‘Ja nire tätebiti nikwe ni ja tötikaka dimikadre’
1. ¿Nikwe dre nuaindre ni ja tötikaka dimikakäre?
1 Ni ja tötikaka käkwe ja ngökadre ñöte, yekäre nikwe ñan jerekäbe tötikadre käre Bibliabätä. Ni meyere tä monso kwe tarere, ye erere Pablo käkwe bämikani nämene nitre ja tötikaka mrä kwe ye tarere. Ye erere arato ni törbadre ni ja tötikaka nikwe tuai nirien kukwe ja üaire yebiti angwane ni rabadre “juto ja nire jakwe bi[en]” dimikakäre (1 Tes. 2:7-9, NGT, (tärä okwä ükaninte mrä)).
2. ¿Ñobätä nikwe ja töi mikadre ni ja tötikaka yebätä aune nuaindre ño?
2 Ja töi mikadrebätä. Ni ja tötikaka kätä kukwe drieta ie ye erere nuainne, ye käkwe töimikai ñaka ja kete nitre ñaka Ngöbö kukwei mike täte yebe (1 Ped. 4:4). Kukwe yebätä mräkätre kwe raba ja mike niara rüere (Mat. 10: 34-36). Akwa ja ñaka rabadre ruin kaibe ie yekäre, nikwe taredre bäri bätä ja töi mikadre dimike. Misionero iti käkwe kukwe ne niebare abokän raba ni dimike: “Ja tötikata ni madabe ye krütadre angwane ni ñaka rikadre bengwairebe; raba nemen angwane ni raba ja mikete blitakäre bäri ben”. Nitre ja tötikaka kätä dre ribere jai yebätä mäkwe ja töimika dimikakäre. Ñodre, ¿tädre bren ye ngwane ni raba ñäke teléfono yebiti ie o niken tuinbiti? ¿Ni raba täke gätäte niaratre ken dimikakäre monso kia kwe yebätä?
3. ¿Ni raba dre nuainne ne kwe konkrekasion käkwe ni ja tötikaka ye dimikadre?
3 Konkrekasion raba dimike. Kä känti nita kukwe driere yekänti ni ja tötikaka nikwe tä nüne angwane, ¿ni raba niken känti bätä ja mräkätre mada mike gare ie? Raba nemen aune mä raba nitre kukwe driekä mada o ni umbre nübaire ni ja tötikaka ye tötike. Arato, rabadrera ja tötike nibe angwane nikwe nübaidre Ju ja Ükarakrö yete. Ye käkwe dimikai ja mäke kwin ja mräkätre konkrekasionte yebe aune niaratre rabai ni ja mräkäre kwrere ja üairebiti (Mar. 10:29, 30; Heb. 10:24, 25).
4. ¿Nikwe ja di ngwandre ni mada dimike angwane kukwe meden kwin raba nemen bare?
4 Ni rüne kätä ja di ngwen monso kwe dimike ririakäre kukwe ja üairebiti, aune monso ye käkwe Jehová mikadre täte bätä ja mikadre kukwe metre yekri angwane, ye kätä kä mike juto rünbätä (3 Juan 4). Ye erere arato nita ja nire tätebiti ni ja tötikaka dimike angwane ye kätä kä mike juto krubäte nibätä.