Nikwe kukwe mikadre gare ño
1. ¿Ñobätä nikwe kukwe mikadre gare Jesukwe nuainbare ye erere?
1 Nitre nämene kukwe ngwentari Jesús ie, ye niarakwe mikani gare kwin ietre, ye abokän nitre kwati ie tuin ütiäte kä nengwane. Kukwe ngwantarita nie kukwe drieta nikwe yekänti, ye mikakäre gare yekrä Jesukwe kukwe kwin bämikani nikrä (1 Ped. 2:21).
2. Kukwe mikadre gare kwin, ¿yekäre nikwe dre nuaindre?
2 Kukwe nuadre käne. Nitre nämene töbike ño yebätä Jesús nämene töbike. Jesukwe nuainbare erere, ruäre ni raba kukwe mada ngwentari. Ñodre, ni iti käkwe niedre: “¿Munta Jesús mike täte?”, akwa metrere ni ye tö gai ñobätä ni ñaka bieta Navidad nuainne. Kukwe meden metrere nitre tö mikai gare jai, ye rabadre gare nie angwane ni raba kukwe mike gare kwin ietre (Luc. 10:25-37).
3. ¿Medente kukwe kwin raba kwen nie kukwe mikakäre gare?
3 Biblia yebiti blitadre. Biblia yebiti kukwe mikadre gare ye bäri ütiäte (2 Tim. 3:16, 17; Heb. 4:12). Tärä Razonamiento bätä sesion “Temas bíblicos para consideración” tä Traducción del Nuevo Mundo de las Santas Escrituras yebätä, ye raba ni dimike kukwe mike gare kwin. Ni ie kukwe driedre ye ñaka Biblia mike ütiäte jai, akwa nikwe ja di ngwandre bätä töbikadre kwin ne kwe kukwe nieta Bibliabätä ye mikadre gare ie. Biblia ye kirabe nükebe kä nengwane tä kukwe kwin mike gare ni jökrä ie, ye medenbätä nikwe ni ye mikadre töbike kukwe ütiäte yebätä. Nikwe kukwe mikadre gare Jesukwe nuainbare ye erere angwane, kukwe nieta nikwe ye rabai ‘manzana orore mikani blato ütiäte te ye kwrere’, ye abokän kukwe kwin niedre ni madai meden gärätä (Pro. 25:11).
4. ¿Ñongwane ni ñaka raba kukwe mike gare ni madai?
4 ¿Ñongwane kukwe mikadre gare? Kukwe meden mikadre gare ye ñaka gare mäi angwane mäkwe ñaka kä jürä ngwan jabätä. Mä raba kukwe ne niere: “Kukwe ye ñan törö tie, akwa tikwe ja tötikai biti ti raba kiteta mikakäre gare mäi”. Mäkwe ja töimika bobre bätä mä tö ni ye dimikai angwane, ye raba ni ye töimike mä kukwe nuinta bobukäreta. Akwa ni ie kukwe driedre ye käkwe ja mikadre ni rüere angwane nikwe nuaindre Jesús nuainbare ye erere: ñaka kukwe mada niedre ie (Luc. 20:1-8). Ye erere arato nire ñaka tö kukwe metre ye mikai gare jai bätä törbadre jerekäbe ñäkäi jai nibe angwane nikwe ñaka blitadre jankunu ben, ñakare aune nikwe nire tö kukwe mikai gare jai ye känändre (Mat. 7:6).
5. ¿Jesukwe kukwe bämikani nikrä ye kätä dre driere nie kukwe mikakäre gare?
5 Jesús käkwe ja di käräbare Jehovai “kukwe era erere” niekäre bätä kukwe mikakäre gare (Juan 18:37, Kukwe Kuin Ngöbökwe [KKN]). Jesús käkwe kukwe kwin bämikani nikrä, ne kwe nikwe kukwe mikadre gare ‘nire nire tö nünain kärekäre’ yei (Hech. 13:48.)