Jehovata ni tötike ye ñaka juandre ja bäre

1. ¿Nitre Jehová mikaka täte käkwe ja tötikadre ye tuin ño ie?

¹ Jehová “Ni tötikaka Kri”, ye medenbätä ni niara mikaka täte käkwe ja tötikadre kwin ye ütiäte krubäte kräke (Isa. 30:20). Niarakwe Monso kwe mubai sribebare ye ngwane ja känenkäre niara jatani ni tötike (Juan 8:28). Adán käkwe ja mikani Jehová rüere, aisete ni jökrä ngite, akwa yebiti ta niara tä ni tötike jankunu (Isa. 48:17, 18; 2 Tim. 3:14, 15).

2. ¿Nitre tötikata ño kä nengwane?

² Jehovata nitre kwati tötike bäri kä nengwane. Isaías käkwe mikani gare erere, nitre kwati Kä jökräbiti tibien käkwe nändi “Ngutuä Jehovakwe” ye kokwäre (Isa. 2:2). ¿Ñokäre nuaindi kwetre? Ne kwe Jehovakwe niaratre tötikadre nänkäre ji kwe yebiti (Isa. 2:3). Sribi Ngöbökwe nuainbare kä 2010 ye ngwane, nitre testiko Jehovakwe käkwe ora nuainbare 1.600 millones kukwe driekäre aune nitre tötikakäre Bibliabätä. Ne madakäre, konkrekasion ciento cinco mil kä jökräbiti tibien yete ni tötikata bämän kratire kratire te, arato nitre sribikä täte metre bätä töbätä kätä tärä sribere kukwe quinientos jene jenebiti bäri.

3. ¿HS.25 Jehovata mä tötike ye tä mä dimike ño?

³ Ni tötikata kwin. ¡Ngöböta ni tötike ye käkwe ni dimikanina krubäte! Ni tötikata ye köböire Ngöbö kä tärä aune töita nibätä ye gare metre nie (Sal. 83:18; 1 Ped. 5:6, 7). Arato, kukwe metre niena gare nie, ñodre: ¿Ñobätä ja tare nikata aune nita krüte? ¿Ñokänti kä juto ye raba kwen nie? ¿Ñokäre ni sribebare? Ne madakäre, kukwe meden nikwe nuaindre nünankäre kwin ye Jehovata driere nie (Jos. 1:8).

4. ¿Kukwe meden ükaninte Jehovakwe abokän känti ni raba niken ja t|ötike aune ñobätä nikwe ñaka juandre ja bäre?

⁴ Jehovata kukwe ükete ni niara mikaka täte tötikakäre, ne kwe kukwe driedre bäri kwetre. Kukwe ükaninte abokän känti ni raba niken ja tötike ye mikata gare página 4 nemen 6 yebätä. Akwa, nane kukwe ruäre tä mä kisete yebätä mä ñan raba niken kwela jene jene yete angwane, ¿kukwe ükaninte nitre jökrä tötikakäre Bibliabätä yebätä mä raba ja töi mike ñaka juen ja bäre? ¿Monsotre bati käkwe dre nuaindre? Ni mä tötikaka kwelate aune ni mada käre tä mä töi mike niken ja tötike kwela krite. Nunta mun nübaire ñaka ja töi mike kukwe mada den ja käne, ñakare aune ja töi mike sribi Ngöbökwe yebätä, ne kwe Jehovata kukwe ükete ni tötikakäre ye käkwe kukwe kwin mikadre nemen bare munbätä. Ngöböta kukwe ükete ni tötikakäre ye nikwe ñaka juain ja bäre angwane, ye käkwe kä mikai juto nibätä kä nengwane aune kä ja känenkäre yete arato (Sal. 119:105; Juan 17:3).

Juta Jehovakwe tä kukwe ükete ni tötikakäre

• Ñokäre nuainta: Nitre dimikakäre ne kwe rabadre ñäke täräbätä aune tärä tike, ye köböire rabadre ja tötike Bibliabätä aune kukwe metre driere nitre madai.

• Köbö nuäi te: Nitre töi nuäi ye ererebätä kukwe ükadrete kwela ye nuainkäre.

• Kä: Ju ja Ükarakrö yekänti.

• Nire nire kräke: Ni kukwe driekä o nitre tä nirien kukwe ja üaire yebiti ye kräke.

• Kukwe meden ribeta: Nitre tä kwela ye ribere jai angwane nitre umbre konkrekasionte tätre kukwe ükete, ne kwe nitre ye jökrä rikadre arato.

Kwela Sribi Ngöbökwe Kräke

• Ñokäre nuainta: Nitre kukwe driekä käkwe kukwe driedre kwin aune diridre kwin kwetre.

• Köbö nuäi te: Nuainta käre.

• Kä: Ju ja Ükarakrö yekänti.

• Nire nire kräke: Nitre kukwe driekä kräke. Arato, nitre tä ja ükökrö käre nibe konkrekasionte aune tätre ja ngwen kukwe nieta Bibliabätä ye erere, ye nübaita siba.

• Kukwe meden ribeta: Blitadre ni Kwela Sribi Ngöbökwe jie ngwanka yebe.

Ni tötikata blite kukwe madabiti

• Ñokäre nuainta: Nitre kukwe driekä tötikata kukwe driekäre kukwe madabiti.

• Köbö nuäi te: Sö kräbokä o krärike. Ora krati o krobu diankata nitre tötikakäre sabado kratire kratire dekä.

• Kä: Ju ja Ükarakrö bäri no yekänti.

• Nire nire kräke: Nitre kukwe driekä abokän tä ja ngwen kwin aune tö kukwe driei kukwe madabiti.

• Kukwe meden ribeta: Nitre ribeta kukwe driekäre kukwe madabiti ye ngwane sukursal tä kukwe ye ükete.

Ju ja Ükarakrö Sribeta

• Ñokäre nuainta: Ju ja ükarakrö ye sribekäre aune ükatekäre. Nitre ñaka tötikata sribi ye nuainkäre, akwa nitre tä niken sribire ja töi jeñebiti ye dimikata sribi keta kabre nuainkäre, ne kwe rabadre sribire kwin.

• Köbö nuäi te: Nitre sribikä ja töi jeñebiti raba sribere jankunu o ñakare, ye ererebätä nübaita.

• Kä: Kä medenkänti sribidre ye Nitre dianinkä Ju ja Ükarakrö sribeta jie ngwankäre kä ruäre känti tä kukwe ye ükete. Ne madakäre, kukwe tare tä nakainkä käbiti tibien ye ngwane nitre sribikä ruäre juanta ja mräkätre dimike.

• Nire nire kräke: Nitre ja ngökanina ñöte aune raba niken sribi ye nuainne ye nitre umbre käkwe niedre. Sribi ye nuaindre ño ye ñaka gare nitre brare o merire ie akwa nübaita arato.

• Kukwe meden ribeta: Cuestionario para trabajadores voluntarios en Salones del Reino (S-82-S) ye mäkwe kärä nitre umbre yei aune kukwe tikadrebätä.

Kwela nitre Sribikä Prekursor kräke

• Ñokäre nuainta: Nitre prekursor tötikata ne kwe “sribi ño ño nuendre [...] kuin jökrä” kwetre (2 Tim. 4:5, Kukwe Kuin Ngöbökwe).

• Köbö nuäi te: Bämän krobu.

• Kä: Ju ja Ükarakrö bäri no yekänti sukursal tä nuainmana.

• Nire nire kräke: Nitre kätä sribi prekursor ye nuainne kä kwati te.

• Kukwe meden ribeta: Ni ni tuabitikä tä kukwe ye ükete aune nire nire raba niken ye niarata kä tike.

• Ñokäre nuainta: Kwela ne nuainta ne kwe nitre tä nüke sribire kena Betelte ie ja rabadre ruin kwin sribire yete.

• Köbö nuäi te: Bämän krä jätä biti krä ti, nuainta ora krati bämän kratire kratire te.

• Kä: Betel.

• Nire nire kräke: Nitre nübaita sribire Betelte o nitre ruäre abokän tätre niken sribere ja töi jeñebiti (tädrera sribire kä kwati o bäri).

• Kukwe meden ribeta: Sukursal tä nitre denkä ne kwe rikadre kwela yete.

Kwela Sribi Ngöbökwe jie ngwankäre

• Ñokäre nuainta: Ne nuainta nitre umbre aune nitre sribikä konkrekasionte tötikakäre, ne kwe sribi mikani niaratre kisete ye nuaindre kwin kwetre, ñodre rabadre kukwe ükete kwin aune konkrekasion ngübarebiti kwin (Hech. 20:​28). Ñongwane kwela ye nuainta ye tä gare Nitre Braibe konkrekasion jökrä Ngübabitikä yei.

• Köbö nuäi te: Kä nikanina ta yete nuainta köbö köböiti biti ötare nitre umbre kräke aune köböiti nitre sribikä konkrekasionte kräke.

• Kä: Ju ja Ükarakrö yete o Ju Gätä kri nuainkäre yete.

• Nire nire kräke: Nitre umbre o nitre sribikä konkrekasionte kräke.

• Kukwe meden ribeta: Ni ni tuabitikä konkrekasionte tä nitre nübaire.

Kwela nitre Umbre Konkrekasionte kräke*

• Ñokäre nuainta: Nitre umbre dimikakäre sribi mikani kisete ye nuainkäre kwin.

• Köbö nuäi te: Köbö köbörike.

• Kä: Sukursal ie tä gare, ruäre nuainta Ju ja Ükarakrö o Ju Gätä kri nuainkäre yete.

• Nire nire kräke: Nitre umbre kräke.

• Kukwe meden ribeta: Sukursal tä nitre nübaire.

Kwela nitre Ni tuabitikä Konkrekasionte bätä Muko kwe kräke*

• Ñokäre nuainta: Nitre ni tuabitikä konkrekasionte bätä nitre gätä kri köböbu tuabitikä käkwe sribidre kwin konkrekasion dimikakäre, ne kwe niaratre tä ­“kukwe driere aune nitre tötike” ye nuaindre kwin bätä rabadre ja mräkätre ngübare kwin arato (1 Tim. 5: 17; 1 Ped. 5:​2, 3).

• Köbö nuäi te: Sö krobu.

• Kä: Sukursal ie tä gare.

• Nire nire kräke: Nitre ni tuabitikä konkrekasionte bätä nitre gätä kri köböbu tuabitikä kräke.

• Kukwe meden ribeta: Sukursal tä nitre ni tuabitikä ye nübaire aune muko kwe arato.

Kwela nitre Brare Kaibe tötikakäre Bibliabätä*

• Ñokäre nuainta: Nitre umbre aune nitre sribikä konkrekasionte tötikakäre sribi mada nuainkäre kwin. Nitre tä niken kwela yete ye bäsi jökrä juanta nitre ribeta kukwe driekäre juta kwe yekänti. Ruäre abokän töta nänbätä juta madate angwane juanta juta yete.

• Köbö nuäi te: Sö krobu.

• Kä: Sukursal ie tä gare, ruäre nuainta Ju ja Ükarakrö o Ju Gätä kri nuainkäre yete.

• Nire nire kräke: Nitre brare kaibe, kä 23 nemen 62 nitre yebiti, ñaka bren bätä töi rabadre juto biare ja mräkätre dimikabätä aune medente nitre ribeta kukwe driekäre yekänti ja töi mikadre niken kwetre (Mar. 10:​29, 30). Tädre sribire ni umbre o ni sribikä konkrekasionte erere kä kubu te.

• Kukwe meden ribeta: Gätä kri köböbu nuainta ye ngwane nire tö näin kwela yete yebe gätä nuainta. Ye nuainta juta ruäre känti.

Kwela nitre Kristiano Gure tötikakäre Bibliabätä*

• Ñokäre nuainta: Nitre gure tötikakäre ne kwe sribidre bäri kwetre Jehová aune juta kwe ye kräke. Nitre tä niken kwela yete ye bäsi jökrä juanta kukwe driere nitre ribeta kukwe driekäre juta kwe yekänti. Ruäre abokän töta nänbätä juta madate angwane juanta juta yete.

• Köbö nuäi te: Sö krobu.

• Kä: Kwela ne kömikani Centro Educativo Watchtower; ye tä Patterson (Nueva York) yekänti. Ye bitikäre, kwela ye nuaindi kä medenkänti ye tä gare sukursal ie, ye nuain raba Ju ja Ükarakrö o Ju Gätä kri nuainkäre yete.

• Nire nire kräke: Kä tädre 25 nemen 50 nitre yebiti, ñaka bren, tädre sribire köbö täte Ngöbö kräke aune töi rabadre Isaías erere, niarakwe niebare: “¡Tita nete! Mäkwe ti juan” (Isa. 6:8). Kä kubura te tädre gure aune medente nitre ribeta kukwe driekäre, yekänti tädre juto biare nänkäre.

• Kukwe meden ribeta: Gätä kri köböiti nuainta ye ngwane nire tö näin kwela yete yebe gätä nuainta kukwe mikakäre gare bäri ietre. Ye nuainta juta ruäre känti.

Kwela Galaad Watchtower ja tötikakäre Bibliabätä

• Ñokäre nuainta: Nitre prekursor aune nitre mada sribikä köbö täte tötikata juankäre misionero erere.

• Köbö nuäi te: Sö krärike.

• Kä: Centro Educativo Watchtower; ye tä Patterson (Nueva York) yekänti.

• Nire nire kräke: Nitre gure aibe nübaita. Täräkwata juandre kwetre angwane, tädrera sribire köbö täte Ngöbö kräke kä kubu te, kä komära ja ngökanina ñöte, kä kubura gure bätä kä tädre 21 nemen 38 niaratre yebiti. Blita gare inglere ietre aune ñaka tädre bren. Nitre prekursor tä niken kukwe driere juta madakänti aune kukwe ribeta nete ye erere rabadre nuainne angwane raba formulario juen (nitre ruäre ñaka janamene kwelate yete akwa kädekani misionero), nitre ni tuabitikä konkrekasionte, nitre sribikä Betelte, nitre janamane Kwela nitre Brare Kaibe tötikakäre Bibliabätä yebätä o nitre janamane Kwela ni tötikara Sribi Ngöbökwe jie ngwankäre yebätä aune nitre janamane Kwela nitre Kristiano Gure tötikakäre Bibliabätä yebätä.

• Kukwe meden ribeta: Gätä kri köbömä nuainta ye ngwane nire tö näin kwela yete yebe gätä nuainta kukwe mikakäre gare bäri ietre. Ye nuainta juta ruäre känti. Akwa juta mäkwe yete ye ñaka nuainta angwane mä raba kukwe tike sukursal mä käite yei kukwe mikakäre gare bäri jai.

Kwela nitre Ji ngwanka Sukursalte aune Muko kwe kräke

• Ñokäre nuainta: Nitre Ji ngwanka Sukursalte dimikakäre ne kwe sribi nuainta Betelte ye ükadrete kwin kwetre aune konkrekasion kwatire kwatire ye dimikakäre, arato nitre ni tuabitikä konkrekasionte aune nitre gätä kri köböbu tuabitikä dimikakäre sribi nuainta kwetre yebätä, kukwe kwitata, tärä sribeta aune juanta bätä sribi keta kabre nuainta sukursalte ye jie ngwankäre (Luc. 12: 48b).

• Köbö nuäi te: Sö krobu.

• Kä: Centro Educativo Watchtower; ye tä Patterson (Nueva York) yekänti.

• Nire nire kräke: Nitre sukursal jie ngwanka o Nitre ruäre kadekata sribi Ngöbökwe jie ngwen juta ruäre te o nitre ruäre abokän kädekai sribi ye nuainkäre.

• Kukwe meden ribeta: Nitre Braibe Konkrekasion jökrä Ngübabitikä tä ja mräkätre aune muko kwe ye nübaire.

Juta ruäre aibe känti nuainta.