Ani Jehová käikitekä mantre jetebe
1. ¿Ni Ngöbö mikaka täte töita dre nuainbätä aune ñobätä?
1 Rei David käkwe ja töi mikani kwatibe Jehová käikitekä “käre [...,] mantre jetebe” (Sal. 145:2, 7, 21). Kukwe ketakabrebätä ni raba Jehová käikitekä mantre jetebe arato (Sal. 37:10; 145:14, 18; 2 Ped. 3:13).
2. ¿Ni raba Jehová käikitekä ño mantre jetebe ja gwirete?
2 Ja gwirete. Tärä ketakabre sribeta ye abokän raba ni dimike kukwe ja üaire ye kädriere kwin jabe kwärikwäri, nita ja tötike textobätä mantre jetebe, nita ja tötike ni mräkätre yebe bätä nita ja tötike gätäkrä ye ngwane. Nitre ja mräkäre kwati kätä kä denkä jai batibe köböiti mrökäre keteitibe. Ye köböire tätre blite töi jämebiti jabe kwärikwäri aune ñaka nuainne jötrö ngwarbe, ye ngwane Jehová käikitakata kwetre arato. Nitre rüne rabadre ja töimike käne ne erere nuainne, ye käkwe dimikai monsotre kwe, ‘tötike jankunu bätä töi ükete Jehová kukwei yebätä’ (Efe. 6:4; Deu. 6:5-7).
3. ¿Nita nemen keteitibe ja mräkätre kukwebätä yebe ngwane ni raba dre nuainne?
3 Ja mräkätre yebe. Kukwe drieta yekänti bätä gätäte ni raba Jehová käikitekä gwairebe ja mräkätre konkrekasionte yebe (Pro. 15:30; Fili. 4:8; Heb. 13:15). Nita Jehová tarere ye kätä ni mike ja mäke ni madabe, ye medenbätä ni rabadre kukwe kwin erere kädriere jabe kwärikwäri (Sal. 106:1).
4. ¿Kä medenkänti ni raba Jehová käikitekä?
4 Nitre ñaka kukwebätä nibe yebe. Ñaka raba nuäre kukwe driedre nikrä mantre jetebe ju ju te. Akwa ni raba kukwe kwin ye mike gare nitre tö Ngöbö mikai gare jai yei bätä Jehová töita dre nuainbätä ye ni raba kädriere jötrö ngwarbe, nitre sribi muko nikwe, ni mräkätre o nitre nünanka ni bäre yebe (Sal. 27:14; 1 Ped. 3:15). Ja ngwai iti käkwe kukwe mikani gare meri nämene näin ru kwinta te ben yei, kä namani juto meri yebätä aune ja kä bätä numero kwe ye biani kwe ja ngwai yei blitakäre jankunu jabe. Mantre jetebe nitre kä nebätä tä ja tuin bäri kukwe tare ben, akwa nitre Jehová mikaka täte abokän kätä “kukwe kwin [...] jondron bäri kwin yebätä” mike gare jankunu nitre tö Ngöbö mikai gare jai yei. Kukwe ye kätä tödeka bien ie bätä kätä töimike Jehová käikitekä (Isa. 52:7; Rom. 15:11).
5. ¿Ñobätä ni tö Jehová käikitaikä, bätä nuaindre ngwane dre kwin raba nemen nikwe?
5 Nitre Jehová mikaka täte kätä niara käikitekä mantre jetebe ye ¡käi nemen juto krubäte niarabätä! Jondron sribebare kätä Jehová käikitekä mantre jetebe, ye erere ni raba Jehová käikitekä käre arato, ja gwirete, konkrekasionte o nita blite nitre jämi niara mike täte yebe ngwane (Sal. 19:1-4).