‘Jakwre, mä jata ti jiebiti’
1. ¿Ja tötika Bibliabätä Konkrekasionte sö madabätä ye käkwe ni töimikai dre nuainne?
1 Jesús nükani Kä tibienbätä ye ngwane dre dre nuainbare kwe ye tärä ketabäkä Bibliabätä tä mike gare kwin metre. Tärä “Ven, sé mi seguidor” yebätä ja tötikai bämän 1 marzo ja känenkäre, ye medenbätä nikwe Ja tötika Bibliabätä Konkrekasionte yei olo ketadrete kwin aune ja tötikadre kwin ne kwe nikwe “nändre deme jiebiti erametre” (1 Ped. 2:21; Mar. 10:21). Ja tötika yebätä kukwe meden käkwe ni dimikai kukwe driere yebätä nikwe töbikadre kwin.
2. ¿Jesukwe kä ngwani nüke jai ye raba ni dimike ño?
2 Jesús kukwe bämikani nikrä. ¿Mätä kukwe driere ju ju te aune nitre ñaka töta mä kukwe nuai ye ngwane jata nemen ruin ño mäi? Jesukwe kukwe niebare ye raba nüke törö mäi: “Ni ruäre tä näin kisere ti jiebiti ti mikakäre ja tare nike, ye kwrere arato nändi mun jiebiti kwetre mun mikakäre ja tare nike” (Juan 15:20, KKN). Erametre, nitre ñaka tä ni kukwe nuin akwa ye ñaka tä mike gare niaratre tä ja mike ni rüere. Jesukwe ja tuani kukwe keta kabre ben, akwa Ngöbökwe kukwe käbämikani ie, ye käkwe niara dimikani kä ngwen nüke jai. Nita kä mike juto Jehovabätä aune nita tö ngwen kukwe käbämikata kwe yei aune ye käkwe ni dimikai kä ngwen nüke jai (Heb. 12:2, 3; Pro. 27:11). Nikwe kä ngwain nüke jai kukwe driekäre, ye ngwane Kristo Jesús käkwe ni dimikai jankunu (Mat. 28:20).
3. ¿Jesukwe kukwe driebare ye erere ni raba nuainne ño arato?
3 ‘Kukwe nekrä ti juani.’ Gobran Ngöbökwe kukwei driedre yebätä Jesukwe ja töimikani bäri (Luc. 4:43). Niarakwe ja di tätebiti kukwe driebare, ñobätä ñan angwane, kukwe ye mikadre gare jötrö ngwarbe nitre madai ye nämene gare ie ye medenbätä nämene käre Gobran Ngöbökwe yebätä blite. Ye erere arato, nita näin niara jiebiti. ¿Kukwe nuainbare kwe ye tä dre driere nie? ¿Kä jökrä känti ni raba kukwe kwin driere? Kristo tare nikwe angwane ye käkwe ni töimikai kukwe kwin driere bäri ja di ngöibiti (2 Cor. 5:14).
4. ¿Nikwe dre nuaindre kukwe driekäre bäri kwin?
4 “Ni blite [...] ni ye kwrere nunkwe ñan tuabare jire.” Jesús nämene kukwe driere yebätä nitre töi ñan namani krütare (Juan 7:46, KKN; Mat. 7:28, 29). ¿Ñobätä? ¿Kukwe meden känti niara nämene ñaka dirire ja erebe nitre mada dirikä yebe? Niara nämene nitre aune kukwe metre tarere, nämene kukwe bämike kwin ne kwe rükadre gare nitre yei. Ni Dirikä Bäri Kri ye erere nikwe nuaindre angwane nikwe kukwe driei bäri kwin (Luc. 6:40).
5. ¿Tärä “Ven, sé mi seguidor” yebätä ja tötikadre angwane nikwe ja töi mikadre dre nuainne?
5 Nete kukwe ütiäte kwati kubu nibi gare Jesubätä nie. ¿Kukwe mada ütiäte niarabätä raba kwen ño mäi? Ja tötikadre Ja tötika Bibliabätä Konkrekasionte ye ngwane mäkwe ja töimika “Kristota ni tarere kri” ye mikakäre gare bäri jai, ne kwe niarakwe dre niebare bätä dre nuainbare ye bämikakäre (Efe. 3:19, KKN).