Ñaka ja töibika

KUKWE NIETA BIBLIABÄTÄ JA JIE NGWANKÄRE: “Munkwe ñan töbika” (Mateo 6:25).

¿Dre gärätä? Jesukwe Kukwe Kädriebare Ngudrebiti Kwin ye ngwane kukwe ye niebare kwe. Diccionario tä blite Bibliabätä tä mike gare, kukwe griegore kwitani “töbika” ye abokän “nita nüne bobre, mrö nikata aune nita jondron täi nike ye ngwane ni töita nemen ño” ye gärätä. Ruäre ngwane, jondron raba nemen bare ja känenkäre ye tä ni mike töbike krubäte. Nita dre dre ribere jai aune ni töta nemen nitre tare nikwe ye tuai nüne ño ye raba ni mike töbike arato (Filipenses 2:20). Akwa “munkwe ñan töbika” niebare Jesukwe ye ngwane, dre dre rabai bare ja känenkäre yebätä ni tädre töbike krubäte aune ni ñaka tädre nüne kä jutobiti ye ñan aibätä blitabare kwe (Mateo 6:31, 34).

¿Kukwe ne kwin ni kräke? Jesukwe kukwe kwin krubäte niebare. Tärä ruäre tä mike gare, ni ñaka töbikakwe ye denkä ja töite angwane, ja ñaka nemen ruin kwin ngrabare nie. Tärä ye tä mike gare arato, töbikakwe ye raba “ni mike bren úlceras kisete, ni brukwä raba nemen bren aune ni raba nemen bren asma kisete”.

Ñobätä ni ñaka rabadre töbike krubäte ye Jesukwe mikani gare metre: ye ngwarbe niebare kwe. Niebare kwe: “¿Munta töbike krubäte ye köböire, mun meden raba kä krötöte chi nünankäre bäri raire?” (Mateo 6:27, TNM). Nikwe töbikai krubäte ye ñan ai köböire nikwe nünain bäri. Ne madakäre, kukwe ruäre rabai bare nita nemen nütüre akwa ye erere ñaka tä nemen bare. Ni iti ie kukwe gare käkwe niebare ye erere: “Dre dre rabai bare ja känenkäre yebätä ni rabadre töbike krubäte ye abokän ngwarbe, aune kukwe ruäre nemen ni ngwen nikenkä ye erere ñaka nemen bare”.

¿Nikwe dre nuaindre ne kwe töbikakwe diandrekä ja töite? Käne, mäkwe tö ngwan Ngöböi. Ngöböta nukwä buke aune tä kri blü mike nirien bä nuäre krubäte, ¿se ñan nitre niara mikaka täte ye ngübai kwe? (Mateo 6:25, 26, 28-30). Ne madakäre, dre rabai bare ja känenkäre yebätä ñaka töbika: kukwe nemen bare mantre jetebe ye aibebätä mäkwe ja töi mika. Jesukwe niebare: “Munkwe ñan töbika dikaro, ñobtä ñan angwane köbö jetbe ye abko jatadi kukwe mdara jire ngwena töbikakrä munye”. Mantre jetebe kukwe jene jene tä nemen bare (Mateo 6:34).

Jesukwe kukwe niebare ye erere nikwe nuaindi angwane, ni ñaka rabai bren töbika ye kisete aune “Ngöbökwe kä jäme jakwe” ye biain nie (Filipenses 4:6, 7).