Ja tötikadre: ütiäte ni tuabitita ye töi mikakäre kukwe mike gare jai
1. ¿Kukwe Ngöbökwe ye driedi ño kä mentebiti tibien?
1 Jesukwe nitre nänkä niarabe ye tötikani kwin “kukwe kwin gobran Ngöbökwe yebätä” driekäre (Mat. 4:23; 9:35). Niarakwe kukwe driebare kä Palestina ye aibe känti, akwa jämi niken kä kwinbiti ye känenkri Jesukwe mikani gare kukwe Ngöbökwe ye driedi kä mentebiti tibien ye köböire “nitre kä jökräbiti tibien mikai ja tötikaka” (Mat. 28:19, 20).
2. ¿Ni mada mikadre ja tötikaka niebare Jesukwe ye mikadre täte gäre nikwe dre nuaindre?
2 Sribi ye rabadre bare gäre nitre törbadre kukwe kwin Gobran Ngöbökwe ye mikai gare jai ye tuadrebitita bati bobu dimikakäre ja mike ja tötikaka metre. Nitre ye tötikadre ne kwe kukwe jökrä driebare Kristokwe ye erere mikadre täte kwetre. Ye medenbätä nikwe ja tötikadre kwin ne kwe ni mada tuabitita ye töi mikadre ja tötike bäri.
3. ¿Nita niken kena ni madakänti ye ngwane nikwe dre nuaindre tuabitikäreta?
3 Kukwe ükate ja käne. Nitre kukwe driekä ruäre tä nemen kena ni madakänti ye ngwane, mrä tätre kukwe ngwentari bätä tätre köbö miketa kukwe ye mikakäre gare. Tätre nikenta bobukäre ye ngwane, tätre blite tärä Enseña yebätä aune ye köböire tätre ja tötika ye kömike.
4. ¿Ñobätä nikwe ñaka täräkwata mrä ye ngübadre ni mada tuabitikäreta?
4 Täräkwata La Atalaya bätä ¡Despertad! ye juanta batibe sö kratire kratire te akwa nikwe ñaka kä ngübadre sö krati ni mada tuabitikäreta. Ñakare aune, täräkwata meden niena ni yekwe yebätä nikwe kukwe kädriedre töi mikakäre kukwe mike gare bäri jai.
5. ¿Ni tö dre nuain ye ñobätä ütiäte tädre ni töibätä?
5 Ni tö dre nuain yebätä ja töi mikadre. Mä jämi niken ni mada tuinbitita ye ngwane, kukwe tikani täräbätä ye mäkwe tuateta bätä mä tö dre nuain ye mäkwe mika ja töibätä; ñodre, täräkwata mikaninte ie yebätä kukwe kadriedre ben o kukwe kädriebare ben ye ererebätä tärä mada biandre ie. Mäkwe blitabare mrä ye ngwane mäkwe kukwe ngwanintari, ye ngwane mä törbai kukwe ye mikai gare. Mäkwe kukwe niedre ye mikakäre gare metre, mäkwe ñäkä Biblia yebätä.
6. ¿Nita niken ni mada tuinbitita ye ngwane drebätä nikwe ja töi mikadre?
6 Drebätä nikwe ja töi mikadre. Nikwe ja töi mikadre ja tötikata Bibliabätä ye kömike ni madabe. Ja mräkä iti janamene ni brare iti tuinbitita ye ngwane ja tötika ye driebare kwe ie, akwa niarakwe ñaka kani ngäbiti. Ye bitikäre ja mräkä ye nikaninta känti aune nikani täräkwata mrä ye ngwena ie bätä niebare kwe ie: “Nunta nere yebätä, nitre kätä kukwe Bibliabätä ngwentari ye nun tönibi mikai gare ietre”. Ja mräkä käkwe ni ye tuanimetre blite, ye bitikäre ñäkäbare kwe texto kwatibätä Biblia yebätä ie bätä tärä kwati biti nita ni mada tötike yebätä ñäkäbare kwe párrafo kratibätä ie arato. Aune ye köböire ja tötika kömikani kwe.
7. ¿Ja tötikata ye käkwe mä dimikanina ño ja tötika Bibliabätä ye kömikakäre?
7 Nikwe kä diandrekä jai ja tötikakäre ni mada tuabitikäre ye nuain ñaka ngwarbe. Sribi Ngöbökwe ye käi rabai bäri juto nibätä bätä nire ‘töi tärä bökän metre’ ji ja nire kökwäre ye diankäre ja käne ye ni raba dimike (Hech. 13:48).