‘Ñaka kä jürä ngwan jabätä’
1. Jeremías erere, ¿kukwe meden ben ni raba ja tuin?
1 Jeremías kädekani ni Ngöbö kukwei niekä, ye ngwane ja ñaka namani törö ie sribi ye nuainkäre. Akwa Jehovakwe niebare ie: “Mäkwe ñaka [...] jürä ngwan jabätä”. Aune dimikani kwe sribi ye nuainne (Jer. 1:6-10). Ye erere arato, ni mada käkwe dre niedre nie kukwe drieta nikwe yebätä, ye jürätä nemen nibätä o ruäre ngwane ja ñaka tä nemen törö nie kukwe driekäre. ¿Dre käkwe ni dimikai ñaka kä jürä ngwen jabätä? ¿Kukwe meden kwin rabai nikwe?
2. ¿Ja ükadrete kwin käne ye raba ni dimike ño?
2 Ja kitadre käne. Nikwe ja ükadrete kwin käne ne kwe kä jürä ñaka rabadre nibätä. Ñodre, kukwe drieta nikwe ye rüere ñäkädre ye ngwane ni raba kukwe ye mike gare ño yebätä ja kitadre käne (Pro. 15:28). Nita Ja tötike ni Mräkätre yebe, ye ngwane kukwe meden ben tätre ja tuin kwelate o kukwe drieta yekänti yebätä ja kitadre (1 Ped. 3:15.)
3. ¿Ñobätä ütiäte krubäte nikwe tö ngwandre Jehovai?
3 Tö ngwandre Jehovai. Jehová ja ketamuko kwin nikwe; ye medenbätä, kä jürä rabadre nibätä ye ngwane tö ngwandre ie aune niarakwe ni dimikai (Isa. 41:10-13). ¿Dre nuain raba mada? Nita kukwe driere ye ngwane nitre mada käkwe dre niedi ye ñaka gare nie, akwa Jesukwe käbämikani Ngöbö üai deme ye köböire ni raba kukwe driere kwin (Mar. 13:11). Aisete, nikwe käre üai deme kärädre Jehovai (Luc. 11:13).
4. ¿Nita ja tuin kukwe ruäre ben akwa yebiti ta nita kukwe driere, ye ngwane kukwe meden kwin rabai nikwe?
4 Kukwe kwin tä nemen nikwe. Kukwe ruäre ben nita ja tuin, akwa yebiti ta nita kukwe driere, ye ngwane kä jürä ñaka rabai nibätä aune ni törbai kukwe driei jankunu, ye käkwe mikai gare üai deme tä nibätä (Hech. 4:31). Nikwe kukwe ye nuaindre angwane, ye käkwe ni dimikai ja tuakäre kukwe mada rabadre bare nibätä yebe. Jehovakwe ni dimikai ñaka kä jürä ngwen jabätä aune ye köböire tödeka nikwe rabai dite aune nikwe tö ngwain bäri niarai (Isa. 33:2). Nita kä mike juto ni Rün kä kwinbiti yebätä ye käkwe kä mikai juto nibätä arato (1 Ped. 4:13, 14). Ye medenbätä, nikwe ja töimikadre kwatibe Gobran Ngöbökwe kukwei driere aune ñaka kä jürä ngwen jabätä, ñobätä ñan aune käre Jehovakwe ni dimikai.