¿Mä mräkätre kätä ja ükete biare ne kwe rabadrete nire?
1 Kukwe rabai bare nieta Bibliakwe erere nemen bare ye kätä mike gare nitre käme gaite; ye abokän käi nebera ja ken. Kä käme te nita nüne kä nengwane ye bä ja erebe kä nämene Noé näire Ñü Kri jämi näkäin tibien känenkri ye erere (Mat. 24:37-39). Noé “nämene näin Ngöbö metre yebe” ye medenbätä nitre käme ganinte ye ngwane niara namaninte nire (Gén. 6:9). Ye erere arato mikani gare kwe mräkätre kwe yei, ye medenbätä jökrä namaninte nire. ¿Ño ni raba nuainne Noé erere bätä ja ükete ni mräkätre yebe ne kwe nitre käme ye gadrete angwane ni rabadrete nire?
2 Kukwe metre driekä. Noé käkwe “kukwe metre driebare” jankunu kä gre ketebu o gre ketebu biti kwäjätä te (2 Ped. 2:5). Noé käkwe kukwe driebare ye nitre niara näire namani kötaire, angeletre käme käkwe ja bä kwitani ni erere ye namani nitre ye töi kwite o ñakare yebätä namani kukwe ye nuainne. Ni näire, nitre ñaka tö ni kukwe nuai, ni kötaita kukwe drieta nikwe yebätä, ne abokän kätä mike gare kä ne krütai ye nebera ja ken (2 Ped. 3:3, 4). Noé näire nitre käkwe ñaka kukwe mikani täte, akwa ye erere ñaka kä nengwane. Matare ni kwati kätä kukwe Jehovakwe ye mike täte nita ja di ngwen ye köböire (Isa. 2:2). Ni törba ja tuai nemente nire bätä nitre ni kukwe nuaka ye arato, ye angwane nikwe kukwe driedre jankunu (1 Tim. 4:16). Ye medenbätä, mun rüne bätä meyere, ñobätä kukwe driedre ye ütiäte krubäte ye munkwe drie monsotre yei, munkwe nuain ja kukweibiti bätä nuainbiti arato. ¡Nitre tä diandretari nie! (2 Tim. 4:2).
3 “Ye erere nuainbare kwe.” Noé bätä mräkätre kwe ye rabadrete nire gäre, Jehová nämene dre niere ietre ye niaratre käkwe mikadre täte jökrä (Gén. 6:22). Biblia bätä nitre sribikä täte metre kätä kukwe niere nie ye ni tädre “juto biarebe [...] mikakäre täte” arato (Sant. 3:17). Juta Jehovakwe kätä kukwe niere ye erere ni rüne iti käkwe nuainbare. Ñodre, käre nieta nie erere, nämene ja tötike bämän jökrä te mräkätre yebe bätä nämene niken ngwena kukwe driere bämän kratire kratire te. Nämene niken kukwe driere ye ngwane nämene niken monsoitre iti jene jene ben bämän kratire kratire te. “Ye erere nuainbare kwe” jankunu ye käkwe monsotre kwe ye töi kwitani, bätä monsotre ni ti ye jökrä käkwe Jehová mikani täte metre.
4 Kä käme ne gaite ye abokän nitre ñaka ngübare angwane rabai bare (Luc. 12:40). Akwa nikwe nuaindi Noé erere bätä nikwe tödekadi angwane erametre ni tädi ja ükaninte biare ne kwe ni rabadrete nire ni mräkätre yebe (Heb. 11:7).