¿Kukwe meden rabadre nikwe ne kwe diridre kwin?
1. ¿Dre rabadre ni kukwe driekä yekwe ne kwe rabadre dirikä kwin?
1 ¿Dre rabadre ni kukwe Bibliabätä driekä yekwe ne kwe rabadre dirikä kwin? ¿Ja tötikadre kwe krubäte kwelate? ¿Kä rikadre kwati ta niarabiti nitre tötikabätä? ¿Diridre ño ye rabadre gare täte ie? Ñakare. Metrere ja tare ye rabadre kwe, nita ni mada tarere angwane ni raba Kukwe biani nuainkäre ye mike täte, ni nänkä Kristo jiebiti ye nüke gare ja tare yebiti bätä Jehová töi kwin ütiäte ye tä bämike ja tare yebiti (Juan 13:35; Gál. 5:14; 1 Juan 4:8). Ni rabadre dirikä kwin yekäre nikwe ja tare ye bämikadre.
2. ¿Ñobätä ütiäte nikwe ni mada taredre?
2 Ni mada taredre. Jesús Dirikä Kri nämene nitre tarere, aune ye köböire nitre nämene niara kukwe nuin (Luc. 5:12, 13; Juan 13:1; 15:13). Nikwe ni mada taredi angwane kukwe driedi ni jökrä ie. Nitre ñan tö kukwe mikai gare jai, tätre ja mike ni rüere o kukwe mada tä nemen bare nibätä, akwa ye käkwe ñaka ni mikai nemen kwekebe. Nitre ie nita kukwe driere ye nikwe kukwe nuadre kwin aune drebätä tä töbike ye ererebätä kukwe niedre ietre. Ne madakäre, nikwe ja di ngwain kä denkä jai ja tötike bentre aune ja ükete kukwe kwatire kwatire ye driekäre ietre.
3. ¿Nita kukwe metre tarere angwane ye käkwe ni dimikai ño kukwe driere?
3 Kukwe Bibliabätä taredre. Jesús nämene kukwe metre ye tarere. Kukwe ye nämene tuin ie jondron ütiäte ye kwrere (Mat. 13:52). Nita kukwe metre tarere angwane nikwe kukwe driei kä jutobiti aune ye matai kwin ni ni kukwe nuaka yebätä. Kukwe metre tare nikwe angwane ye käkwe ni dimikai ñaka nikenkä krubäte, ñobätä ñan aune kukwe drieta nikwe ye ütiäte krubäte, yebätä nikwe töbikai aune ñaka ja töi mikai ja ruin ño nie yebätä.
4. ¿Dre nuaindre ne kwe ja tare ye rabadre nikwe?
4 Ja tare ye rabadre nikwe. Nitre tä kukwe ja üaire ribere jai aune Jehová bätä Monso kwe käkwe ja tare ye bämikani ño, yebätä nikwe töbikadre angwane nikwe nitre mada taredi arato (Mar. 6:34; 1 Juan 4:10, 11). Ne madakäre, nita ja tötike kaibe aune töbiketari kukwe yebätä, ye köböire kukwe metre ye nikwe taredi bäri. Ja tare ye kite Ngöbökri ye nikwe ngwandre törö jai arato (Gál. 5:22). Ye medenbätä, nikwe ja di kärädre Jehovai aune üai deme kärädre ie ne kwe ja tare ye ririadre (Luc. 11:13; 1 Juan 5:14). Nikwe ja tötikabare kwelate, ni niena mekerabe kukwebätä, o kukwe gare krubäte nie, akwa ye ñan bäri ütiäte, ñakare aune, nikwe ja tare ye bämikadre ne kwe ni rabadre Kukwe Ngöbökwe ye driekä kwin.