Sribita ni kisete ye nuainkäre Jehovata ni tötike
1. Jehovata sribi bien nuaindre ni niara mikaka täte yei angwane ¿tä dre nuainne ne kwe sribi ye nuaindre kwin?
1 Nitre kätä Jehová mike täte yei sribi bianta kwe angwane sribi ye nuaindre ño kwetre ye tä driere ietre. Ñodre, Noé käkwe arka sribedre niebare ie angwane —sribi ye kwrere ñaka nämene gare jire chi Noé ie—, akwa sribi ye nuaindre ño ye driebare kwe ie arato (Gén. 6:14-16). Moisés, ni obeja ngübaka juani blite nitre umbre Israel yebe bätä Faraón ben, ye ngwane Jehovakwe käbämikani ie: “Tikwe blitai mä kräke bätä dre niedre mäkwe ye tikwe driedi mäi” (Éx. 4:12). Kä nengwane, nita kukwe kwin driere ye ngwane Jehová ñaka tä ni tuenmetre kaibe. Kwela Sribi Ngöbökwe Kräke aune Gätä Sribi Ngöbökwe Nuainkäre yebiti niarata ni tötike sribi ye nuainkäre. ¿Ni tötikata ye raba ni dimike ño?
2. ¿Nikwe dre nuaindre ne kwe Kwela Sribi Ngöbökwe Kräke ye käkwe ni dimikadre?
2 Kwela Sribi Ngöbökwe Kräke. Kukwe ükaninte bämän kratire kratire kräke yebätä ja tötikadre käne. Nitre dianinkä kukwe kädriekäre käkwe kukwe ye kädriedre ño ye nikwe kukwe nuadre angwane diridre ño bäri kwin ye rükai gare nie (Pro. 27:17). Mä rika tärä Benefíciese ngwena jai gätäte aune mäkwe kukwe känänbätä. Ni itire itire käkwe kukwe kädriedre kwela yete, ye bitikäre ni kwela jie ngwanka kätä kukwe niere ni yei aune mä törba kukwe meden meden nuain ye mäkwe täräi mikaka bätä mäkwe kukwe tika tärä yebätä arato. Kukwe bianta nie kädriekäre ye nikwe nuaindi angwane ye köböire kwela ye käkwe ni dimikai. ¿Mäkwe ja kä bianina kwela ye kräke? Kukwe biandre mäi nuainkäre kwelate, yebätä mäkwe ja tötika kwin aune kukwe nieta mäi ye erere mäkwe nuain. Mä rikadre kukwe driere ye ngwane kukwe namani gare mäi ye mäkwe nuain.
3. ¿Dre käkwe ni dimikai kukwe kädrieta Gätä Sribi Ngöbökwe Nuainkäre yete ye kukwe nuin kwin?
3 Gätä Sribi Ngöbökwe Nuainkäre. Nikwe ja tötikadre käne aune ja ükadrete blitakäre, ye ngwane kukwe meden meden kädrie gätä yete ñaka käi rikwitaikä nibiti. Nikwe ñaka blitadre nga angwane nitre kwati raba blite arato. Kukwe bämikata ye mäkwe mika ñärärä kwin aune meden raba mä dimike kukwe driere bäri kwin ye erere mäkwe nuain. Kukwe ütiäte mikata gare Sribi Nikwe Ngöbökrä yebätä, täräkwata ye ñaka kitadrekä.
4. ¿Ngöböta ni tötike ye ñobätä ñaka juandre jabäre?
4 Sribi biani nuaindre Noé aune Moisés yei, ye ñaka namani nuäre kräketre, ye erere kukwe kwin driedre Kä jökräbiti tibien sribi ye ñaka nuäre nuaindre nie (Mat. 24:14). Nikwe tö ngwandre Jehovai ni ni Tötikaka Kri ie aune niara tä ni tötike ye nikwe ñaka juandre jabäre angwane nikwe sribi ye nuaindi kwin (Isa. 30:20).