tätre blite minuto krä jätä ye ngwane tätre ni ngökö bati. Doctor Feldman niebare: “Kukwe rababa gare nunye ye käkwe nun töi mikaba ñan krütare. Nitre tätre kukwe ngwarbe niere mantre jetebe ye nun ñaka nämä nütüre”. Nitre ngökadre ye ñaka nemen kwin jire kräketre, ¿se ñobätä mada kukwe ngwarbe ye nieta kärera niera?
¿Ñobätä ni ngökata, gota aune kukwe mada ngwarbe nieta bäri kä ngrabare tibien? ¿Ñaka kukwe metre niedre ye tä mate ño nitrebätä? Akwa bäri ütiäte, ¿nikwe dre nuaindre ne kwe nikwe ñaka ja ngwandre ye erere?