Kukwe ngwantarita

◼ ¿Nitre tötikata Bibliabätä jukwebätä yebe orasion nuain raba?

Ja tötika Bibliabätä kömikadre aune mikadre krüte orasionbiti ye kwin krubäte. Nita orasion nuainne yebiti nita üai deme kärere Jehovai, ne kwe ni jie ngwandre kwe nita ni mada tötike ye ngwane (Luc. 11:13). Ni ja tötikaka nibe ye kräke ja tötika ye rabai ütiäte aune oradre ño ye rabai gare ie arato (Luc. 6:40). Ye medenbätä, ni iti tä ja tötike nibe Bibliabätä yebe orasion nuaindre ja tötika kömikakäre. Kukwe keta kabre raba nemen bare, ye medenbätä, ni ni mada tötikaka Bibliabätä tä ni iti tötike jukwebätä ye ngwane töbikadre kwin käne kwe ñongwane raba orasion nuainne.

Kä medekänti nitre tötikata yebätä töbikadre kwin käne. Nita ni iti tötike jankunu aune nuainta nitre ñaka kwati yekänti, ye ngwane orasion nuain raba jötrö ngwarbe ja tötika kömikakäre aune mikakäre krüte. Akwa, nikwe orasion nuaindre, ye ngwane nitre mada tädre ni bäre okwä rabadre nibätä o ni ja tötikaka ye rabadre jakaire, angwane bäri kwin ñaka orasion nuaindre, ñakare aune nikwe ni ye tötikadre kä kaibe te ye ngwane orasion nuain raba. Nikwe nitre tötikadre kä medenkänti ye ngwane nikwe töbikadre kwin käne, ñongwane ni raba orasion nuainne ni ja tötikaka nibe yebe (Nuestro Ministerio del Reino marzo 2005, página 4 mikadre ñärärä).