Kä ngwandre nüke jai ye ütiäte krubäte kukwe driekäre
1 Apostol Pablo käkwe kukwe driebare kä 30 biti bäri, sribi mada ütiäte känti ye erere ja tuani kwe kukwe tare ben (2 Cor. 11:23-29). Akwa, Pablo käkwe ñaka ja di ngwani nekä (2 Cor. 4:1). Jehová käkwe ja di biain ie kukwe driekäre jankunu ye ie nämene tö ngwen (Fili. 4:13). Pablo käkwe kä ngwani nüke metre jai yebätä, niebare kwe: “Tikwe ja ngwani Kristo erere, ye erere munkwe ja ngwan ti erere” (1 Cor. 11:1).
2 Kä ngwanta nüke jai kä nengwane. Mantre jetebe ja mräkätre kwati kötaita, nitre mada tätre ja mike rüere bätä mräkätre kwe, sribi muko kwe o nitre kwelate ben tätre ja mike rüere (Mat. 10:35; Juan 15:20). Ñokänti kukwe nemen bare niaratre yebätä ye erere nemen bare mäbätä arato. O mätä ja tuin bren ruäre ben o mätä ja di ngwen mantre jetebe, jadaka bätä tödeka mäkwe nuateta bätä mätä kä ngwen nüke jai ye käi kwitakakäre jabiti. Akwa, nitre kirabe käkwe ja ngwani metre, bätä nitre kristiano kä nengwane käkwe kä ngwanina nüke jai kukwe tarebätä, yebätä mäkwe ja tötikai angwane ye käkwe mä dimikai krubäte (1 Ped. 5:9).
3 “Jondron jökrä rükrä kite Ngöbökri” ye kitadre jabätä ye raba ni dimike kä ngwen nüke jai kukwe driekäre jankunu (Efe. 6:10-13, 15). Oradre kä ngwankäre nüke jai ye ütiäte krubäte arato: Ngöböta üai deme kwe bien nie ne kwe nikwe kä ngwandre nüke jai ni nuateta yebätä gäre (2 Cor. 6:4-7). Ne madakäre, ni tö ganain kukwe ja üaire yebiti angwane, ütiäte krubäte kukwe ngwanta törö Ngöbökwe ye nikwe mikadre täte, ne kwe ni rabadreta dite (Sal. 119:24, 85-88). Monso käkwe ñäkädre bati bobu tärä juandre rünkwe ie yebätä, ye erere ni tö ñäkäi mantre jetebe Biblia yebätä ne kwe nita ja mäke Jehovabe ye rabadre bäri dite. Ja tötika Bibliabätä mantre jetebe, ye raba ni mike töbätä ja tuakäre kukwe tare ben, aune ye raba ni töi mike jondron nuainbätä Ngöbö töi ye erere bätä nita ja ngwen metre ye mikakäre dite (Pro. 2:10, 11).
4 Kä ngwan nüke jai köböire kukwe kwin raba nemen nikwe. Namani bare Pablobätä ye erere, nita kä ngwen nüke metre jai kukwe driebätä ye kätä kä mike juto Jehová brukwäbätä aune kukwe kwin tä nemen bare, nikrä bätä nitre madakrä (Pro. 27:11). Nikwe ja töi mikadre kwatibe kukwe driere jankunu, tödeka nikwe ye kärekäre aune “bäri ütiäte krubäte oro kitata ñukwäte biti tä niken ngwarbe yekrä” ye mikakäre gare (1 Ped. 1:6, 7).