Nitre brare ie kukwe driedre ye sribi ütiäte krubäte
1. ¿Dre ribeta jötrö ngwarbe Sribi Ngöbökwe ye nuainkäre?
1 Kä krüte te Sribi Ngöbökwe ye nirien bäri, ye medenbätä ni brare ribeta sribi ye jie ngwen (Mar. 4:30-32; Hech. 20:28; 1 Tim. 3:1-13). Akwa, meritre kätä kukwe Ngöbökwe ye kain ngäbiti bäri nitre brare yekrä. Kä ruäre känti nitre tä nemen nütüre kukwe Ngöbökwe driedre o monsotre tötikadre, ye tä gare meritre ye aibe ie. ¿Nikwe dre nuaindre ne kwe nitre brare käkwe ja töi mikadre kukwe Ngöbökwe yebätä aune Ngöbö metre mikadre täte kwetre gwairebe nibe?
2. ¿Pablo bätä Pedro käkwe kukwe driebare nitre brare ie ye köböire dre kwin namani bare?
2 Nikwe känändre. Nitre rüne ji ngwanka mräkätre käne kätä kukwe metre kain ngäbiti angwane, mräkätre kwe tä nuainne erere arato. Ñodre, Pablo bätä Silas kitani ngite ye ngwane kukwe driebare kwetre ni iti nitre ngite ngübabitikä yei. Ye köböire, ni ye käkwe ja ngökani ñöte bätä mräkätre kwe arato (Hech. 16:25-34). Ne madakäre, Pablokwe kukwe driebare kä Corinto känti ye köböire “Crispo nämane mikani sinagoga ye dänkiene abko käkwe [...] tödekani Jesubti mräkä kwekwe ben gwaire jökrä” (Hech. 18:8, KKN). Arato Jehovakwe Pedro juani kukwe driere ni iti kädeka nämene Cornelio, ni ye abokän nitre rükä jie ngwanka, niara “nämene Ngöbö tarere amne nämene ngöbö mike ütiäte” jai. Cornelio, mräkätre kwe bätä nitre ja ketamuko kwe ye käkwe ja ngökani ñöte (Hech. 10:1-48, KKN).
3. Felipe nuainbare ye erere ¿nitre “sribikä ütiäte ütiäte ” meden abokän ie mä raba kukwe driere?
3 Nitre “sribikä ütiäte ütiäte” ie kukwe driedre angwane kukwe kwin raba nemen bare (1 Tim. 2:1, 2, KKN). Felipe ie angel käkwe kukwe driemana ‘ni ütiäte kri’ nämene ngwian ngübare reina kä etiope känti yei. “Tärä Isaías btä ni [ye] nämene ñäke, ye kukwei jarabare Felipeye” aune Felipe käkwe kukwe kwin mikani gare Jesubätä ie. Ni ye käkwe ja mikani kukwe driekä aune kukwe kwin driebare kwe kä etiope yekänti. Ne madakäre, reina kräke niara nämene ngwian ngübare bätä nitre sribikä yete, yei kukwe driebare, kwe aune ye köböire kukwe kwin mikani gare nitre yei (Hech. 8:26-39).
4. ¿Nikwe dre nuaindre kukwe kwin ye driekäre nitre brare yei?
4 Medente bätä ñongwane kwandre nie. Nitre brare ye jökrä bäsi tätre sribire rare. ¿Mä raba köbö ükete jai kukwe driekäre dere, bämän krüte yebätä o köbö bianta ngwarbe ietre ye ngwane? Mäkwe kukwe driedre bati bobu nitre tä sribire yekänti angwane, nitre brare ñaka kwen gwi mäi yebe mä raba blite. Ja mräkätre brare raba ja di ngwen kukwe driere nitre sribikä ben yei arato. Kä känti kukwe drieta bati bobu, yekänti ja mräkätre brare raba ni brare ju bokänkä ye ngwentari.
5. ¿Nitre brare tö kukwe Ngöbökwe mikai gare jai kwandre ja ngwai merire ie angwane dre nuaindre kwe?
5 Nitre brare tö kukwe metre mikai gare jai kwandre ja ngwai merire ie kukwe driebätä ye ngwane, niara ñaka raba nikenta tuinbiti kaibe. Niara raba nikenta ni ye tuinbiti, muko kwe o ja mräkä mada brare o merire yebe. Ni ye jatadre nirien kukwe ja üairebiti angwane, bäri kwin ja mräkä brare kukwe gare ie käkwe ni ye tuabitidre.
6. Apóstol Pablo erere, ¿nikwe dre nuaindre ne kwe ni kwati käkwe Ngöbö kukwei mikadre täte?
6 Kukwe medenbätä blitadre ben. Apóstol Pablo käkwe kukwe driebare ye ngwane nitre töi ño yebätä töbikabare kwe aune ye ererebätä blitabare kwe bentre, ne kwe ni kwati käkwe Ngöbö kukwei mikadre täte (1 Cor. 9:19-23). Kukwe meden raba nemen tuin ütiäte nitre brare ie, yebätä nikwe töbikadre aune ja tötikadre blitakäre bentre. Ñodre, ngwian ñakare, gobran kwin ñaka bätä ni mräkätre ngübadre ño, kukwe ye jökrä nemen nitre brare ngwen töbike. Arato tätre ngwentari jai: ¿Ñokäre nita nüne? ¿Dre rabai bare kä ja känenkäre yete? bätä ¿Ñobätä Ngöbö ñaka ja tare nikata ye denkä kä nebätä? Nikwe blitadre kukwe nini ne ererebätä angwane, nitre brare raba kukwe Ngöbökwe ye kukwe nuin bäri kwin (Pro. 16:23).
7.¿ Ja ngwaitre muko kwe ñaka kukwebätä rabadre Ju ja Ükarakrö yete angwane nitre konkrekasionte käkwe dre nuaindre?
7 Ja ngwaitre muko kwe ñaka kukwebätä ye dimikadre ño. Ja ngwaitre merire ja ngwen kwin ye köböire raba muko kwe ñaka kukwebätä ye töi kwite, ye erere arato nitre jökrä konkrekasionte raba nuainne (1 Ped. 3:1-4). Ja ngwaitre merire rikadre muko kwe yebe Ju ja Ükarakrö yete aune nikwe kadre ngäbiti töi kwinbiti angwane nita kukwe kwin bämike muko kwe yekrä. Nitre brare tä kwen gätäbätä ye kätä mike gare niara tö kukwe metre ye mikai gare jai aune raba ja tötika Bibliabätä ye kain ngäbiti.
8. ¿ Ja ngwaitre muko ñan tö kukwe mikai gare jai ye ngwane nitre brare konkrekasionte raba dre nuainne?
8 Nitre brare ruäre ñaka töta nemen kena kukwe Ngöbökwe ye kukwe nuai, akwa ja mräkä ruäre mate kwin ni yebätä; yebe raba bätärekä jatäri kukwe Bibliabätä ye kädriere. Ñodre, konkrekasion keteiti känti ja ngwai merire iti, abokän muko kwe ñaka nämene kukwebätä ja mräkätre ruäre käkwe ja töi mikani niaratre ye tuinbiti, ne kwe kukwe meden ütiäte muko kwe yekrä yebätä blitadre ben. Ja mräkätre käkwe ye nuainbare aune ye köböire ni ye käkwe ja tötika Bibliabätä kani ngäbiti, ye bitikäre ja ngökani ñöte kwe. Ne madakäre, ja mräkä iti käkwe ja ngwai merire muko kwe ñaka kukwebätä ye dimikani ki ketekä ju kwe bäre ta. Ja mräkä käkwe ja töi mikani ne nuainne ye köböire ni ye käkwe ja tötika Bibliabätä ye kani ngäbiti (Gál. 6:10; Fili. 2:4). Ja mräkätre brare, ¿ja ngwaitre muko kwe ñaka kukwebätä yei ni raba kukwe driere?
9. ¿ Ja mräkätre brare dimikadre sribikäre konkrekasionte angwane dre raba nemen bare?
9 Dimikadre sribi mada ka ngäbitikäre. Nitre brare kätä kukwe Ngöbökwe kain ngäbiti, aune tä ja di ngwen sribi Ngöbökwe mada ka ngäbitikäre, angwane nitre brare ye kädeka raba ni umbre kwrere aune kukwe jökrä gare ie yebiti raba konkrekasion dimike (Efe. 4:8; Sal. 68:18). Nitre ye tä sribi ye nuainne kwin bätä kä jutobiti aune tätre nemen ni obeja ngübaka ye kwere (1 Ped. 5:2, 3). Nitre brare käkwe sribidre juta Jehovakwe yekrä ye ¡ütiäte krübäte ja mräkä jökrä kräke!
10. ¿Ananías käkwe Pablo dimikani ye kätä nitre kwati dimike ño?
10 Saulo nämene ja mike nitre kristiano rüere, akwa biti namani kukwe driekä nitre jökrä ie (Rom. 11:13). Ye medenbätä, Jesús käkwe Ananías juani kukwe driere ie, ye ngwane ñaka tö namani nuain, akwa biti nuainbare kwe. Ye ngwane Saulo namani apóstol Pablo. Pablokwe kukwe driebare, ye käkwe nitre kwati dimikani kä ye näire. Kukwe Ngöbökwe tikani kwe ye tä nitre kwati dimike kä nengwane arato (Hech. 9:3-19; 2 Tim. 3:16, 17).
11. ¿Ñobätä ni rabadre kukwe ükete kwin jai kukwe driekäre nitre brare ie?
11 Ye medenbätä, ni rabadre kukwe ükete kwin jai, ne kwe sribita ni kisete: kukwe driekäre nitre brare ie, ye ni rabadre nuainne. Ngöbö kätä dre ribere nie ye erere nita ja di ngwen nuainne bätä sribi mikani ni kisete ye nita ngübare kwin, yebätä Jehovakwe kukwe kwin mikai nemen bare nikrä.