“Munkwe ja brukwä tökate kri”
1. ¿Ni jökrä rabadre ja töi mike dre nuainne?
1 Ni kristiano ye ni ja mräkäre erere, yebätä ni jökrä rabadre ja töi mike ja mäke kwin ni madabe konkrekasionte (1 Ped. 1:22; 2:17). Yekäre nikwe ‘ja brukwä tökadrete kri’ ni mada tarekäre (2 Cor. 6:12, 13, Ngöbö Täräe, tärä okwä ükaninte). ¿Ñobätä ütiäte nikwe ja mräkätre aune ja ngwaitre ye mikadre gare kwin jai?
2. ¿Nikwe ja ketadre ja mräkätre aune ja ngwaitre ben ye ñobätä ütiäte?
2 Ja ketata bäri kwin. Ja mräkätre aune ja ngwaitre kristiano nemen gare bäri kwin nie ye ngwane, tä tödeke, tä kä ngwen nüke jai aune töi mada mada kwin ye nemen tuin bäri ütiäte nie. Kukwe ñaka kwin nuainta kwetre ye ni ñaka tä mike tuin kukwe kri ye erere jai, aune nita ja kete bäri kwin bentre. Jata nemen gare kwin nie ye ngwane, ja di mikadre ño bäri kwin aune ja töi mikadre ño jäme kwärikwäri ye tä nemen gare nie (1 Tes. 5:11). Ni rabadre “kä mike nuäre kri” jabätä kwärikwäri ne kwe ni rabadre kä ngwen nüke jai kukwe blo Satanakwe yebätä (Col. 4:11, Kukwe Kuin Ngöbökwe). Kä krüte nete ni nuateta kukwe keta kabrebiti, yebätä nitre Jehová mikaka täte ngätäite ja ketamuko kwin tä nikwe ye kwin krubäte ni kräke, ¿ñan ererea? (Pro. 18:24.)
3. ¿Nikwe dre nuaindre kä mikakäre nuäre ni madabätä?
3 Ja ketata kwin ni madabe ye köböire nita nemen dite aune ni töita nemen jäme kukwe kri tä nemen ni kisete ye ngwane (Pro. 17:17). Meri Testiko ie ja nämene nemen ruin ngwarbe tä niere: “Ti nämä kukwe kwin nuainne ye nitre ja ketamuko tikwe nämä niere tie ti dimikakäre ne kwe ja ñaka rabadre ruin ngwarbe tie”. Jehová köböire ja ketamuko ye erere tä nemen nikwe (Pro. 27:9).
4. ¿Ño ni raba ja kete bäri kwin ja mräkätre aune ja ngwaitre konkrekasionte yebe?
4 Nikwe ja töi mikadre ni madabätä. ¿Ño ni raba ja mräkätre kukwebätä ye tarere bäri? Nita kise ngökö ietre gätäte, akwa nikwe ja di ngwandre ja töi mike niaratrebätä ni tädre blite bentre ye ngwane, akwa nikwe ñaka ja mikadre kukwe kwetre yete (Fili. 2:4; 1 Ped. 4:15). Niaratre ütiäte ni kräke ye ni raba bämike ietre kukwe madabiti, ñodre, nikwe kärädre mröre jakänti (Luc. 14:12-14). Ni raba kukwe ükete kukwe driekäre bentre arato (Luc. 10:1). Nita ja töi mike ja mräkätre aune ja ngwaitre mikabätä gare bäri kwin jai angwane, nita keteitibe konkrekasionte (Col. 3:14).
5. ¿Ño ni raba ja kete nitre kwati ben?
5 ¿Nitre ni ririamuko o dre tuin kwin ietre ni erere ye aibe ben nita ja kete? Nikwe ñaka ja töi mikadre ye erere, ñakare aune nikwe ja ketadre ja mräkätre konkrekasionte jökrä ben. David aune Jonatán bätä Rut aune Noemí ye ñaka ja ririamuko bätä ñaka nünanbare ja erebe kwetre, akwa ja ketabare kwin kwetre (Rut 4:15; 1 Sam. 18:1). ¿Ni raba ja kete nitre kwati ben? Ye erere nikwe nuaindi angwane, kukwe kwin rabai bare ni kräke.
6. ¿Nita ja mräkätre aune ja ngwaitre tarere bäri ye ngwane dre kwin tä nemen bare?
6 Nita nitre mada tarere bäri angwane, nita ja mike dite kwärikwäri aune nünanta jäme konkrekasionte. Ne madakäre, nita ja mräkätre aune ja ngwaitre tarere yebätä Jehovakwe kukwe kwin mikai nemen bare ni kräke (Sal. 41:1, 2; Heb. 6:10). Nikwe ja töi mikadre ja mräkätre aune ja ngwaitre kwati mike gare bäri kwin jai.