Kukwe ngwantarita

◼ ¿Ni iti tä nirien kukwe ja üairebiti ye tötikadre nemen medente mrä?

Tärä kubu: ¿Qué enseña realmente la Biblia? bätä “Manténganse en el amor de Dios” yebiti ni iti tä nirien kukwe ja üairebiti tötikadre aune mikadre krüte ben. Ni ja tötikaka käkwe ja ngökadre ñöte, akwa tärä kubu ye mikadre krüte ben. Ora nuainta, tuabitita bätä tötikata Bibliabätä ye ni raba täine. Ni kukwe driekä mada rikadre nibe aune blitadre kwe siba, ye raba ora täine arato (Sribi Nikwe Ngöbökrä marzo kä 2009, página 2, mikadre ñärärä).

Ütiäte krubäte kukwe metre ye rabadre nitre mrä brukwäte jämi ja tuin kukwe ruäre ben ye känenkri. “Kri ngätri tä niken mente dobote nguse käta kri mike dite”, ye kwrere niaratre tö ngwandre Kristo ie aune rabadre ‘tödeke kwatibe’ angwane niaratre rabai juto biare ja tuakäre kukwe rabadre bare bätätre yebe (Col. 2:6, 7, KKN; 2 Tim. 3:12; 1 Ped. 5:8, 9). Arato “kukwe era metre [...] rabadre gare” ietre, ne kwe rabadre kukwe driere kwin nitre madai (1 Tim. 2:4, KKN). Tärä kubu ye mikadre krüte angwane, nita ni ja tötikaka dimike näin “ji käta niken ni ngwena nüne kärekäre” yebiti (Mat. 7:14, KKN).

Ni iti törbadre ja ngökai ñöte, akwa kukwe ütiäte drieta Bibliabätä rabadre gare kwin ie aune ye ererebätä ja ngwandre kwe, ye nitre umbre käkwe mikadre gare kwin jai jämi ja ngökö ñöte ye känenkri. Niaratre käkwe töbikadre kwin käne ni ja tötikaka abokän ie tärä kena jämi krüte yebätä. Ni iti jämi juto ja ngökakäre ñöte angwane, nitre umbre käkwe kukwe ükadrete ni ye dimikakäre, ne kwe rabadre ja ngökö ñöte ja känenkäre (Organizados para hacer la voluntad de Jehová, página 216 nemen 218 mikadre ñärärä).

[Rekwadro de página 2]

Ütiäte krubäte kukwe metre ye rabadre nitre mrä brukwäte