¿BIBLIA TÄ DRE NIERE?
¿Nita krüte ye ngwane dreta nakainkä?
NITRE RUÄRE TÄTRE NÜTÜRE nita niken nüne kä madakänti, akwa nitre mada abokän kräke gata ye ngörä. Aune, ¿mä abokän töita ño?
BIBLIA TÄ NIERE
“Nitre krütanina yei kukwe ñaka gare jire” (Eclesiastés 9:5). Ye medenbätä nita krüte ye ngwane, ni ñaka tärä nemen jire.
¿BIBLIA TÄ DRE MADA NIERE?
Ni kena, Adán, krütani ye ngwane nikaninta dobrote nieta kwe (Génesis 2:7; 3:19). Ye erere arato, ni jökrä tä krüte ye tä nikwiteta dobrore arato (Eclesiastés 3:19, 20).
Ni iti tä krüte ye ngwane, Ngöböta ngite juen ta ni yebiti (Romanos 6:7). Ye medenbätä, tä krüte ye bitikäre mika ñaka ja ngie nuin jankunu ja mikani ngite kwe ye dokwäre.
¿Nitre krütani ye raba nüketa nire?
¿MÄKWE DRE NIEDRE?
Jän
Ñakare
Raba ruin tie
BIBLIA TÄ NIERE
“Nitre [...] krütanina ye gaikröta.” (Hechos 24:15, TNM).
¿BIBLIA TÄ DRE MADA NIERE?
Käre Biblia tä gata ye bämike nita kübien ye kwrere (Juan 11:11-14). Nitre krütani ye Ngöbö raba miketa nüke “ngwäte” nitre tä kübiani nita miketa nüke ngwäte ye kwrere (Job 14:13-15).
Nitre kabre ganinkröta kädrieta Bibliakwe ye tä mike gare nie nitre krütani ye gaikröta (1 Reyes 17:17-24; Lucas 7:11-17; Juan 11:39-44).