“Mun rabadre ñotra trä ye kwrere”
1. ¿Sribi meden ütiäte tä nuaindre nie?
1 Dekä nemen dere ñänä trä tä Jehová käikitekä. Akwa nitre ja tötikaka Jesukwe rabadre trä ngitiekä, ye abokän ñaka nämene blite kä trä metrere yebätä, ñakare aune nämene blite ‘kä trä ja nire kräke’ yebätä (Juan 8:12). Ni rabadre trä ngitiekä kukwe ja üairebiti ye sribi ütiäte krubäte tä ni kisete. ¿Sribi meden gärätä? Jesukwe niebare: “Mun rabadre ñotra trä ye kwrere ni mda mda okwäbti”, ye abokän nikwe ni mada dimikadre kukwe Ngöbökwe yebiti meden gärätä (Mat. 5:16, Kukwe Kuin Ngöbökwe [KKN]). Kä nengwane nitre tä nüne kä drünente kukwe ja üairebiti, ye medenbätä, ütiäte krubäte nitre ye dimikadre. ¿Jesús kwrere ni rabadre trä ngitiekä ño?
2. ¿Kä trä ja üairebiti ye ütiäte krubäte Jesukwe bämikani ño?
2 Kukwe driere. Jesukwe kukwe metre driebare ja di tätebiti bätä jondron kwe yebiti, nämene nuainne ju ju te, nitre nämene kwati yekänti, ngüdrebiti aune kä jökrä yekänti. Kukwe Ngöbökwe ye köböire jondron kwin tä nemen bare ye nämene gare kwin ie (Juan 12:46). Ne madakäre, kukwe metre mikakäre gare nitre kwati ie, yekäre nitre ja tötikaka ben ye ükaninte kwe, ne kwe niaratre rabadre “ñotra trä kwrere kä nebtä” (Mat. 5:14, KKN). Ye erere niaratrekwe nuainbare, niaratre käkwe nitre mada dimikani aune kukwe metre Ngöbökwe mikani gare kwetre nitre yei.
3. ¿Kukwe metre ye ütiäte ni kräke ye ni raba bämike ño?
3 Kä nengwane, ‘nitre tä näin kä träte ye kwrere nändre’, ye abokän ütiäte nitre Ngöbö mikaka täte ye kräke, ye medenbätä tätre kukwe driere nitre jökrä ie (Efe. 5:8). Ni törba blita kömikai angwane, nikwe ñäkädre Bibliabätä o tärä sribeta yebätä nitre mada okwäbiti kwelate o sribikänti ni tädre ngwarbe ye ngwane. Ye erere, meri bati testiko Jehovakwe käkwe nuainbare köböire ja tötika Bibliabätä kömikani kwe aune nitre ni jätäbiti nibu nänkä kwelate ben yei tärä mikaninte kwe.
4. ¿Ñobätä ja ngwandre kwin ne kwe ni rabadre kä trä ye kwrere?
4 Ja ngwandre kwin. Ni rabadre kä trä kwrere yekäre nikwe ja ngwandre kwin arato (Efe. 5:9). Nita ja ngwen kwin kwelate, sribikänti bätä nitre mada okwäbiti ye ngwane, ni raba blite Bibliabätä ni madabe (1 Ped. 2:12). Ñodre, monso chi kä kwärikebiti nämene ja ngwen kwin, yebätä meri niara tötikaka kwelate käkwe rün bätä meye käräbare, aune niebare kwe ietre: “¡Monso chi ja ngwen kwin ne erere ti ñan tuabare jire chi!”. Erametre, nita kukwe driere aune ja ngwen kwin ye kätä nitre töi mike ‘kä trä ja nire kräke’ yebätä aune Ngöbö käikitekä arato.