¡Kukwe driedre ye ütiäte krubäte!

1. ¿Kukwe meden niebare Pablokwe abokän nikwe nuaindre kä nengwane?

¹ “Mä raba juto biare Ngöbö kukwei niekäre” ni madai (2 Tim. 4:2, Kukwe Kuin Ngöbökwe [KKN]). ¿Kukwe niebare Pablokwe ye ñobätä ütiäte krubäte nikrä? ¿Kukwe ye raba ni bätä nitre mada dimike ño?

2. ¿Ñobätä nita ja töimike kukwe driere nitre jämi kukwe kwin Ngöbökwe kukwe nuin yei?

² Nitre diantaridre. Erametre ni kwati jämi kukwe kwin Ngöbökwe ja nirekrä ye kukwe nuin (Rom. 10:​13-​15; 1 Tim. 4:​16). Kä känti nita kukwe driere, yete nitre ye tä nüne. Nikwe kukwe driedre köbö o ora jene jene te, ye köböire ni raba blite nitre ñaka kwen gwi nie yebe. Ja töi mikadre kukwe driere jötrö ngwarbe nitre yei, ye käkwe ni töimikai jäme aune ja ñaka rabai ruin ngite nie kukwe drie yebätä (Hech. 20:26).

3. ¿Nikwe dre nuaindre kukwe driekäre nitre madai?

³ Nitre kristiano kena ye rüe namani, akwa niaratre käkwe kukwe “diri[bare] ni jökräye Jerusalén” yete (Hech. 5:​28, KKN). ¿Niaratre ye erere nita ja töimike “kukwe kwin driere ni jökrä ie”? (Hech. 10:​42, KKN) ¿Kä diankata jai kukwe driekäre ye erere nita nuainne kwin? Ni tädre jite ja mräkä mada ngübare, ¿ye ngwane ni raba kukwe driere nitre mada yei?

4. ¿Nita ja töimike kukwe driere ye kätä ni dimike ño ja ngwen mokre?

⁴ Ni mikata mokre. Nitre käme gaite ye käi nibira no, ye medenbätä ütiäte krubäte nikwe ja ngwandre mokre (1 Tes. 5:​1-6). Gobran Ngöbökwe kukwei yei nita tö ngwen bätä nita blite käre kukwe yebätä, ye ngwane kukwe kä nebätä ñaka raba ni di ngwen nekä (Luc. 21: 34-​36). Nikwe köbö Jehovákwe ngwandre törö jai angwane ye käkwe ni töimikai kukwe driere bäri nitre diantarikäre (2 Ped. 3:​11,12).

5. ¿Ni tö nitre tuai nemente nire yebätä nita ja töimike dre nuainne?

⁵ Nita juto biare kukwe driekäre angwane nita ja töimike Jehová erere, ne ñan ñobätä aune “niara ñan tö ni[tre] tuai nete, akwa niara tö ni jökrä tuai ja töi kwite” (2 Ped. 3:​9, Ngöbö Täräe [NGT] (tärä okwä ükaninte mrä); Eze. 33:11). Ye medenbätä, ¡nikwe ja töi mikadre kwatibe kukwe driere nitre jökrä ie Jehová käikitakakäre! (Sal. 109:30.)