Mäkwe tötika Jehová tarere
1. ¿Dre kätä nitre ruäre töimike nökrö Jehová ken?
1 ¿Blitabare kena Jehová yebätä mäbe ye törö mäi? ¿Dre käkwe mä töi mikani nökrö Niara ken? Nitre kwati brukwä kwin ye käkwe niedi, Ngöbö ye töi kwin keta kabre abokän keta ñaka raba jondron madabätä ye namani gare ietre ye käkwe töi mikani nökrö niara ken, metrere ni tuin bobre ie bätä ni tare kwe yebätä (1 Juan 4:8).
2, 3. ¿Ni raba nitre ja tötikaka ye dimike ño tärä Enseña yebiti ne kwe Jehová rabadre bäri tare kwe?
2 “Ne abokän Ngöbö nunkwe”. Ni tare Jehovakwe bätä ütiäte krubäte nikwe ja mäkädre metre ben ye mikata gare tärä Enseña yebätä. ¿Tärä nebiti ni raba ni mada tötike ño Jehová tarere bäri? Kukwe mrä kädriedre ye ngwane, ni raba kukwe ütiäte ne kwrere ngwentari: “¿Kukwe metre ne kätä dre mike gare Jehová yebätä?” o ¿“Jehová ye ni Rün bäri kwin krubäte ni törba tuai jakwe ye mikata gare ño kukwe nebiti?”. Ni ja tötikaka ye tötikadre ne kwrere ne kwe rabadre ja mäke metre Jehovabe, ne abokän käkwe nuadi kärekäre.
3 Ja tötikadre Ngöbö itibe nire bätä erametre yebätä ye kukwe ütiäte krubäte. Nita ni ja tötikaka Bibliabätä ye dimike ne mike gare jai ye ngwane, Isaías käkwe niebare erere, niaratre käkwe niedi “Ne abokän Ngöbö nunkwe” (Isa. 25:9). Kukwe Ngöbökwe ye mikadre gare ietre angwane, Ngöbö töi ye erere gobran metre Jesukwe yebiti nitre Kä nebätä yekrä kukwe kwin nuaindi krubäte ye nikwe mikadre gare kwin ietre (Isa. 9:6, 7).
4, 5. ¿Jehová taredre ye dre gärätä?
4 Jehová tareta ye bämikata. Gare nie Jehová taredre ja brukwä tätebiti, ja nire bätä ja töi tätebiti ye abokän ni töi tädre krubäte Ngöbö yekrä ye ñan aibe gärätä. Niara töi ño ye erere nikwe ja töi mikadre aune erere nuaindre käre (Salmo 97:10). Kukwe nieta Ngöbökwe ye mikadre täte metre yebiti bämikata tuare niara tare nikwe. Arato, ja töi mikadre jankunu “ja ngwen kwin deme bätä kukwe Ngöbökwe erere nuaindre”, kukwe tare rükadrekä nibätä bätä ni rüe rabadre ye ngwane (2 Ped. 3:11; 2 Juan 6).
5 Ngöbö tare nikwe yebätä niara tö dre dre ie ye nuaindre ye käita nemen juto nibätä (Sal. 40:8). Kukwe Ngöbökwe jökrä ye sribebare ne kwe kukwe kwin tädre kärekäre nitre Niara mikaka täte yekrä, ye rabadre nüke gare kwin nitre ja tötikaka yei. (Deu. 10: 12, 13). Bätä Jehová kätä kukwe niere ye erere nikwe nünandre, ye ngwane jondron kwin jökrä sribebare Kwe ye käi juto krubäte nibätä bämikata tuare. Nikwe kukwe metre Jehovakwe ye erere nuaindre ye käkwe ñaka kukwe tare mikai ni kisete, ye mäkwe mika nüke gare kwin ni ja tötikaka yei.
6. ¿Nikwe Jehová taredre ye ngwane dre dre kwin raba nemen nikwe?
6 Kukwe kwin tä nitre Ngöbö tarekä yekrä. Nitre kätä Jehová tarere yebätä niara töita krubäte, yebätä “jondron Ngöbökwe ñaka nüke gare kwin” ye tä mike gare ietre (1 Cor. 2: 9, 10). Ngöbö tö dre nuain ne tä nemen gare ietre, ye kätä kukwe ja känenkäre ye mike nüke gare kwin ietre bätä tö ngwan metre tä nemen kwetre (Jer. 29:11). Jehová töi kwin krubäte, nire nire kätä niara tarere yekrä kukwe kwin tä nemen bare (Éxo. 20:6). Aune raba tö ngwen ja nire käre yei tare krubäte Jehovakwe yebätä (Juan 3:16).
7. ¿Nitre mada tötikadre Jehová tarere ye tuin ño mäi?
7 Ni Rün Kä kwinbiti ni tare kwe ye rükai gare bäri kwin nie, aune kukwe rabai bäri ere kädriedre nitre madabe nie (Mat. 13:52). ¡Sribi ütiäte krubäte tä ni kisete! Ni raba ni mada tötike aune bäri metrere monsotre nikwe tötikadre, ne kwe Jehová taredre kwe (Deu. 6:5-7). Ni jökrä, gwaire nitre ja tötikaka yebe, nikwe Jehová käikitadrekä Niara töi kwin krubäte yebätä (Sal. 145:7).