Nikren, nitre kwati krubäte

1 ¿Siklo kena namanina krüte ye ngwane apóstol Juan nämäne ja tuin kukwe meden ben?

SIKLO kena namanina krüte ye ngwane apóstol Juan nämäne ja tuin kukwe kri ben. Niara namanina umbre aune nämäne kitani ngite ngutuä mrente kädekata Patmos yekänti. Kä ye ngwane niara aibe namanina mrä apóstol erere (Apoc. 1:9). Nitre ja mikaka kukwe metre rüere ye nämäne nitre konkrekasionte ngökö aune ñäkebiti ye nämäne gare Juan ie. Konkrekasion kristiana ye riaikä bä namani (Jud. 4; Apoc. 2:15, 20; 3:1, 17).

2. Apocalipsis 7:9-14 tä mike gare ye erere, ¿dre ñan tuabare jutuabare Juan ie? (Üai kena täräkwatabätä mikadre ñärärä).

² Kukwe kri ben Juan nämäne ja tuin ye ngwane kukwe ñan tuabare mikani tuare ie. Yete angeletre nibokä nämäne kä tibien nebätä kwärikwäri ye ie murie dite krubäte ye ketabätä mananbare nememe nitre braibe klabore täräi mikaikä ünä ye ngwane (Apoc. 7:1-3). Nitre braibe ye abokän nitre 144,000 käkwe gobrandi Jesube kä kwinbiti (Luc. 12:32; Apoc. 7:4). Ye bitikäre, nitre “kwati kwati krübäte” jutuabare Juan ie. Nitre ye kite juta bätäkä ngwarbe yekri, blite kukwe jene jenebiti aune ni ñan iti raba “tanre jire chi”. Nitre ye tä “nünaninkä kürä gobrankrä Ngöbökwe ken amne ni Kordero kwrere ye ngwärekri” niebare kwe (ñäkädre Apocalipsis 7:9-14 yebätä). Kä ja känenkäre yete nitre täi kwati krubäte Jehová mike täte ye käkwe kä mikani jutobätä.

3. ¿Kukwe ñan tuabare jutuabare Juan ie ye ñobätä tödeka nikwe mikadre dite? b) ¿Dre rabai gare nie kukwe ja tötikara nekänti?

³ Kukwe ñan tuabare jutuabare Juan ie ye käkwe tödeka kwe mikani dite aune ye käkwe tödeka nikwe mikadre dite arato, ñobätä ñan aune kukwe ye tä nemen bare ni näire, ñodre nitre millón kwati krubäte tä näin juta Jehovakwe yete ye nita tuin ja okwä jeñebiti aune niaratre ye rabaite nire ja tare nikadi kri yete. Nitre kwati krubäte ye ngätäite nire nire rabai ye Jehovakwe mikani gare ño juta kwe ie kä nikanina 80 ta yete ye nikwe mikai gare jai kukwe ja tötikara nekänti. Nikwe kukwe ketebu mikai gare jai nitre nebätä: nire nire rabai yete aune nitre nibe ye nikwe mikai gare jai. Kukwe mikai gare jai ye käkwe tödeka nikwe ye mikai dite.

¿NITRE KWATI KRUBÄTE YE NÜNANDI MEDENTE?

4. ¿Dre ñaka nüke gare nitre ja bianka kristiano yei akwa ja mräkätre ja tötikaka Bibliabätä yei dre nämänena gare?

⁴ Kä nengwane nitre kukwe ngwarbe mikaka täte tä driere nitre ja ngwanka kwin ye jökrä ñaka nünain kärekäre kä tibienbätä (2 Cor. 4:3, 4). Ñakare aune, nitre töi kwin tä krüte ngwane, näin kä kwinbiti ye iglesia keta kabre ja bianka kristiano tä driere. Akwa, siklo 19 jatani krüte ye ngwane ja mräkätre braibe ja tötikaka Bibliabätä nämäne täräkwata Ni Mikaka Mokre sribere ye ñaka nämäne kukwe ye erere mike täte. Ngöbökwe kä tibien ne sribei bä nuäre aune nitre kwati krubäte ja ngwanka metre ye käkwe nünain kä tibien nebätä aune ñaka kä kwinbätä ye nükani gare ietre. Akwa yebiti ta nitre kwati krubäte ja ngwanka metre ye nire nire ñaka namani gare jötrö ietre (Mat. 6:10).

5. ¿Dre nämänena gare ja mräkätre ie nitre 144,000 yebätä?

⁵ Nitre ruäre kökadi nitre kä tibienbätä ngätäite gobrankäre kä kwinbiti Jesube drieta Bibliakwe ye nükani gare ja mräkätre ja tötikaka Bibliabätä ie arato (Apoc. 14:3). Nitre ye 144,000 ja ngwanka metre Ngöböi. Akwa ¿nitre kwati krubäte jutuabare Juan ie ye abokän nire nire?

6. ¿Nitre kwati krubäte yebätä ja mräkätre nämäne töbike ño?

⁶ Nitre kwati krubäte jutuabare Juan ie kürä gobrankäre Ngöbökwe ngwärekri aune Cordero ye ngwärekri nieta Bibliakwe (Apoc. 7:9). Yebätä, ja mräkätre namani nütüre nitre kwati krubäte ye näin siba kä kwinbiti. Akwa, ¿ñobätä nitre ye ñaka ja erebe nitre 144,000 yebe? Ñan ñobätä aune nitre kwati krubäte ye ñaka Ngöbö mikani täte ja nire tätebiti. Niaratre ye ñaka nämäne ja ngwen blo akwa ruäre nämäne iglesia ngwarbe yete, aisete ñaka raba gobrane Jesube. Nämäne kä kwinbiti kürä gobrankäre Ngöbökwe ye ngwärekri akwa niaratre ñaka Ngöbö tarebare ja brukwä tätebiti yebätä ñaka kürä biani ietre gobrankäre siba.

7. a) ¿Kä mil te ye näire nire nire käkwe nünain kä tibienbätä nütü nämäne ja mräkätre yekwe? b) ¿Nitre Ngöbö mikani täte Kristo känenkri yebätä ja mräkätre nämäne töbike ño?

⁷ ¿Se abokän nirekwe nünandi kä tibienbätä? Ja mräkätre ja tötikaka Bibliabätä nämäne töbike kore: nitre 144,000 bätä nitre kwati krubäte jutuabare Juan ie ye näin kä kwinbiti ye bitikäre, nitre mada millón kwati abokän käkwe nünain kä tibien nebätä Kristo käkwe gobrandi kä mil te yete. Kristo rabaira gobrane kä mil te ye ngwane batibe kukwe metre Ngöböbätä ye driei nitre mada yei. Ye bitikäre nire nire käkwe Ngöbö mikadre täte yekwe ja nire käre rabadre kä tibienbätä akwa nitre ja dokwä mikaka ribi ye gaite ye nütü nämäne ja mräkätre yekwe. Kä mil te ye näire nitre ruäre rabai “ji ngwanka” akwa kä mil ye krütai ngwane nitre ye näin kä kwinbiti arato ye ja mräkätre nämäne nütüre. Nitre ji ngwanka ye ngätäite nitre Ngöbö mikani täte Kristo känenkri ye täi siba nütü nämäne kwetre (Sal. 45:16).

8. ¿Kukwe meden ketamä ja mräkätre nämäne mike era jai?

⁸ Nitre ja tötikaka Bibliabätä nämäne kukwe ne mike era jai. Kena, nitre 144,000 näin kä kwinbiti gobrankäre Jesube. Ketebukäre, nitre kwati krubäte Ngöbö mikai täte akwa ñaka ja nire tätebiti ye rabai kürä gobrankäre Ngöbökwe ngwärekri aune Cordero ngwärekri. Aune ketamäkäre, nitre mada kwati krubäte ye tötikai kukwe Jehovakwe yebätä kä tibienbätä Kristo gobrandi kä mil te ye näire.b Akwa kä namani tuin debe Jehová ie ngwane, nitre niara mikaka täte ye dimikani kwe kukwe ye mike nüke gare bäri kwin jai (Prov. 4:18).

KUKWE METRE YE TRÄ JATANI NGITIEKÄ BÄRI

9. a) ¿Nitre kwati krubäte tädi “kürä gobrankrä Ngöbökwe ken amne ni Kordero kwrere ye ngwärekri” nieta ye tä dre bämike? b) Apocalipsis 7:9 mikani gare bäri kwin, ¿ye ñobätä metre?

⁹ Nitre kwati krubäte jutuabare Juan ie ye nire nire ye nükani gare kwin nitre testiko Jehovakwe ie kä 1935 yete. Nitre ye ñan tädre kä kwinbiti rabakäre kürä gobrankäre Ngöbökwe ngwärekri aune Cordero ngwärekri, aisete kukwe ye tä jondron bämike jerekäbe ye nükani gare ietre. Nitre kwati krubäte ye tädre nüne kä tibienbätä akwa Jehová ye aibe gobranka kri aune niara tuanemetre kwetre ja jie ngwen ngwane niaratre ye tädre “kürä gobrankrä Ngöbökwe ken” ye kwrere bämika raba (Is. 66:1). Aune Jesukwe ja nire biani ni ütiäre yei tödekadre kwetre ngwane, tädre Cordero “ngwärekri” ye kwrere. Kukwe ye erere tä tikani Mateo 25:31, 32 yete. Känti nieta “nitre nünanka kä jökräbti temen” ye ükaikrö Jesús ngwärekri, ye ngätäite nitre käme ye täi siba arato. Nitre ükaikrö kä tibienbätä nieta yete aune ñaka kä kwinbätä. Yebätä, kukwe mrä mikani gare kä 1935 yete ye metre. Nitre kwati krubäte jutuabare Juan ie ye ñobätä ñaka näin kä kwinbätä nieta Bibliakwe ye mikani gare. Nitre 144,000 ye aibe käkwe nünandi kä kwinbiti nitre kä tibienbätä gobrainkäre Jesube (Apoc. 5:10).

10. ¿Ñobätä Jehová kukwei tädre gare kwin nitre kwati krubäte yei Kristo gobrandi kä mil te ye känenkri?

¹⁰ Nitre kwati krubäte jutuabare Juan ie ye nitre kristiano ja ngwanka metre käkwe nünain kärekäre kä tibienbätä ye niena gare ni testiko Jehovakwe ie kä 1935 yete nükebe ni näire. Kukwe tare krubäte “rakadikä ye jökräbätä” nitre ne kwäräbedre yekäre Jehová kukwei tädre gare kwin ietre aune tödeka kwetre tä dite ye rabadre bämike Kristo jämi gobrane kä mil te ye känenkri (Luc. 21:34-36, TNM).

11. ¿Ñobätä ja mräkätre ruäre nämäne nütüre kä mil krütadre ye bitikäre nitre ja ngwani metre Kristo känenkri ye ruäre näin kä kwinbiti?

¹¹ Nikwe miri gare jai párrafo 7 känti ye erere, ja mräkätre ruäre nämäne nütüre kä mil krütadre ye bitikäre nitre ja ngwani metre Kristo känenkri ye ruäre näin kä kwinbiti. ¿Ñobätä nämänentre töbike kore? Täräkwata kädekata nengwane Ni Mikaka Mokre 15 febrero 1913 käkwe kukwe ye erere mikani gare. Aisete nitre kirabe Kristo känenkri bäri ja ngwani metre, ¿se ñobätä ñaka rikadre kä kwinbiti? Töbika nämäne kore kukwe ketebubätä: Kena, nitre kwati krubäte jutuabare juan ie ye käkwe nünain kä kwinbiti aune ketebukäre, nitre kwati krubäte ye ñaka ja ngwani metre krubäte Ngöböi.

12, 13. ¿Dre nüke gare metre nitre dianinkä nänkäre kä kwinbiti ie aune nitre kwati krubäte yei?

¹² Akwa nibira gare nie ye erere, kä 1935 yete ja känenkäre gare kwin nie nitre kwati krubäte jutuabare Juan ie ye ara rabaite nire Armagedón yebätä. Niaratre rabai kwäre kä tibienbätä aune ngwänäinkä krörö kwetre: “¡Ngöböta täkänintbe kürä gobrankräbti amne ni Kordero kwrere, ye aibe köböire nita nebe dianintari jökrä!” (Apoc. 7:10, 14). Ne madakäre, nitre gakröta kä kwinbiti yekwe “jändrän bäri kuin” rabai nitre ja ngwani metre Kristo känenkri ye kräke drieta Bibliakwe (Heb. 11:40). Kukwe mrä mikani gare ye käkwe ja mräkätre töi mikani nitre jökrä nübaire Jehová mike täte ne kwe nüna kärekäre ye rabadre kwetre kä tibienbätä.

¹³ Nitre kwati krubäte ye raba nüne kärekäre kä tibienbätä ye tä kä mike juto bätätre. Nirekwe nünandi kä kwinbiti aune nire rabai kä tibienbätä ye tä gare Jehovai ye nüke gare ietre. Jehovakwe Jesukristo juani ja nire biankäre ni ütiäre ye aibe köböire kukwe kwin tä ja känenkäre nitre dianinkä nänkäre kä kwinbiti kräke aune nitre kwati krubäte nünain kä tibienbätä kräke ye nüke gare metre ietre (Rom. 3:24, TNM).

NITRE KWATI KWATI KRUBÄTE

14. Nitre kristiano nünain kä tibienbätä se ñokänti rabai kwati krubäte, ¿ye ñobätä ja mräkätre namani ngwentari jai?

¹⁴ Kukwe mrä mikani gare kä 1935 yete ye bitikäre, ja mräkätre ruäre namani kukwe ne ngwentari jai, nitre kristiano nünain kä tibienbätä, ¿se ñokänti rabai kwati krubäte? Ñodre, Ronald Parkin biti kä nämäne 12 ye ngwane kukwe mrä ye mikani gare. Niebare kwe: “Kä jökräbiti tibien nitre kukwe driekä nämä 56,000 aune nitre ye bäsi jökrä dianinkä nänkäre kä kwinbiti. Yebätä nitre nünain kä tibienbätä rababa tuin braibe”.

15. ¿Ño nitre jatani nirien kwati krubäte juta Ngöbökwe yete ye mä raba mike gare?

¹⁵ Akwa kä 1935 ye bitikäre nitre misionero juani kä keta kabre känti, ye köböire nitre testiko Jehovakwe jatani nirien bäri. Kä 1968 yete nitre tötika jatani Bibliabätä tärä La verdad que lleva a vida eterna yebiti. Kukwe Bibliabätä ye mika nämäne gare nuäre tärä yebätä ye käkwe nitre töi mikani ja mike kukwebätä. Kä kobokä be te nitre 500,000 biti bäri käkwe ja ngökani ñöte. Kä América Latina yete nitre jatani kämikekä Iglesia católica yebätä aune kä Europa oriental bätä kä África ruäre känti ni tuanimetre sribire jankunu Ngöbö kräke ngwane, nitre mada ja ngökani ñöte (Is. 60:22). Bitinkä, juta Jehovakwe tärä keta kabre sribebarera nitre dimikakäre Biblia mike nüke gare jai. Erametre, nitre kwati krubäte ükakröta aune kä nengwane nitre ye niena 8 millón biti bäri.

NITRE KWATI KRUBÄTE BÄTÄKÄ NGWARBE

16. ¿Nitre kwati krubäte ye kite medenkri?

¹⁶ Ni bätäkä ngwarbe, blite kukwe jene jenebiti aune “nünanka juta bätäkä ngwarbe” te ye kwati krubäte jutuabare Juan ie. Kukwe ye erere bäsi Zacarías ni Ngöbö kukwei niekä käkwe mikani gare. Tikani kwe: “Jehová nitre rükä jie ngwanka tä kukwe ne niere: ‘Köbö ye näire nitre brare ni jätä blite kukwe jene jenebiti ye ja ketaite, jän, ja ketaite kwetre dän ni judiokwe yebätä, aune niedi kwetre: ‘Nun tö näin munbe, ñobätä ñan aune Ngöböta munbe kukwe nuani nunkwe’” (Zac. 8:23).

17. ¿Dre nuainta nitre bätäkä ngwarbe aune blite kukwe jene jenebiti ye dimikakäre?

¹⁷ Gare kwin nie, nitre bätäkä ngwarbe ükadrekrö ye kräke nikwe kukwe kwin ye driedre kukwe jene jenebiti. Yebätä kä nikanina 130 ta yete nita kukwe metre Bibliabätä ye kwite kukwe bätäkä ngwarbebiti. Nita kukwe kwite kä nengwane ye erere nuin ñaka jire ñan ñobätä aune nita tärä kwite kukwe keta kabrebiti. Kukwe ye jökrä tä mike gare Jehová tä jondron ñan tuabare nuainne kä nengwane. Ye abokän nitre kwati krubäte bätäkä ngwarbe ükakröta kwe. Mrö ja üaire ye sribeta kukwe jene jenebiti yebätä nitre kwati krubäte ye tä sribire keteitibe Jehová kräke. Aune ni testiko Jehovakwe ye tä kukwe driere kä jutobiti aune tä ja tarere metre yebätä nüke gare nitre madai. Kukwe ye jökrä tä ni dimike tödeke bäri, ¿ñan ererea?

KUKWE MIKANI TUARE YE DRE GÄRÄTÄ NI KRÄKE

18. a) Isaías 46:10, 11 tä niere ye erere, ¿ñobätä Jehová aibe raba kukwe niebare ye mike nemen bare? b) Nitre tä tö ngwen nüna kä tibienbätä ie, ¿yei ñobätä ja ñaka ruin ngwarbe?

¹⁸ Kukwe niebare abokän namani bare ye tä kä mike juto nibätä aune Jehová aibe raba kukwe ye erere mike nemen bare ye gare metre nie (ñäkädre Isaías 46:10, 11 yebätä).c Nitre kwati krubäte tä tö ngwen nüna kä tibienbätä ie ye ñaka dianinkä gobrankäre Jesube kä kwinbiti akwa ja ñaka ruin ngwarbe, ñakare aune tätre debe bien krubäte Ngöböi nünandi kä tibienbätä kwetre yebätä. Nitre brare aune merire ja ngwanka metre ye üai deme käkwe jie ngwani nieta Bibliakwe. Ñodre, David aune Juan Bautista ye jie ngwani üai deme yekwe akwa niaratre ñaka namani nitre 144,000 ye ngätäite (Mat. 11:11; Hech. 2:34). Nitre ye aune nitre kwati krubäte ye gaikröta kä bä nuäre yete ye ngwane, niaratre tä ja ngwen metre Jehovai aune tä tuenmetre ja gobraine ye rabai bämikadre ietre.

19. Kukwe mikani tuare Juan ie ye nüke gare nie ngwane, ¿nikwe dre nuaindi?

¹⁹ Kä nengwane Jehová tä nitre kwati krubäte kä jökräbiti tibien ükökrö ja mikakäre täte, akwa ye erere ñaka nuainbare kirabe kwe. Nikwe nünandi kä kwinbiti o kä tibienbätä, akwa ni rabadre ja di ngwen nitre jökrä dimike ne kwe rabadre siba “obeja mda mda” kwati krubäte ye ngätäite (Juan 10:16). Kä kitera nemen braibe ja käne ne kwe Jehovakwe gobrantre aune iglesia ngwarbe tä nitre ngwen ja tare nike ye gatekäre. Nitre kwati krubäte nünain kä tibienbätä ye jökrä käkwe sribidi kä jutobiti Jehová kräke kärekäre (Apoc. 7:14).