Mä raba ni mada töi kwite kukwe drieta yebiti
1. ¿Dre nuaindre Kukwe Ngöbökwe driekäre kwin?
1 Apóstol Pablo erere nitre kukwe driekä kwin, ie nüke gare “Ngöbö kukwei diri[dre] metre,” ye abokän ñan ñäkädre jerekäbe Bibliabätä (2 Timoteo 2:15, Kukwe Kwin Ngöbökwe [KKN]). ¿Nitre ie kukwe drieta rabadre ja töi kwite yekäre nikwe dre nuaindre? (Hech. 28:23.)
2. ¿Nikwe dre nuaindre ne kwe nitre käkwe Kukwe Ngöbökwe ye mikadre tuin ütiäte jai?
2 Ñäkädre Kukwe Ngöbökwe yebätä. Kena, ñäkädre Bibliabätä, ne kwe kukwe nietabätä ye kukwe Ngöbökwe rabadre gare ni madai aune mikadre tuin ütiäte kwe jai. Kukwe Ngöbökwe yebätä nikwe ñäkädre kä jutobiti angwane textobätä nita ñäke ye raba nitre mada ye töimike ni kukwe nuin arato (Heb. 4:12). Ni raba niere krörö: “Kukwe Ngöbökwe kätä dre niere kukwe yebätä ye käkwe ti dimikanina krubäte. Ani ñäkebätä.” Nikwe ja töi mikadre käre ñäke metrere Biblia yebätä ni madai.
3. ¿Nikwe dre nuaindre ne kwe texto rükadre gare kwin nitre ni kukwe nuaka yei?
3 Ketebu, kukwe nieta textobätä ye mikadre gare. Ni kwati kätä texto kukwe nuin kena, ye ngwane dre mikata gare texto yebätä ye ñaka tä nüke gare bengwairebe ietre. Ye medenbätä, kukwe medenbätä nita blite ye nikwe mikadre gare kwin ni madai (Luc. 24:26, 27). Kukwe meden ni tö driei ye nikwe kädekadrete bati bobu. Arato, kukwe ngwandretari ni madai ne kwe rabadre gare nie kukwe ye nüke gare ie o ñakare (Pro. 20:5; Hech. 8:30).
4. ¿Kukwe meden ketamäkäre ni raba nuainne nitre mada töi kwitakäre?
4 Biblia yebiti nitre töi kwitadre. Ketamä, nitre ni kukwe nuaka ye töite bätä brukwäte nikwe kukwe ye mikadre nemen. Texto raba dimike ño ye nikwe mikadre gare ie. Kukwe mikadre gare Biblia yebiti angwane, ni raba dimike kukwe ye mike tuin metre jai aune raba ja töi kwite (Hech. 17:2-4; 19:8). Ñodre, ñäkädre Salmo 83:18 ye bitikäre ni raba niere, ni iti kä rabadre gare nie ye ütiäte krubäte ja ketakäre kwin ni yebe. Ye bitikäre ni raba ngwentari ie: “¿Mäkwe Ngöbö kä ye kädekadrete aune ye köböire mä raba orasion nuainne bäri kwin raba ruin mäi?” Nitre töita ño ye ererebätä ñäkädre textobätä, ne kwe kukwe Bibliabätä ye rabadre tuin ütiäte ietre. Nikwe kukwe driedre nitre töi kwitakäre angwane, ye raba niaratre töimike Jehová, Ngöbö metre ye mike täte (Jer. 10:10).